Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin idarəetməsində olan “Keşikçidağ” Dövlət Tarix-Mədəniyyət Qoruğunun ərazisində “Keşikçidağda elmi-arxeoloji qazıntılar və Yay məktəbi–6” layihəsi davam edir.
AZƏRTAC-ın bölgə müxbiri xəbər verir ki, layihə çərçivəsində Bakıdan gələn qrup üçün qoruq ərazisinə elmi-praktiki tur təşkil olunub. İştirakçılar Keşikçidağ Kurqanlar Vadisində aparılan arxeoloji tədqiqatlarla tanış olub, qazıntı prosesini izləyiblər.
AMEA Arxeologiya və Antropologiya İnstitutunun aparıcı elmi işçisi, tarix üzrə fəlsəfə doktoru Vaqif Əsədovun rəhbərliyi ilə Sarıyoxuş dərəsindəki 4 saylı kurqanda aparılan qazıntı işləri barədə ziyarətçilərə məlumat verilib. Daha sonra iştirakçılar üçün arxeoloji qazıntı metodikası, maddi-mədəniyyət nümunələrinin aşkar edilməsi, sənədləşdirilməsi və ilkin elmi qiymətləndirilməsi ilə bağlı master-klass keçirilib.
Qazıntı zamanı Orta Tunc dövründən Son Tunc dövrünə keçid mərhələsinə aid artefaktlar aşkarlanıb. Tapıntılar arasında tunc xəncər, qırmızı-qəhvəyi çaxmaqdaşından hazırlanmış 10 ox ucluğu, 2 obsidian ox ucluğu və hər iki tərəfi deşik olan daş əsa başlığı var.
Mütəxəssislərin sözlərinə görə, daş əsa başlığı həmin dövrdə sahibinin yüksək sosial statusunun göstəricisi hesab olunur. Əşyanın hər iki tərəfindəki deşiklər onun dəstəyə möhkəm bərkidilməsi üçün nəzərdə tutulub.
Elmi-praktiki turun iştirakçıları daha sonra Keşikçidağ mağaralar kompleksinə baş çəkiblər. Qonaqlara mağaraların tarixi-mədəni əhəmiyyəti, memarlıq xüsusiyyətləri və burada qorunan freska nümunələri barədə məlumat verilib.
