Ailə, Qadın və Uşaq Problemləri üzrə Dövlət Komitəsinin sədri Bahar Muradova noyabrın 6-da İsa Məsihin Sonuncu Gün Müqəddəsləri Kilsəsinin (Mormon kilsəsi) yüksəkrütbəli nümayəndəsi Cek Gerard və Stirlinq Fondunun prezidenti Mayls Hansenlə görüşüb.
Dövlət Komitəsindən AZƏRTAC-a bildiriblər ki, bütün dünya üçün vacib olan Qlobal Sammit çərçivəsində qonaqları ölkəmizdə görməkdən məmnunluğunu bildirən Bahar Muradova dünyamızı təhdid edən bir sıra məsələlərə, o cümlədən iqlim dəyişikliyi ilə mübarizəyə din xadimlərinin verə biləcəyi rolu yüksək qiymətləndirib, xüsusilə yaşıl planet naminə çalışmağı və bu məqsəd üçün dini liderləri bir araya gətirərək dünyaya çağırış etməyi müqəddəs bir iş adlandırıb.
B.Muradova Fondun və onun fəallarının bütün dünyada, eləcə də Azərbaycanda gördüyü işləri təqdir edərək, xüsusilə də işğaldan azad olunmuş ərazilərdə fəalların minatəmizləmə işinə cəlb olunmasını bu ərazilərdə həyatın və ədalətin bərpasına töhfə verən addım kimi qiymətləndirib.
Ölkəmizdə ailə institutunun əhəmiyyətinə diqqət çəkən komitə sədri qayıdış prosesi çərçivəsində işğaldan azad olunan ərazilərə köçürülən əhalinin adaptasiya və məşğulluğunun təmin edilməsi məqsədilə genişmiqyaslı işlərin və layihələrin həyata keçirildiyi barədə məlumat verib.
Mormon kilsəsinin yüksək rütbəli nümayəndəsi Cek Gerard kilsənin uşaq, qadın və ailə məsələləri ilə bağlı beynəlxalq təşkilatlarla əməkdaşlığına diqqət çəkib, müvafiq sahədə Komitə ilə birgə fəaliyyətə maraqlı olduğunu diqqətə çatdırıb.
C.Gerard kilsənin işğaldan azad olunmuş ərazilərin minalardan təmizləməsi prosesində, eləcə də sülh quruculuğu işində yaxından iştirak etdiklərini vurğulayıb.
Sonra çıxış edən Stirlinq Fondunun prezidenti Mayls Hansen Fondun müxtəlif təşkilatlarla əməkdaşlıq çərçivəsində 42 ölkədə fəaliyyət göstərək həyata keçirdiyi işlərdən danışıb, Dövlət Komitəsi ilə müvafiq sahədə əməkdaşlığın inkişaf perspektivlərinə toxunub.
Görüşdə qarşılıqlı maraq doğuran məsələlərlə bağlı ətraflı fikir mübadiləsi aparılıb, mümkün əməkdaşlıq imkanları müzakirə edilib.
jpg_1746828813.jpg)
