Əvvəllər Qərb bölgəsində kartof əkini əsasən Gədəbəy və Tovuzda aparılırdısa, artıq bir neçə ildir ki, qonşu rayonlarda, o cümlədən Ağstafada da bu vacib ərzaq məhsulunun istehsalına maraq xeyli artıb. Rayonda bir neçə ildir ki, kartofçuluq üzrə ixtisaslaşma gedir.
Son illər kartofun sərfəli qiymətə satılması fermerlərdə bu sahəyə əlavə stimul yaratmış, onları daha çox məhsul istehsalına həvəsləndirmişdir. Təkcə keçən il hər hektardan 314 sentner məhsul götürən ağstafalı əkinçilər ümumilikdə 14 min 51,5 ton kartof istehsal etmişlər ki, bu da əvvəlki illərdəkindən xeyli çoxdur.
Hazırda rayonun 26 kəndində 640 hektar sahədə karof əkilir. Məhsuldarlıq yüksəkdir - hər hektardan 30-35 ton kartof götürülür. İstehsal olunan məhsulun satışında da elə bir problem olmur. Yığılan kartofun bir hissəsi elə sahədəcə satılır, özü də yaxşı qiymətə.
Hazırda rayonda ən çox kartof əkən fermerlərdən Elnur Nəbiyev, Əsəd Rzayev, Şahnaz Kaya və başqaları yeni mövsümün əkininə başlamışlar. Onlar əsasən "Arizona", "Abistik", "Anna Koralina" sortlarına üstünlük verirlər. Keçən il olduğu kimi, bu il də torpaq sahibləri əkin sahələrini genişləndirmişlər. Elnur Nəbiyev 100, Əsəd Rzayev 40, Elxan Kazımov 150, Şahnaz Kaya isə 40 hektarda kartof əkməyi planlaşdırmışdır.
Ağstafa Aqrar İnkişaf Mərkəzinin direktoru Ramiz İmanov deyir ki, bu il rayon üzrə 450 hektarda kartof əkini proqnozlaşdırılıb. Artıq fermerlər 400 hektardan çox sahədə səpin aparmışlar. Əkin sürətlə davam edir. Fermerlər əlverişli hava şəraitindən səmərəli istifadə edərək səpini vaxtında və optimal müddətdə başa çatdırmağa çalışırlar.
S.YUNİSOĞLU,
"Azərbaycan"
