Biləsuvarda və Neftçalada günəş-elektrik stansiyaları tikiləcək
"Yaşıl enerji" layihələri getdikcə inamla bölgələrə doğru da addımlayır. O cümlədən Biləsuvarda və Neftçalada günəş-elektrik stansiyaları tikiləcək.
Keçən ilin oktyabr ayında "Qaradağ" Günəş-Elektrik Stansiyasının açılış mərasimi çərçivəsində Prezident İlham Əliyevin iştirakı ilə Azərbaycan Hökuməti və Birləşmiş Ərəb Əmirliklərinin "Masdar" şirkəti arasında ümumi gücü 1000 MVt olan "yaşıl enerji" layihələri üzrə üç investisiya müqaviləsi imzalandı. Müqavilələr Biləsuvar rayonunda 445 MVt gücündə, Neftçala rayonunun Bankə qəsəbəsində 315 MVt gücündə günəş-elektrik stansiyaları və Abşeron-Qaradağ rayonunda 240 MVt gücündə külək-elektrik stansiyası layihələrinin icrasını nəzərdə tutur.
İnvestisiya müqavilələri 2022-ci ilin iyun ayında şirkətlə bərpaolunan enerji mənbələri üzrə 4 QVt (4000 MVt) gücündə "Meqa" layihələrin qiymətləndirilməsi, inkişafı və həyata keçirilməsi ilə bağlı imzalanmış icra müqavilələrinin birinci mərhələsini əhatə edir.
Bu ilin aprel ayında isə Nazirlər Kabineti Biləsuvar və Neftçala rayonlarının inzibati ərazilərində dövlət mülkiyyətinə aid torpaq sahələrini bərpaolunan enerji mənbələrinin əraziləri kimi müəyyənləşdirib. Bununla bağlı qərarlar imzalanıb. Qərara görə, Biləsuvar rayonunun inzibati ərazisində dövlət mülkiyyətində olan kənd təsərrüfatı təyinatlı torpaqlar kateqoriyasına aid 1454 hektar torpaq sahəsi qoyuluş gücü 445 MVt olan günəş-elektrik stansiyasının tikintisi məqsədilə bərpaolunan enerji mənbələrinin ərazisi kimi müəyyən edilib.
Neftçala rayonunun inzibati ərazisində Müdafiə Nazirliyinin istifadəsində olan sənaye, nəqliyyat, rabitə, müdafiə və digər təyinatlı torpaqlar kateqoriyasına aid 523 hektar torpaq sahəsi Energetika Nazirliyinin istifadəsinə verilməklə, rayonun Yenikənd bələdiyyəsinin mülkiyyətində olan 400 hektar və Neftçala bələdiyyəsinin mülkiyyətində olan 50 hektar kənd təsərrüfatı təyinatlı torpaq sahələri ilə birlikdə, ümumilikdə 973 hektar torpaq sahəsi qoyuluş gücü 315 MVt olan günəş-elektrik stansiyasının tikintisi məqsədilə bərpaolunan enerji mənbələrinin ərazisi kimi müəyyən olunub.
İyunun 4-də "Bakı Ekspo" Mərkəzində 29-cu Beynəlxalq Xəzər Neft və Qaz Sərgisinin açılışı çərçivəsində Prezident İlham Əliyev və Birləşmiş Ərəb Əmirliklərinin sənaye və qabaqcıl texnologiyalar naziri Sultan Əhməd Əl-Cabir sözügedən üç stansiyanın təməlini qoydular. Təməlqoymadan öncə dövlətimizin başçısı demişdir: "Bir az sonra iştirak edəcəyimiz mərasim haqqında danışarkən qeyd etdim ki, bu, sadəcə, başlanğıcdır. Yeri gəlmişkən, ötən ilin oktyabrında "Masdar" şirkəti 230 meqavat gücündə günəş-elektrik stansiyasını istifadəyə verib. İndi isə daha 1 qiqavat enerji həcmi əlavə edilir... Bu gün həqiqətən də əlamətdar gündür. Bakı Neft və Qaz Sərgisində qaz müqaviləsinin imzalanmasından 28 il sonra, 1 qiqavat həcmində bərpaolunan enerji ilə bağlı artıq imzaladığımız müqavilələr nəticəsində bu gün təməlqoyma mərasimi baş tutacaqdır. Artıq qeyd etdiyim kimi, bu, sadəcə, başlanğıcdır, çünki potensialımız nəhəngdir. Bizim tərəfdaşlarımız qlobal səviyyədə aparıcı şirkətlərdir və dediyim ki, "Masdar" "yaşıl enerji"yə keçid sahəsində ən öndə gedən şirkətdir".
Enerji tariximizdə ilk xarici sərmayə əsaslı ən böyük günəş-elektrik stansiyasının istifadəyə verilməsi, həmçinin 1000 MVt gücündə günəş və külək enerjisi stansiyalarının təməlinin qoyulması göstərir ki, ölkəmiz "yaşıl enerji" hədəflərinə doğru inamla gedir. Azərbaycan "yaşıl enerji" istehsal və ixrac edən ölkə kimi strateji hədəflərini "Masdar" şirkəti ilə reallaşdırmaqdan məmnunluq duyur və bu layihələr 2030-cu ilədək elektrik enerjisinin istehsal gücündə bərpaolunan enerji mənbələrinin payının 33 faizədək yüksəlməsində mühüm rol oynayacaq.
Qeyd edək ki, "Masdar"ın əsası 2006-cı ildə qoyulub və şirkət 40-dan çox ölkədə ümumi qoyuluş gücü 20 QVt-dan çox olan layihələr icra edib.
Bu arada yeni stansiyaların tikintisi ilə bağlı hazırlıqlar davam edir. Elə bu günlərdə "Yaşıl dünya naminə həmrəylik ili" çərçivəsində Neftçalada "Masdar" şirkəti və beynəlxalq maliyyə təşkilatlarının iştirakı ilə hazırlıq görüşü keçirilib.
Beynəlxalq maliyyə təşkilatlarından Asiya İnfrastruktur İnvestisiya Bankının, Avropa Yenidənqurma və İnkişaf Bankının, Asiya İnkişaf Bankının, "WSP"-nin nümayəndələri günəş-elektrik stansiyasının tikintisi layihəsi çərçivəsində onları maraqlandıran fikirlər səsləndiriblər. Layihə ilə bağlı gözləntilər, ətraf mühütə təsir, tikinti işlərinə cəlb olunacaq işçilərin sosial statusu və s. haqqında fikir mübadiləsi aparılıb.
Görüşdən sonra beynəlxalq maliyyə təşkilatlarının nümayəndə heyəti bərpaolunan enerji mənbələrinin inşa ediləcəyi əraziyə baxış keçirib, yerdə mövcud vəziyyətlə tanış olublar.
Flora SADIQLI,
"Azərbaycan"
