Onların əksəriyyəti qeyri-dövlət sektorundadır
2025-ci il fevralın 1-i vəziyyətinə ilkin məlumatlara əsasən, iqtisadi fəal əhalinin sayı 5 milyon 312,6 min nəfər olmuşdur. Onlardan 5 milyon 29,9 min nəfərini məşğul əhali təşkil etmişdir.
Yanvarın 1-i vəziyyətinə isə muzdla çalışan işçilərin sayı 1 milyon 778 min nəfər, o cümlədən istisadiyyatın dövlət sektorunda 882,8 min, qeyri-dövlət sektorunda 895,7 min nəfər olmuşdur.
Dövlət Statistika Komitəsi bu rəqəmlərlə yanaşı, ötən il ölkədə açılmış yeni iş yerlərinin sayını da açıqlayıb. Belə ki, 2024-cü il ərzində ölkədə 91,7 min yeni iş yeri açılmışdır. Bu dövrdə yaradılmış iş yerlərinin 91,6 faizi qeyri-dövlət sektoruna aiddir. Bu faktlar da təsdiqləyir ki, ölkədə əhalinin işlə təminatı dövlətin prioritetləri sırasında qalmaqdadır.
Qeyd edək ki, yeni açılmış iş yerlərinin 75,2 faizi Bakı şəhərinin, 2,4 faizi Naxçıvan Muxtar Respublikasının, 22,4 faizi digər regionların, o cümlədən 4,7 faizi Abşeron-Xızı, 2,7 faizi Gəncə-Daşkəsən, 2,5 faizi Qarabağ, 2,5 faizi Quba-Xaçmaz, 2,2 faizi Şirvan-Salyan, 2 faizi Lənkəran-Astara, 1,3 faizi Qazax-Tovuz, 1,3 faizi Şəki-Zaqatala, 1,2 faizi Mərkəzi Aran, 1 faizi Şərqi Zəngəzur, 0,7 faizi Mil-Muğan, 0,3 faizi isə Dağlıq Şirvan iqtisadi rayonlarının payına düşmüşdür.
Yeni açılmış iş yerlərinin 13 faizi yeni yaradılmış müəssisə və təşkilatlarda, 85,9 faizi mövcud müəssisə və təşkilatlarda, 0,4 faizi fəaliyyətini bərpa etmiş müəssisə və təşkilatlarda, 0,7 faizi isə digər tədbirlər üzrə yaradılmışdır.
Hüquqi şəxslər tərəfindən yaradılmış iş yerlərinin 24,1 faizi tikinti, 17,4 faizi ticarət; nəqliyyat vasitələrinin təmiri, 10,5 faizi emal sənayesi, 8,4 faizi turistlərin yerləşdirilməsi və ictimai iaşə, 7,2 faizi peşə, elmi və texniki fəaliyyət, 6 faizi nəqliyyat və anbar təsərrüfatı, 4,5 faizi təhsil, 3,9 faizi inzibati və yardımçı xidmətlərin göstərilməsi, 3,5 faizi kənd təsərrüfatı, meşə təsərrüfatı və balıqçılıq, 3,3 faizi əhaliyə səhiyyə və sosial xidmətlərin göstərilməsi, 2,3 faizi informasiya və rabitə, 8,9 faizi isə digər iqtisadi fəaliyyət növləri üzrə açılmışdır.
Bununla yanaşı, 2024-cü il ərzində ölkədə 15,9 min iş yeri bağlanmışdır. Bu dövrdə bağlanmış iş yerlərinin 30,1 faizi qeyri-dövlət sektorunun payına düşmüşdür. İş yerlərinin 29,7 faizi müəssisə və təşkilatların fəaliyyətlərinin dayandırılması, 70,3 faizi isə fəaliyyət göstərən müəssisə və təşkilatlarda aparılan ixtisarlar ilə əlaqədar bağlanmışdır.
"Azərbaycan"
jpg_1766066117.jpg)
