Naxçıvan şəhər 2 nömrəli tam orta məktəb yenidən qurulub

1925-ci ildən fəaliyyət göstərən 2 nömrəli tam orta məktəb zəngin təhsil ənənələrinə malikdir. Məktəb muxtar respublikada  təhsilin inkişafına töhfələr verib. Naxçıvanda təhsil quruculuğu sahəsində görülən işlər 2 nömrəli tam orta məktəbi də əhatə edib, müasir maddi-texniki baza və tədris şəraiti yaradılıb.
Naxçıvan Muxtar Respublikası Ali Məclisinin Mətbuat xidmətindən AZƏRTAC-a bildirilib ki, oktyabrın 19-da Naxçıvan şəhər 2 nömrəli tam orta məktəb yenidənqurmadan sonra istifadəyə verilib.
Naxçıvan Muxtar Respublikası Ali Məclisinin Sədri Vasif Talıbov məktəbdə yaradılan şəraitlə tanış olub.
Məlumat verilib ki, məktəbdə kompüterlər, döşəmə, istilik və elektrik sistemləri, partalar yenilənib, divar və tavanlar təmir olunub, kimya və biologiya laboratoriyaları yaradılıb, 2 elektron lövhə quraşdırılıb, tibb otağı, idman zalı və hərbi kabinə yenidən qurulub. Hazırda üçmərtəbəli 276 şagird yerlik məktəbdə 15 sinif otağı, kimya, biologiya, fizika laboratoriyaları, şahmat sinfi, kompüter, direktor, psixoloq, müəllimlər, tibb otaqları, hərbi kabinə, STEAM kabinəsi, kitabxana, qarderob, bufet və idman zalı yerləşir. Təhsil ocağında 24 kompüter və 4 elektron lövhə quraşdırılıb. Məktəbin kitabxana fondunda 6562 kitab vardır.
STEAM kabinəsi 1 elektron lövhə, 2 kompüter, 3D printer, mikrobit, arduino setləri və digər öyrədici STEAM qurğuları, həmçinin yeni nəşr olunan ədəbiyyat və dərsliklərlə təchiz edilib. Şagirdlər hazırladıqları "Elektron dövriyyə və mühəndislik dəsti ilə radio", "Çaylarda su səviyyəsini ölçən cihaz" və "Sənayedə avtomatik ip sarıyan mexanizm" layihələrini təqdim ediblər.
Müəllim Nübar Sadiqova yaradılan şəraitə görə minnətdarlıq edib.
Ali Məclisin Sədri elektron lövhəli sinifdə Ədəbiyyat Muzeyi ilə 200-dən artıq təhsil müəssisəsi arasında "Hüseyn Cavid-140" mövzusunda keçirilən interaktiv dərsi izləyib.
Birinci sinif şagirdi Kəmalə Qurbanlı Ümummilli Liderimiz Heydər Əliyevə həsr olunmuş şeir söyləyib.
Hərbi kabinənin lazımi vəsaitlərlə təchizatı hərbi hazırlıq və hərbi-vətənpərvərlik işinin təşkilində mühüm əhəmiyyət daşıyır. Hərbi rəhbər Novruz Novruzov bildirib ki, məktəbin 2 məzunu Heydər Əliyev adına Hərbi Liseyin ikinci kursunda təhsillərini davam etdirir. Ötən dövrdə hərbi idman oyunlarında fəal iştirak edilib, muxtar respublika və ölkə birinciliklərində nailiyyətlər qazanılıb.

Naxçıvanda Distant Təhsil Mərkəzi istifadəyə verilib

Muxtar respublikada sağlamlıq imkanları məhdud şəxslərin sosial müdafiəsinin gücləndirilməsi ilə bağlı həyata keçirilən tədbirlərlə yanaşı, həm də onların təhsili və cəmiyyətə inteqrasiyası diqqətdə saxlanılır. Qəbul olunmuş dövlət proqramları bu kateqoriyadan olan uşaqların təhsili üçün geniş imkanlar açıb. Görülən işlərin davamı olaraq 2021-ci ildə Naxçıvan Muxtar Respublikası Təhsil Nazirliyinin tabeliyində Distant Təhsil Mərkəzi yaradılıb.
Oktyabrın 19-da Naxçıvan Muxtar Respublikası Ali Məclisinin Sədri Vasif Talıbov mərkəzdə yaradılan şəraitlə maraqlanıb.
Bildirilib ki, mərkəzin əsas vəzifəsi sağlamlıq vəziyyətinə görə təhsil müəssisələrinə gələ bilməyən uşaqların məktəbin pedaqoji işçiləri vasitəsilə müasir təhsil texnologiyalarından istifadə etməklə ümumtəhsil proqramlarını evdə mənimsəməsini təmin etməkdən ibarətdir. Mərkəz Naxçıvan şəhər 2 nömrəli tam orta məktəbin üçüncü mərtəbəsində yerləşir və tədris məktəbin müəllimləri tərəfindən ibtidai, ümumi və tam orta təhsil səviyyələri üzrə aparılır. Bu da gələcəkdə onlara öz təhsillərini distant olaraq ali təhsil pilləsində davam etdirmək imkanı verəcəkdir.
Mərkəz üçün 9 sinif otağı və direktor müavini otağı ayrılıb, hər otaqda elektron lövhə, kompüter, monitor və kamera quraşdırılıb. Muxtar respublika üzrə I-IX siniflər üzrə 24 şagird distant təhsilə cəlb olunub, şagirdlərin evlərinə internet xətti çəkilib, hər bir şagirdə 1 kompüter olmaqla ümumilikdə 24 kompüter, məktəbli forması, dərs ləvazimatları və dərslik verilib.
Müəllimlərdən Sərfinaz Quliyeva və Aynur Orucova, valideyn Nuriyyə Adıgözəlova yaradılan şəraitə görə minnətdarlıq ediblər.
Ali Məclisin Sədri distant tədris prosesi ilə maraqlanıb və şagirdlərlə söhbət edib. Distant təhsil alan Sənan Adıgözəlov və Hüseyn Əliyev videobağlantı vasitəsilə Ümummilli Liderimiz Heydər Əliyevə və üçrəngli bayrağımıza həsr olunmuş şeirlər söyləyiblər.
Naxçıvan Muxtar Respublikası əmək və əhalinin sosial müdafiəsi naziri Nicat Babayev və distant təhsil üzrə direktor müavini Aynur İmamquliyeva Distant Təhsil Mərkəzinin və müvafiq kateqoriyadan olan uşaqların təhsilə cəlbinin əhəmiyyətindən danışıblar.
Sonra pedaqoji kollektivlə görüş olub.
Naxçıvan Muxtar Respublikasının təhsil naziri Rəhman Məmmədov və məktəbin müəllimi Günay Əliyeva çıxış ediblər.
Naxçıvan Muxtar Respublikası Ali Məclisinin Sədri Vasif Talıbov 2 nömrəli tam orta məktəbin müasir tədrisin tələbləri səviyyəsində qurulması, eyni zamanda məktəbin nəzdində Distant Təhsil Mərkəzinin istifadəyə verilməsi münasibətlə kollektivi təbrik edib, tədrisin yaradılan şəraitə uyğun qurulmasının əhəmiyyətini vurğulayıb.
Məktəb binasının həyətində də abadlıq işləri aparılıb.