Keçmiş hərbi xunta dövlət çevrilişinə hazırlaşır

Paşinyanla revanşistlərin qarşıdurması daha da gərginləşir

Hayastanda Nikol Paşinyan hakimiyyətinə qarşı çıxan sabiq hərbi xunta rejiminin təmsilçiləri yeni qarşıdurma yaratmaqla ölkədə növbəti xaos formalaşdırmaq məqsədi güdürlər. 
Belə ki, baş nazirin son günlərdə Azərbaycanla sülh müqaviləsinin imzalanması ilə bağlı açıqlamalarından sonra sosial narazılıqlardan istifadə edən Sarkisyan-Koçaryan koalisiyasının revanş istəyi vəziyyətin daha da qarışacağını göstərir. 
Keçmiş hərbi xunta yaranmış vəziyyətdən istifadə edərək ölkədəki xaosu daha da dərinləşdirməyə çalışır. Erməni bloqçu Natali Aleksanyan videomüraciətində deyib ki, Robert Koçaryan və Serj Sarkisyan çox sərt üsullarla Hayastanda dövlət çevrilişi təşkil etməyə hazırlaşırlar. Bu, heç kim üçün sürpriz olmamalıdır. Rədd edilmiş quldurların hakimiyyətə gəlmək üçün başqa yolu yoxdur. Onların hakimiyyətə gəlməsinin yeganə yolu dövlət çevrilişidir və indi bunu təfərrüatlı şəkildə hazırlayırlar.
Aleksanyan Hayastan hakimiyyətini sayıq olmağa çağırıb: "Mən dövlətin demonlara (cinlərə) cavab zərbəsi endirməyə hazır olmasını tələb edirəm. Hayastanı dağıtmayana qədər rahatlıq tapmayacaqlar. Ehtiyatlı olun. Bizim öz doğma Hayastanımızı iblislərə verməyə haqqımız yoxdur. Şəxsən mən hər şeyi edəcəm ki, Qarabağın "cənab prezidentləri" Bakı həbsxanasına düşsünlər. Onları orada cəza gözləyir".
Göründüyü kimi, hər iki ölkə arasında sülh müqaviləsinin imzalanmasının aktual olduğu bir dönəmdə hərbi xuntanın və ona bənzər digər ara qızışdıranların çevriliş etmək xəyalları erməni xalqını növbəti dəfə fəlakətə sürükləyir. 
Azərbaycanla müharibədəki məğlubiyyət Hayastanı elə bir uçuruma yuvarladıb ki, xilası mümkün deyil. Bütün bunlar, o cümlədən Koçaryan və Sarkisyan kimi müharibə cinayətkarlarının hakimiyyətləri dövründən yığılıb qalmış ağır problemlər hazırkı hakimiyyəti çətin vəziyyətdə qoyub.  Əslində, revanşist qüvvələr çox  yaxşı başa düşürlər ki, böyük siyasətə qayıtmaq üçün heç bir şansları yoxdur - xalq hələ onların hakimiyyət dövrünü unutmayıb.
Sarkisyan-Koçaryan koalisiyası hakimiyyətə gəlmək üçün xaricdən, indiki halda Rusiyadan da yardım alacağına ümid bəsləyir. "4rd.am" nəşri yazır ki, Hayastanda hakimiyyət çevrilişi istisna olunmur: "Danışıqlar prosesi ilə paralel olaraq müxtəlif platformalarda başqa diqqətçəkən müzakirələr də gedir. Diplomatik mənbələrdən alınan məlumatlara görə, mümkün Hayastan-Azərbaycan razılaşmasının maraqlı mərkəzləri, xüsusən də Qərb sənədin imzalanmasından sonra Nikol Paşinyanın hakimiyyətdə qalması məsələsinin çox ciddi problemə çevrilə biləcəyini anlayaraq, bu günlərdə alternativ, "ehtiyat" variantının müzakirəsi ilə bağlı fəallıq nümayiş etdirir. Həmin mərkəzlər başa düşürlər ki, müqavilə imzalanandan sonra Paşinyanı hakimiyyətdə saxlamaq nəinki qeyri-mümkün ola, həm də məqsədəuyğun olmaya bilər. Buna görə də onlar "B planı" tapmağa çalışırlar". 

Elçin CƏFƏROV,
"Azərbaycan"