Eyni məqsədə xidmət edən adamların bir araya gəlməsi dövlət proqramının icrası üçün xüsusi əhəmiyyətə malikdir
Artıq bir neçə gündür ki, Prezident İlham Əliyevin 25 may 2026-cı il tarixli sərəncamı ilə təsdiq olunmuş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahəsinin inkişafına dair 2026-2030-cu illər üçün Dövlət Proqramı"nın icrası ilə əlaqədar bölgələrdə müşavirələr keçirilir. Xəbər verdiyimiz kimi, Qax rayonunda da Balakən, Qax, Qəbələ, Oğuz, Şəki və Zaqatala rayonlarından olan fermer və sahibkarların iştirakı ilə belə tədbir keçirilib.
Müşavirəni Azərbaycan Respublikası Prezidentinin köməkçisi - Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov açaraq dövlət proqramının uğurla həyata keçirilməsi üçün qarşıda duran vəzifələrdən danışıb. Kənd təsərrüfatı nazirinin müavini Zaur Əliyev isə aqrar sahənin inkişafı istiqamətində qarşıda duran əsas prioritetlər və dövlət proqramında nəzərdə tutulan hədəflər barədə müşavirə iştirakçılarına məlumat verib. Azərbaycan Dövlət Su Ehtiyatları Agentliyinin sədrinin birinci müavini Xəyyam Məmmədov çıxışında dövlət proqramının kənd təsərrüfatının inkişafında çox mühüm bir mərhələ olacağından və bu istiqamətdə qarşıda duran vəzifələrdən bəhs edib. Şəki Şəhər İcra Hakimiyyətinin başçısı Elxan Usubov isə çıxışında kənd təsərrüfatının dinamik inkişafının regionların sosial-iqtisadi yüksəlişinə əlavə təkan verəcəyini bildirib.
Müşavirədə çıxış edən fermerlər və sahibkarlardan Oğuz rayonundakı "Eden Agro" MMC-nin rəhbəri İbrahim Mehdiyev, Şəkidəki "Aqroinkişaf 2017" MMC-nin nümayəndəsi Nicat Əliyev, Zaqataladakı "Aqrarco" MMC-nin rəhbəri Vüqar Muhumayev, Balakəndəki "Balakən Toxum" MMC-nin rəhbəri Serhan Keltere, Qax rayonundakı "Tam Aqro" MMC-nin rəhbəri Tamerlan Musayev və "Ulu Aqro" MMC-nin rəhbəri Vüqar Xəlilov gələcəkdə həyata keçirəcəkləri layihələr barədə müşavirə iştirakçılarına ətraflı məlumat veriblər, dövlət proqramının əhəmiyyətini qeyd ediblər.
Müşavirə başa çatdıqdan sonra kənd təsərrüfatı nazirinin müavini Zaur Əliyev mətbuata müsahibəsində bildirib ki, "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" kənd təsərrüfatının inkişafı üçün əlverişli zəmin yaradan əsas sənəddir: "Bu sənəd Prezident İlham Əliyevin tapşırıqlarına uyğun olaraq hazırlanmışdır. Sənəd özündə sektorun əsas hədəflərini və bu hədəflərə xidmət edəcək tədbirlərin müvafiq dövlət dəstək mexanizmlərini əhatə edir. Sənədin səciyyəvi xüsusiyyəti həm istehsal, həm emal, həm də dəyər zəncirinin digər halqaları üzrə əsas istiqamətlərə yönləmiş tədbirləri və dəstək mexanizmini özündə əks etdirməsindədir. Burada hədəf istehsal artımına nail olmaqdır. İstehsal artımına nail olmaq üçün isə daha çox intensivləşmə usullarından istifadə etmək lazımdır".
Azərbaycan Dövlət Su Ehtiyatları Agentliyi sədrinin birinci müavini Xəyyam Məmmədov da mətbuata açıqlamasında görüləcək işlərdən söz açdı. Dedi ki, əsas hədəf, əsas məqsəd kənd təsərrüfatını dayanıqlı və davamlı model üzərində qurmaqdır: "Belə müşavirələrin keçirilməsi çox önəmlidir. Çünki eyni məqsədə xidmət edən adamlar bir yerə toplaşırlar, başqa sözlə, həm dövlət qurumlarının nümayəndələri, həm fermerlər, həm də sahibkarlar bir araya gəlirlər. Bu da bizə ünsiyyət yaratmaq, dialoq qurmaq, həlli vacib olan hansısa bir məsələni müzakirə etmək üçün əlverişli imkan yaradır. Dövlət proqramının uğurla həyata keçirilməsində belə müşavirələrin çox böyük əhəmiyyəti var".
Vahid MƏHƏRRƏMOV,
"Azərbaycan"
jpg_1782342828.jpg)
jpg_1782325624.jpg)
