Milli Məclisin iqtisadi siyasət sahəsində hökumətlə işgüzar və konstruktiv əməkdaşlığa önəm verməsi və dövlət büdcəsinə dair məsələlərə xüsusi diqqət yetirməsi vacib əhəmiyyət kəsb edir. Dövlət büdcəsinin icrası hər kəsin ortaq məsuliyyətidir.
AZƏRTAC xəbər verir ki, bunu parlamentin İqtisadi siyasət, sənaye və sahibkarlıq komitəsinin sədri Azər Əmiraslanov Azərbaycan Respublikasının 2024-cü il dövlət büdcəsinin icrasına dair qanun layihəsinin müzakirəsi zamanı çıxışında bildirib.
Komitə sədrinin sözlərinə görə, “2024-cü ilin dövlət büdcəsinin icrası haqqında” qanun layihəsi, ona dair illik hesabat və Hesablama Palatasının rəyi qanunvericiliyə uyğun olaraq vaxtında və lazımi formada Milli Məclisə təqdim olunub.
“Təqdim edilən sənədlər əhatəli, analitik və əməktutumludur. 2024-cü il dövlət büdcəsinin icrası əlverişli makroiqtisadi şəraitdə həyata keçirilib. İqtisadi artım 4,1 faiz, illik inflyasiya 2,2 faiz, tədiyyə balansının müsbət saldosu isə 4,7 milyard dollar təşkil edib. Büdcə gəlirləri və xərclərinin icrası, büdcə kəsiri və dövlət borcunun səviyyəsi müsbət qiymətləndirilib, eyni zamanda, büdcə qaydasına tam riayət olunub. Elə etməliyik ki, büdcə maksimum dərəcədə icra edilsin. Eyni zamanda, maliyyə intizamı daha da yüksək səviyyədə olmalıdır. Şəffaflıq tam şəkildə təmin edilməlidir. Büdcə xərclərinin strukturuna yenidən baxılmalıdır və büdcə vəsaiti qənaətlə xərclənməlidir. İqtisadi artım olmadan, sadəcə büdcə xərcləri hesabına sosial məsələləri həll etmək çətindir. Bizim bütün cari xərclərimiz qeyri-neft gəlirləri hesabına maliyyələşdirilməlidir”, - deyə Azər Əmiraslanov vurğulayıb.
İclasda qeyd olunub ki, 2024-cü ilin dövlət büdcəsi dövlətin əsas funksiyalarının maliyyələşdirilməsi, xüsusilə də müdafiə və təhlükəsizlik, sosial müdafiə və işğaldan azad edilmiş ərazilərin bərpası sahələrində prioritetlərin təmin olunmasında mühüm rol oynayıb.
Komitə sədri əlavə edib ki, büdcə icrası makroiqtisadi sabitlik şəraitində həyata keçirilib. Hesablama Palatasının verdiyi rəy və tövsiyələrin faydalılığı xüsusi vurğulanıb, həmçinin Maliyyə Nazirliyi ilə Hesablama Palatası arasında mövcud olan konstruktiv əməkdaşlığın gələcəkdə daha da dərinləşdirilməsi təklif edilib.
A.Əmiraslanov onu da vurğulayıb ki, büdcə prosesi fasiləsiz və davamlı xarakter daşıyır: “Bu görə də iclas zamanı səsləndirilən təklif və tövsiyələr nəzərdən keçirilməli, hər bir qurumun mandatı və məsuliyyəti nəzərə alınmalıdır. Büdcə dayanıqlığının təmin olunması üçün fiskal yanaşmalarla yanaşı, qeyri-fiskal tədbirlərin də həyata keçirilməsi vacibdir”.
