Son illər
ölkədə kartof istehsalında öndə gedən tovuzlular bu il də sahələrdə bol məhsul yetişdirmişlər.
Keçən il 6 min 600 hektarda kartof əkən rayon sakinləri 144 ton məhsul istehsalna
nail olmuşlar.
Əkinçilər
faraş kartof istehsalında da fərqlənmişlər. İstixanalarda yetişdirilmiş 2542 ton
məhsulun satışından 3 milyon 800 manat gəlir götürən fermerlər cari ildə bu göstəricini
xeyli yaxşılaşdırmışlar.
Bu il əvvəlki
illərdən fərqli olaraq əkin sahələri bir qədər azaldılaraq intensiv texnologiyaya
üstünlük verilmişdir. Belə ki, 5 min 112 hektar sahədə daha məhsuldar toxum sortları
əkilmişdir. Bunun üçün Rusiya, Türkiyə və Ukraynadan 2 min 270 ton kartof toxumu
gətirilmişdir. Hazırda yığım davam edir. Fermerlər indiyədək sahələrdən 158,7 min
tondan çox məhsul toplamışlar. Hər hektardan 250 sentner kartof yığılmışdır.
Əvvəlki illərdən
fərqli olaraq builki əkinlərin 90 faizi kənd təsərrüfatı texnikasının köməyi ilə
aparılmışdır. Kartofsəpən texnikanın təxminən 100 nəfərin bir həftəyə görə biləcəyi
işi bir gündə yerinə yetirməsini nəzərə alsaq, bunun istehsal olunan məhsulun maya
dəyərinə nə qədər xeyri olduğunu təsəvvür etmək çətin deyil. Bundan başqa, təsərrüfat
sahiblərinin dediklərinə görə, texnika ilə becərilən sahələrdə məhsuldarlıq da yüksək
olur.
Rayonda ən
çox kartof əkən kəndlərdən biri Əyyubludur. Burada əhalinin 90 faizi kartof əkir.
Kənddə 2 min hektar əkin sahəsinin yarısında kartof yetişdirilir. Kartofçuluq üçün
əlverişli olan əkin sahələrinin hər hektarından 40 tondan çox məhsul götürülür.
Yığılan kartofun bir hissəsi sahədə satılır. Qalanı kənddə olan soyuducu anbarda
saxlanılır.
Bozalqanlı
kəndindən olan fermer Kamal Ələkbərov keçən il 94 hektar sahənin hər hektarından
45 ton məhsul götürmüşdür. O, bu il intensiv texnologiyaya üstünlük verməklə əkin
sahələrini 100 hektara çatdırmışdır. Fermerlə söhbətdən məlum oldu ki, mövsüm ərzində
təsərrüfatda 200 nəfərdən artıq işçi qüvvəsi çalışır. Əkin sahələrinin suvarılması
çiləyici aqreqatlarla aparılır. Təsərrüfatda inşa edilmiş 3 min tonluq soyuducu
anbar məhsulu uzun müddət saxlamağa imkan verir. Təsərrüfatda bu yaxınlarda daha
bir 3 min tonluq soyuducu anbarın tikintisinə də başlanmışdır.
Dönük Qırıqlı
kəndinin sakini Elçin Əliyev də əvvəlki illərdən fərqli olaraq bu il kartof istehsalında
yüksək göstəriciyə nail olub. 70 hektarda kartof əkən fermer nəzərdə tutduğundan
çox məhsul əldə edib. Dedi ki, kartofçuluq hər il ona xeyli gəlir gətirir. Bu sahədən
götürdüyü qazancla yaxşı ev-eşik qurub.
Əyyublu kəndində
kartofçuluqla məşğul olan Fərrux Qurbanov da qazancdan razıdır. Kartofun satışından
əldə etdiyi gəlir ailəsinin dolanışığını artıqlaması ilə təmin edir. Fermer deyir
ki, keçən il hər hektardan 35 ton məhsul götürməsi onu daha da ruhlandırmış və əkin
sahəsini bir qədər də genişləndirərək 1,5 hektara çatdırmışdır.
Sabir ƏLİYEV,
"Azərbaycan”
