Siyasilər vəziyyətdən çıxış yolunu prezident və parlament seçkilərinin keçirilməsində görürlər

Liviyada baş vermiş kütləvi etiraz aksiyalarından sonra Prezident Şurasının sədri Məhəmməd Yunis əl-Mənfi və ABŞ-ın Trablisdəki səfiri Riçard Norland ölkədə sabitliyin yaradılmasına diqqət çəkiblər. Prezident Şurasının məlumatına görə, əl-Mənfi və Norland telefon danışığı zamanı ölkədəki siyasi dalandan çıxmaq və seçkilərin tez bir zamanda təşkili üçün mövcud vəziyyətdə sakitliyin qorunmasının vacibliyini qeyd ediblər.

Etirazçılar icra hakimiyyəti orqanlarının ləğv edilməsini tələb edirlər

ABŞ-ın Trablisdəki səfirliyi Liviyada ümummilli qeyri-sabitliyə səbəb olan siyasi, iqtisadi və maliyyə böhranı ilə bağlı dərin narahatlığını açıqlayıb.

Səfirlikdən bildiriblər ki, ölkədə seçkilərə və siyasi sabitliyə aparan yol tərəflər arasında dialoq və barışıqdan keçir.

Xatırladaq ki, bu günlərdə ölkənin Trablis, Tobruk, Siirt, Derna və Benqazi şəhərlərində etiraz aksiyaları keçirilib. Benqazidə etirazçılar dükanları və avtomobil təkərlərini yandırıblar. Tobrukda Nümayəndələr Palatasının binasına basqın edən fəallar girişdə yanğın törədiblər.

Aksiya iştirakçıları elektrik enerjisi, neft məhsulları ilə bağlı problemin tezliklə həllini və çörəyin qiymətinin aşağı salınmasını tələb ediblər. Etirazçılar qanunvericilik və icra hakimiyyəti orqanlarının ləğvini, ölkədə fövqəladə vəziyyət elan olunmasını və tez bir zamanda seçkilərin keçirilməsini tələb ediblər.

Liviyada  seçkilər siyasi dalana dirənib

BMT-nin himayəsi altında Liviyada Siyasi Dialoq Forumunun 2020-ci ilin noyabrında baş tutan iclaslarında ölkədə prezident və parlament seçkilərinin 2021-ci il dekabrın 24-də keçirilməsi qərara alınıb, lakin təyin olunmuş vaxtda seçkilərin keçirilməsi mümkün olmayıb.

Tobruk Nümayəndələr Palatası fevralın 10-da keçirdiyi iclasda ölkənin qərbini təmsil edən deputatların əksəriyyətinin iştirak etməməsinə baxmayaraq, hazırkı milli birlik hökumətinin mandatının dekabrın 24-də bitdiyini əsas gətirərək, Fəthi Başağanı Baş nazir seçib.

Liviya Milli Birlik Hökumətinin Baş naziri Əbdülhəmid Dibeybe Nümayəndələr Palatasını Cenevrə razılaşmasında nəzərdə tutulan "yol xəritəsindən" geri çəkilməkdə ittiham edərək, üzərinə düşən vəzifələri yerinə yetirməyə davam edəcəyini və postunu yalnız xalq tərəfindən seçilmiş hökumətə təhvil verəcəyini bildirib.

Dibeybe həm də ölkədəki etirazlara dəstək ifadə edib: "Mən ölkədə keçirilən etiraz aksiyalarını dəstəkləyirəm. Ölkədə hökumətin başçılıq etdiyi bütün birləşmələr getməlidir. Amma bu, yalnız seçki yolu ilə mümkündür. Liviya xalqı neft yataqlarını kimin bağladığından xəbərdardır. Bunun nəticəsində dövlət büdcəsinə ziyan vurulub və əhalinin həyat şəraiti pisləşib".

Əl-Mənfi Misir Prezidenti ilə danışıqlar aparıb

Dünən Liviya Prezident Şurasının sədri Məhəmməd Yunis əl-Mənfi Misir Prezidenti Əbdülfəttah əs-Sisi ilə telefon danışığında ölkəsindəki siyasi vəziyyəti müzakirə ediblər. "Anadolu" agentliyinin xəbərinə görə, Misir lideri əl-Mənfini əmin edib ki, Qahirə Liviyada milli barışığa nail olmaq üçün hər cür səy göstərəcək.

Əl-Mənfi və əs-Sisi Liviyada siyasi böhrandan yeganə çıxış yolunu seçkilərin keçirilməsində görüblər.

Misir Prezidentinin Mətbuat xidmətinin yaydığı  məlumatda deyilir ki, Əbdülfəttah əs-Sisi telefon danışığı zamanı həmsöhbətini əmin edib ki, Qahirə Liviyada milli barışığa nail olmaq üçün əlindən gələni edəcək.

Əl-Mənfi və əs-Sisi siyasi razılaşmaların yerinə yetirilməsi üçün xarici qüvvələrin ölkədən çıxarılmasının zəruriliyini də qeyd ediblər.

Liviya Prezident Şurasının Mətbuat xidməti Misir lideri Əbdülfəttah əs-Sisinin Liviyanın birliyinə diqqət çəkdiyini və xarici qüvvələri dialoqa çağırdığını bildirib.

Rizvan CƏFƏROV,

"Azərbaycan"