"Parlament diplomatiyası milli maraqların dünyaya çatdırılmasında ən etibarlı vasitələrdən biridir"
Müasir beynəlxalq münasibətlər sistemində dövlətlərin xarici siyasət strategiyasının tərkib hissəsi kimi parlament diplomatiyası artıq, sadəcə, təmsilçilik funksiyası daşımır, o, milli maraqların qlobal müstəvidə müdafiəsi üçün çevik və effektiv bir alətə çevrilmişdir. Prezident İlham Əliyevin həyata keçirdiyi çoxşaxəli və müstəqil dövlətçilik xətti, siyasi sabitlik və Ulu Öndərin milli parlamentarizm fəlsəfəsi ölkəmizin parlament diplomatiyası üçün yeni, fundamental keyfiyyət mərhələsini müəyyən etmişdir. Milli Məclisin deputatı Bəhruz MƏHƏRRƏMOV qəzetimizə açıqlamasında deyib ki, Azərbaycanın son üç onillikdə əldə etdiyi tarixi nailiyyətlərin, xüsusilə işğaldan azad olunmuş ərazilərimizdə həyata keçirilən genişmiqyaslı bərpa-quruculuq işlərinin əsasında dayanan ən mühüm amil məhz Ulu Öndər Heydər Əliyev siyasi kursu əsasında Prezident İlham Əliyevin yaratdığı sarsılmaz siyasi sabitlikdir: "Prezident
İlham Əliyevin dövlət idarəçiliyinə dərin strateji yanaşması parlamentarizm ənənələrinin möhkəmlənməsinə, qanunverici orqanın dövlətçilik maraqlarının təminatçısı qismində çıxış etməsinə yeni təkan verib. Dövlət başçısının və Birinci vitse-prezident Mehriban xanım Əliyevanın özlərinin zəngin parlament təcrübəsi - həm Milli Məclis, həm də beynəlxalq parlament qurumları çərçivəsindəki fəaliyyətləri bu gün Azərbaycan diplomatiyasının "parlament" qanadı üçün müsbət impulsdur. Bu təcrübə institusional yaddaşın və dövlətçilik ənənələrinin formalaşmasında həlledici rol oynayıb".
Deputat qeyd edib ki, Milli Məclisin Sədri Sahibə Qafarovanın rəhbərliyi dövründə Prezident İlham Əliyevin parlamentarizm vizyonu rəhbər tutulmaqla parlament diplomatiyası institusional və hüquqi baxımdan daha çevik xarakter alıb: "Bu dövr ilk növbədə Azərbaycanın beynəlxalq təşkilatlarda öz mövqeyini qətiyyətlə müdafiə etməsi ilə səciyyələnir. Parlament rəhbərliyi dövlət başçısının direktivləri əsasında islam dünyasının həmrəyliyi, dini tolerantlıq və mədəniyyətlərarası dialoq prinsiplərinə sadiqliyi beynəlxalq platformaların gündəliyinə Azərbaycanın milli maraqlarını uğurla inteqrasiya edib. Bu, sadəcə, ritorik bir dəstək deyil, beynəlxalq hüququn norma və prinsiplərinə, xüsusilə də dövlətlərin suverenliyi və ərazi bütövlüyünün toxunulmazlığı prinsipinə söykənən diplomatik fəaliyyətdir".
B.Məhərrəmov bildirib ki, Bakının İslam Əməkdaşlıq Təşkilatı Parlament İttifaqı Konfransının 20-ci sessiyasına evsahibliyi etməsi təsadüfi deyil və bu, Azərbaycanın islam dünyasındakı artan nüfuzunun növbəti təsdiqidir: "40-dan çox ölkənin parlament nümayəndə heyətinin, 10-dan çox spikerin və nüfuzlu beynəlxalq təşkilatların bir araya gəldiyi bu tədbir bir neçə mühüm strateji hədəfə xidmət edir. Heç şübhəsiz ki, Bakının islam dünyasının parlamentarizm mərkəzi kimi çıxış etməsi ilk növbədə qlobal həmrəyliyin institusionallaşması yolunda mühüm mərhələdir. Azərbaycanın təşəbbüsü ilə Bakıda keçirilən bu sessiya "Parlament əməkdaşlığı vasitəsilə İslam Əməkdaşlıq Təşkilatına üzv olan dövlətlərdə dayanıqlı və inklüziv iqtisadi inkişafın təşviqi" kimi qlobal gündəliyi müəyyən edir. Bu, islam dünyasının qarşılaşdığı müharibələr, humanitar böhranlar və iqtisadi çağırışlar qarşısında vahid hüquqi və siyasi platformanın yaradılması deməkdir. Daha dəqiq desək, Azərbaycanın evsahibliyi etdiyi bu konfrans, sadəcə, bir toplantı deyil, həm də islam ölkələri arasında parlament diplomatiyası sahəsində yeni bir "Bakı formatı"nın formalaşmasıdır. Beynəlxalq hüquqi legitimlik baxımdan təhlil etdikdə isə konfrans çərçivəsində keçirilən müxtəlif komitə iclasları Azərbaycanın beynəlxalq hüquq müstəvisindəki tezislərinin geniş coğrafiyada dəstəklənməsi üçün mükəmməl zəmin, habelə beynəlxalq hüququn aliliyi və Birləşmiş Millətlər Təşkilatının Nizamnaməsinə parlament töhfəsidir".
