Azərbaycan Prezidenti İlham Əliyev ədəbiyyatımızın görkəmli nümayəndəsi, şair, maarifçi və pedaqoq Seyid Əzim Şirvaninin yubileyi ilə bağlı "Seyid Əzim Şirvaninin 190 illiyinin qeyd edilməsi haqqında" sərəncam imzalamışdır.
Bununla əlaqədar, Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasına "Kitabxanaya kitab hədiyyə edirik" və "Yaradıcı oxucularımız" layihələri çərçivəsində Seyid Əzim Şirvaninin "Qəzəllər" kitabı təqdim olunub.
Kitabın tərtibçisi kitabxananın fəal oxucusu, şair Ceyhun Möhübbidir. Seyid Əzim Şirvaninin yeni nəşr olunmuş "Qəzəllər"i şairin 190 illiyinə həsr olunub. Kitabda görkəmli maarifçi pedaqoqun bizə gəlib çatan 636 qəzəli və ilk dəfə olaraq qəzəllərə izahlı lüğət də verilmişdir. Qəzəllərin bir çoxu ilk dəfədir ki, latın qrafikası ilə nəşr olunub.
Bundan başqa, M.Ş.Vazeh adına Mərkəzi Kitabxanaya biokimya üzrə fəlsəfə doktoru, şair Tariyel Azərtürkün "Hanki məkandan, hanki zamandan başlanır muğam?" kitabı da hədiyyə olundu.
Güclü məntiqə malik olan fədakar alim əsərini Azərbaycanın, bütövlükdə qədim türk dünyasının tarixini, musiqi mədəniyyətini, etnoqrafiyasını araşdırması nəticəsində yazıb. Araşdırmalarda müəllif sübut edib ki, mixi yazılarını türklər yaradıb.
Müəllifin çoxillik və peşəkar araşdırmaları nəticəsində yazılan kitab 2010-2016-cı illərdə ABŞ-nin Sietl şəhərində ərsəyə gəlib. 2022-ci ildə isə təkrar işlənərək yenidən çapa imzalanıb. Müəllif gil üzərindəki mixi yazılarından əcdadlarımızın şeir, qəzəl, musiqi, rəqs, muğam və incəsənətin başqa sahələri haqqında biliklərini, fikirlərini toplayaraq oxuculara təqdim edib. Əsər şumerlərin (qədim türklərin) musiqi dünyasına həsr edilmişdir. Müəllif mixi yazılarının araşdırılması nəticəsində Azərbaycan-türk musiqi incisi sayılan muğamın mənşəyinin dərin köklərinə aid nadir faktları aşkara çıxarmışdır. Kitabda muğamların adları, muğamın növləri, musiqi alətləri və terminləri haqqında, onların Azərbaycan-türk mədəniyyətinə aid olduğuna dair inandırıcı, danılmaz dəlillər gətirilmişdir. Əsərdə "Səmayi-Şəms", "Mahur-Hindi", "Bayatı-Qacar" və başqa muğamlarımız haqqında maraqlı və dəyərli fikirlər var.
"Hanki məkandan, hanki zamandan başlanır muğam?" kitabı qədim musiqi tariximizin və musiqi mədəniyyətimizin xəzinəsinə daxil olan dəyərli incilərdən biridir. İnanırıq ki, kitabxanaya hədiyyə olunan kitablar oxucular tərəfindən maraqla qarşılanacaq.
Vahid MƏHƏRRƏMOV,
"Azərbaycan"
