Dövlət Statistika Komitəsindən aldığımız məlumatlar 2013-cü ilin Azərbaycan idmanı üçün də uğurlu olduğunu təsdiqləyir. Belə ki, 2012-ci ildə olimpiya oyunlarında qazanılmış qələbələr 2013-cü ildə də davam etdirilmişdir.
Azərbaycan idmançıları Tələbələrin Yay Universiadasında böyük uğurlara imza atmış və 16 medal qazanaraq komanda hesabında 15-ci yerə layiq görülmüşlər. Ümumiyyətlə, müxtəlif beynəlxalq yarışlarda qazanılmış 782 medalın 280-i qızıl, 233-ü gümüş, 269-u isə bürüncdür. Olimpiya idman növləri üzrə qazanılan medalların sayı 296-dır. Eyni zamanda, olimpiya idman növləri üzrə dörd idmançımız dünya çempionu olmuşdur.
Azərbaycanda mütəmadi qaydada beynəlxalq yarışlar, dünya və Avropa çempionatları keçirilir. Yeniyetmələr və gənclər idmana böyük maraq göstərirlər. Müstəqillik dövründə respublikamızın şəhər və rayonlarında onlarca olimpiya idman kompleksi tikilib istifadəyə verilmişdir ki, bunlardan da 4-ü 2013-cü ilin payına düşür. Göygöl Olimpiya İdman Kompleksinin tikintisi tam başa çatdırılmışdır və obyekt tezliklə əhalinin istifadəsinə veriləcək. Abşeron, Ağcabədi, Yardımlı olimpiya idman komplekslərinin tikintisi və Lənkəran Olimpiya İdman Kompleksinin yenidən qurulması işləri davam etdirilir.
Cari ilin əvvəlinə ölkədə idman qurğularının sayı 10,3 minə çatmışdır, idmanla məşğul olanların sayı müntəzəm olaraq artmaqdadır. Əhali arasında futbol, voleybol, şahmat, yüngül atletika, dama, basketbol, sərbəst güləş, cüdo və stolüstü tennis kimi idman növlərinə daha çox maraq göstərilir.
2014-cü il Avropa Oyunlarına hazırlıq üçün həlledici il olacaq. Hazırda Bakıda 65 minlik Olimpiya stadionu, Böyük Su İdman Növləri Sarayı, Gimnastika Mərkəzi, Stend Atıcılığı Mərkəzi tiklir. Eyni zamanda Əl Oyunları Sarayında, Heydər Əliyev İdman Mərkəzində əsaslı təmir işləri aparılır.
"Azərbaycan"
jpg_1766066117.jpg)