Milli Məclisin üzvü vurğulayıb ki, Bakı konfransı mahiyyət etibarilə Birləşmiş Millətlər Təşkilatının Nizamnaməsinin ruhuna və məqsədlərinə, eləcə də beynəlxalq hüququn imperativ normalarına sadiqliyin qlobal tribunadan ifadəsidir: "Konfransın gündəliyindəki məsələlərin də dövlətlərin suveren bərabərliyi, güc tətbiq etməmək və mübahisələrin dinc yolla həlli kimi təməl prinsiplərin parlamentarizm vasitəsilə bərqərar olunmasını nəzərdə tutması Bakının regional təhlükəsizlik arxitekturasındakı rolunu önəmli dərəcədə möhkəmləndirir. Belə ki, Azərbaycanın təşəbbüsü ilə konfransda müzakirə edilən məsələlər BMT-nin Nizamnaməsinin 1-ci maddəsində təsbit olunmuş beynəlxalq sülh və təhlükəsizliyin qorunması məqsədilə bilavasitə uzlaşır. Parlamentlər səviyyəsində dialoqun təşviqi Azərbaycan Prezidentinin təşəbbüskarı və mütləq memarı kimi çıxış etdiyi yeni sülh konfiqurasiyasının ruhuna uyğun olaraq dövlətlərarası münasibətlərdə yaranan gərginliklərin siyasi və hüquqi müstəvidə, qarşılıqlı etimad şəraitində həllinə yol açır".
B.Məhərrəmov deyib ki, İslam Əməkdaşlıq Təşkilatının üzvü olan dövlətlərin Parlament İttifaqı Konfransı parlamentarilərin qətnamələr vasitəsilə beynəlxalq hüquqi normalara dəstək verməsi üçün ən geniş platformalardan biridir: "Azərbaycanın hərbi-siyasi zəfərləri ilə yeni geosiyasi şəraitdə formalaşan təcrübəsi göstərir ki, işğala və separatizmə son qoyulması, beynəlxalq hüququn aliliyinin təmin edilməsi istiqamətində qanunverici orqanlar birgə mövqe nümayiş etdirməlidirlər. İnklüziv inkişaf və beynəlxalq əməkdaşlığa böyük önəm verən Azərbaycan hesab edir ki, BMT-nin Nizamnaməsində göstərilən dövlətlər arasında dostluq münasibətlərinin inkişafı məhz iqtisadi, sosial və mədəni problemlərin həllində beynəlxalq əməkdaşlıqla mümkündür. Bakı konfransı islam dünyasını bu qlobal missiyaya səfərbər edərək BMT-nin Dayanıqlı İnkişaf Məqsədləri ilə parlamentarizm arasında körpü yaradır".
Deputatın fikrincə, Azərbaycanın parlament diplomatiyası Prezident İlham Əliyevin müəyyən etdiyi strateji kursun icrasında məsuliyyətli, proaktiv və hüquqi əsaslara söykənən bir missiyanı yerinə yetirməklə Bakının qlobal təhlükəsizlik və rifah naminə səyləri üçün yeni bir dövr başladır: "İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci sessiyasının Bakıda keçirilməsi bir daha təsdiq edir ki, parlamentarizm ölkəmizin dövlət maraqlarını, milli dəyərlərini və qlobal sülhə olan töhfəsini beynəlxalq tribunaların ən yüksək kürsülərindən dünyaya çatdırmaq üçün ən etibarlı vasitələrdən birinə, siyasi sabitlik, peşəkar idarəetmə və dövlətçilik təcrübəsi isə Azərbaycanı dünyada söz sahibinə çevirməkdədir".
Əsmər QARDAŞXANOVA,
"Azərbaycan"
