Hələ qədim dövrlərdə cıdır yarışları, at üstündə güləşmə, qılıncsallama, yambaqapma, çovqan buzqaşı kimi idman yarışları türkdilli xalqlar arasında geniş yayılmışdı.

Komanda oyun növü olan çovqan yarışları eramızın birinci minilliyinin ortalarında formalaşıb, yüz illər ərzində Azəbaycanda, Orta Asiyada, İranda, Türkiyədə, İraqda və qonşu ölkələrdə məşhur olub. Mənbələr XII əsrdə islam dünyasının mədəni mərkəzlərindən olan Bağdadda Orta Şərq ölkələrinin atçaparları arasında tarixdə ilk beynəlxalq çovqan yarışlarının keçirildiyini göstərir. Çovqan yarışlarının Azərbaycanda çox qədimdən məşhur olduğu faktlarla təsdiqlənib. Örənqalada aparılmış arxeoloji qazıntılar zamanı tapılan şirli qab üzərində çovqan oyununun təsvir edildiyi rəsm bu oyunun IX əsrdə Beyləqan şəhərində yayıldığını əyani sübut edir. Dahi Nizaminin Xosrov və Şirin əsərindən və Dədə Qorqud boylarından da  məlum olur ki, Azərbaycanda çovqanın tarixi hətta VI-VII əsrlərə, bəlkə ondan da qabaqlara gedib çıxır. Çovqanın qədim Azərbaycan oyunu olmasını sübut edən faktlardan biri də Azərbaycan miniatürlərində bu oyunun dönə-dönə təsvir edilməsi, yazılı mənbələrdə onun keçirilmə qaydaları haqqında məlumatların verilməsidir. Qarabağ atları üzərində oynanılan Azərbaycanın milli çovqan oyunu UNESCO-nun qeyri-maddi mədəni irs siyahısına daxil edilib.

Şərqdə təşəkkül tapmış başqa idman növləri kimi, çovqan oyunu da Azərbaycandan dünyanın müxtəlif regionlarına yayılıb. Məhz ingilislərin təşəbbüsü ilə bu oyun polo adı altında ilk dəfə 1900-cü ildə Parisdə keçirilən II Olimpiya oyunlarının proqramına daxil edilib. Polo adının yaranması XIII-XIV əsrlərdə yaşamış italyan səyyah Marko Polonun adı ilə bağlıdır. Azərbaycana səfər edən Polo insanların at üzərində oynadıqları bu oyunu görür və ölkəsinə qayıtdıqdan sonra oyunu öz soyadı ilə adlandırır.