Neftçala Rayon İcra Hakimiyyətinin dəstəyi, Gənclər və İdman Nazirliyinin təşəbbüsü və təşkilatçılığı ilə Neftçala Olimpiya İdman Kompleksində "Könüllülük Akademiyası" layihəsi çərçivəsində düşərgə təşkil olunub. Düşərgədə ölkənin müxtəlif regionlarında fəaliyyət göstərən 15 "Gənclər evi" sosial xidmət müəssisəsinin könüllülərindən ibarət 50 nəfərlik heyət iştirak edib.
Bu günlər iştirakçılar rayon rəhbərliyi ilə görüşmüşlər. RİH-in başçısı M.Seyidov çıxış edərək gənclərin cəmiyyətin inkişafında aparıcı qüvvə olduğunu vurğulayıb. Bildirib ki, gənclərə göstərilən dövlət dəstəyi Ümummilli Lider Heydər Əliyev tərəfindən əsası qoyulan dövlət və gənclər siyasətinin bu gün Prezident İlham Əliyev tərəfindən uğurla davam etdirildiyinin göstəricisidir: "Dövlət başçısının rəhbərliyi ilə ölkədə gənclərin təhsili, sosial müdafiəsi, məşğulluğu, ictimai fəallığının artırılması, həmçinin könüllülük hərəkatının genişləndirilməsi istiqamətində ardıcıl və məqsədyönlü tədbirlər həyata keçirilir". RİH-in başçısı qeyd edib ki, Birinci vitse-prezident Mehriban xanım Əliyevanın gənclərin hərtərəfli inkişafına, onların intellektual, mənəvi potensialının artırılmasına göstərdiyi diqqət və qayğı xüsusi əhəmiyyət daşıyır. M.Seyidov bildirib ki, könüllülük fəaliyyəti gənclərdə məsuliyyət, vətənpərvərlik, liderlik, sosial həmrəylik, ünsiyyət və komanda ilə işləmək bacarıqlarının formalaşmasında mühüm rol oynayır. O, müasir dövrdə gənclərin sosial aktivliyinin artırılmasının, kommunikasiya bacarıqlarının inkişaf etdirilməsinin və onların vaxtdan səmərəli istifadə etmələrinin xüsusi əhəmiyyəti olduğunu diqqətə çatdırıb, gənclərin süni intellekt və rəqəmsal texnologiyalardan düzgün, məqsədyönlü istifadə bacarıqlarının formalaşdırılmasının, onların rəqəmsal savadlılığının artırılmasının önəmindən bəhs edib, həmçinin peşə təhsilinin inkişafının gələcək əmək bazarına uyğun kadr hazırlığında mühüm rol oynadığını vurğulayıb. Gənclərin xaricdə təhsil dövlət proqramları çərçivəsində bilik və bacarıqlarını artırmalarının ölkənin insan kapitalının gücləndirilməsinə xidmət etdiyini deyən natiq dayanıqlı inkişaf məqsədlərinin həyata keçirilməsində gənclərin fəal iştirakının vacibliyini qeyd edib, onların cəmiyyəti düşündürən sosial, iqtisadi və ictimai məsələlərə həssas yanaşmalarını yüksək qiymətləndirib. Neftçalada da gənclərin təşəbbüslərinin daim dəstəkləndiyini diqqətə çatdıran M.Seyidov bu kimi düşərgə və layihələrin gənclərin bilik, bacarıq və dünyagörüşünün inkişafına mühüm töhfə verdiyini bildirib.
RİH-in başçısı "Könüllülük Akademiyası" layihəsinin Neftçalada təşkil olunduğu üçün Gənclər və İdman Nazirliyinə, eləcə də göstərdikləri fəallığa görə gənclərə təşəkkür edib, onlara gələcək fəaliyyətlərində uğurlar arzulayıb.
Gənclər və İdman Nazirliyinin sektor müdiri Kənan Əliyev çıxış edərək "Könüllülük Akademiyası" düşərgəsinin məqsəd və vəzifələri, könüllülərin inkişafına yönəlmiş təlim proqramları və gələcək perspektivlər barədə məlumat verib.
Görüşdə könüllüləri maraqlandıran suallar cavablandırılıb, fikir və təkliflər səsləndirilib, qarşılıqlı müzakirələr aparılıb, sonda isə xatirə fotosu çəkilib.
Seyran CAVADOV,
"Azərbaycan"
19 (1)jpg_1771885865.jpg)
jpg_1772216033.jpg)
