Regionların sosial-iqtisadi inkişafı ilə bağlı qəbul edilmiş dövlət proqramlarında qarşıya qoyulan vəzifələr Lerikdə də uğurla icra edilmişdir. Rayonda müasir infrastruktur yaradılmış, təhsil, səhiyyə, mədəniyyət obyektləri inşa edilmiş, sahibkarlığın inkişafı üçün münbit şərait formalaşmış, yeni yollar salınmış, qaz və su xətləri çəkilmiş, elektrik təsərrüfatı yenilənmişdir.
Ən əsası yeni iş yerləri açılmışdır. Təkcə bu ilin birinci yarısında 670-i daimi, 512-si müvəqqəti olmaqla 1182 iş yeri yaradılmışdır. Ümumilikdə isə 2003-2024-cü illər və 2025-ci ilin birinci yarım ili ərzində 21,7 min yeni iş yeri açılmışdır ki, onların da 40 faizindən çoxu daimidir.
Lerikdə həmçinin kənd təsərrüfatı sahəsində məhsul istehsalı artmışdır. Əldə etdiyimiz son məlumata görə, rayon üzrə yeni cins mal-qaranın yetişdirilməsi ilə əlaqədar 437 baş heyvanda süni mayalanma aparılmış, 373 baş sağlam buzov doğulmuşdur. Qaramalın sayı 37,5 min, davarınkı 83 min baş olmuşdur. Amma etiraf edək ki, qoyun və keçilərin sayında kəskin azalma müşahidə edilmişdir ki, bu da rayonun qoyunçuluq təsərrüfatlarına təhkim olunmuş qış otlaq sahələrinin geri alınması ilə bağlıdır. Ona görə də süd istehsalı da əvvəlki illə müqayisədə geriləmişdir.
Keçən ilin payızında cari ilin məhsulu üçün rayon üzrə 3 min 682 hektarda payızlıq taxıl bitkiləri əkilmişdir. Əkin sahəsi əvvəlki ilə nisbətən 285 hektar artmışdır. Yeri gəlmişkən qeyd edək ki, rayon üzrə taxıl əkinlərinin 70 faizi relyefi çətin olan dağlıq ərazilərdə yerləşir. Bu səbəbdən artıq ikinci ildir ki, rayonda taxıl biçini müasir dağ kombaynları ilə aparılır. Qılqılov kəndində taxıl biçininə yeni nəsil dağ kombaynı cəlb edilmişdir. Bu hesaba arpa və buğda sahələrinin məhsuldarlığı əvvəlki illərlə müqayisədə çoxalmışdır.
Lerikdən söz açıb arıçılığı qeyd etməmək düz olmazdı. Xüsusən də ovaxtkı rayon üzrə il ərzində orta hesabla 120 min tondan çox ekoloji cəhətdən təmiz bal istehsal edilir. Hazırda balın sənaye üsulu ilə qablaşdırılması istiqamətində tədbirlər görülür. Bu da Lerik balının ixracı üçün vacib şərtdir.
Lerikdə 106 ümumtəhsil məktəbi, 13 uşaq bağçası var. Təkcə 10 il - 2003-2023-cü illər ərzində rayonda 81 məktəb inşa edilmiş, 9 məktəb binası əsaslı təmir edilmişdir. Artıq rayon üzrə təhsil müəssisələrinin 86,5 faizi yeni inşa edilmiş və ya əsaslı təmir olunmuş binalarda yerləşir. Qarşıdakı illərdə Soru, Lüləkəran, Vistən, Murya kənd məktəblərinin tikintisi, Blaband və Şingədulan kənd məktəblərinin əsaslı təmiri nəzərdə tutulmuşdur.
Rayon üzrə 162 yaşayış məntəqəsi var və onların 33-də yay aylarında su qıtlığı yaranır. Çünki isti havalarda bulaqların suyu azalır. Odur ki, Buruq, Murya, Barzavu, Soru, Bradi, Siyov, Nuravud, Blaband, Tikəband, Pirəsora, Kələxan, Qosmalian kəndlərində artezian quyularının qazılması nəzərdə tutulmuşdur. Sudan söz düşmüşkən onu da qeyd edək ki, Heydər Əliyev Fondunun sifarişi ilə Piran kəndinə əhalinin içməli su təminatının yaxşılaşdırılması üçün 3,5 kilometrlik məsafədən su xətti çəkilmişdir. Kənd camaatının su ilə təmin edilməsinə çox vaxt qalmamışdır, tikintidə son işlər gedir.
Prezidentin Lerikə ən böyük hədiyyələrindən biri rayona mavi yanacağın verilməsidir. Bu gün rayonun 66 yaşayış məntəqəsi tam qazlaşdırılmışdır. Magistral qaz xətti üzərində yerləşən, Ordahal qazpaylayıcı məntəqəsinə yaxın məsafədə olan Kirəvud, Boykəndil, Gürdəsər, Laman, Şingədulan, Lərmərud və daşıyıcı xətt üzərində olan Şonaçola, Qələsər, Hoveri, Divağac kəndlərinin qazlaşdırılması üçün də sənədlər hazırlanmışdır.
İşığa gəldikdə, "Azərişıq" ASC tərəfindən Çayrud, Lüləkəran və Orand kəndlərində 10/04 kilovatlıq elektrik dirəklərinin bir hissəsi yeniləri ilə əvəzlənmiş, xətlər SİP kabellə yenilənmişdir. Bundan əlavə, Zərigüməco və Siyov yarımstansiyasının tikintisi başa çatdırılmış, Zenoni kəndində yeni yarımstansiyanın tikintisinin həyata keçirilməsi üçün texniki işlərə başlanmışdır. 96 kilometrlik Noda, Nüvədi, Vizəzəmin, Əliabad inzibati ərazi dairələrini qidalandıran 10 kilovatlıq elektrik hava xətləri isə yenidən çəkilir.
Hazırda rayonun 110 yaşayış məntəqəsində Rəqəmsal İnkişaf və Nəqliyyat Nazirliyinin sifarişi ilə GPON layihəsinin icrasına başlanmışdır. Növbəti aylarda Lerikin telefon və internet olmayan bütün kəndlərinin tam GPON texnologiyası ilə telefon-internet xidmətinə qoşulması həyata keçiriləcək.
Seyran CAVADOV,
"Azərbaycan"
jpg_1765800994.jpg)
jpg_1765800788.jpg)
