Kəndlinin çörəyi torpaqdan çıxır

Əyilməsə, əli çatmaz

Valideynlərimdən eşitmişdim ki, torpaq da canlıdır, qayğıkeşliyi sevir. Torpağa əyilən hər zaman ucalar. Mənim öz həyatım bu sözlərin nə qədər doğru olduğunu sübut edir. 
İlk vaxtlar fermer kimi fəaliyyətə başlayanda çətinliklərim çox oldu. Lakin qarşıma məqsəd qoydum və yorulmaq bilmədən çalışdım. Hazırda Tərtərin İsmayılbəyli kəndində 80 hektar sahədə toxumluq taxıl becərirəm. Nailiyyətlərimiz yüksəkdir. Təkcə ötən il hər hektardan  65 sentner birinci, 55 sentner 2-ci reproduksiyalı taxıl götürmüşük. Bu, orta rəqəmdir, halbuki ayrı-ayrı sahələrdə məhsuldarlıq daha yüksək olub. 
Uğurlarımın səbəbi nədir sualına birmənalı belə cavab verərdim: "Dövlətimizin fermerlərə göstərdiyi qayğıkeşlik, yaratdığı şərait". Bu gün toxumluq taxıl becərən fermerlərə dövlət tərəfindən kvota ilə elit toxum verilir. Mən özüm əsasən "Qobustan"  sortu seçirəm. Həm məhsuldardır, həm də becərilməsi zamanı problemlərlə rastlaşmırıq. Texnika sarıdan da çətinliklərimiz yoxdur.  Dövlət aqrolizinq yolu ilə əldə etdiyimiz texnikanın qiymətinin müəyyən hissəsini özü ödəyir. Gübrələr isə pulsuz verilir. Üstəlik, becərdiyimiz məhsula görə subsidiyalar alırıq. Beləcə, bu dəstək hesabına həm rayonumuzun  fermerlərini, həm də ətraf rayonlardan gələnləri yüksək məhsuldar toxumlarla təmin edirik. Və bununla hazırkı dönəmdə - dünyanın ciddi ərzaq qıtlığı ilə üz-üzə qaldığı bir vaxtda üzərimizə düşən vəzifənin məsuliyyətini anlayır və hər bir aqrotexniki tədbiri yüksək səviyyədə həyata keçirərək ölkəmizin taxıl ehtiyatlarının artırılmasına  öz töhfəmizi verməyə çalışırıq. 
Qeyd edim ki, təkrar əkindən istifadə etməyə başlamışıq. Ötən mövsüm biçindən dərhal sonra 40 sentner sahədə qarğıdalı əkdik və hər hektardan xeyli məhsul götürdük. Bu işdə müasir texnologiyadan və texnikadan istifadə etməklə təsərrüfatımızın gəlirlərini xeyli artıra bildik. Cari ildən təkrar əkini 50 hektarda aparmağı qərara almışıq.
Su məsələsinə gəldikdə, taxıl sahələrini əsasən  subartezian quyularının vasitəsilə suvarırıq. 44 günlük Vətən müharibəsində əldə etdiyimiz qələbə nəticəsində hazırda Suqovuşandan arxlarımıza da su gəlir. Bu isə işlərimizi daha yüksək səviyyədə qurmağa kömək edir. 
Taxılçılıqla yanaşı, baramaçılıqla  da məşğul oluruq. 2016-cı ildə 12 hektar sahədə Çindən gətirilmiş çəkil tingləri əkib becərdik. 2017-ci ildə çinlilərin özləri tərəfindən keçirilən monitorinq zamanı işimiz bəyənildi və rayonumuz bu sahədə öndə oldu. Hazırda əlavə kümxana  düzəldirik, çünki yaxşı yem bazamız var. 
Rayon rəhbərliyindən də razıyıq. Onlar vaxtaşırı təsərrüfatımızda olur,  işlərimizlə maraqlanır və lazımi dəstək verirlər. Tərtərə gələn xarici qonaqlar da iş  təcrübəmizlə tanış olmaq üçün bizə müraciət edirlər.

Mirzə CÜMŞÜDOV, 
fermer