Azərbaycan rəssamlıq aləmində onun ayrıca yeri var. Rəssamlıq sənətimizdə
yarım əsrdən artıq uğurlu yaradıcılıq yolu keçib. Bu il 70 yaşı tamam olan
istedadlı rəssam Fikrət İbrahimli Səttar Bəhlulzadə və Toğrul Nərimanbəyov kimi məşhur sənətkarlardan qaynaqlanan
yaradıcılıq ruhunu əxz edib. F.İbrahimli
sənətin sirlərini Neftçala şəhərində ilk müəllimi Adil Hacıyevdən mənimsəyib.
Neftçala şəhərinin özünəməxsus panoramı, təbii gözəllikləri, Xəzər dənizinin
füsunkar görünüşü, dalğalarının ritmik ləpələnməsindən doğan ecazkar
"musiqi"si və ilahinin qüdrətindən yaranmış təbiət mənzərələri onun gələcəkdə
rəssam olmasına güclü təsir göstərmişdir.
Rəssamlıq sənətinə olan sevgi F.İbrahimlini Bakı şəhərinə gətirib
çıxarır. Burada məşhur Ə.Əzimzadə adına Azərbaycan Dövlət Rəssamlıq
Texnikumunda peşəkar rəssamlıq təhsilinə yiyələnir, sonra Azərbaycan Dövlət Mədəniyyət
və İncəsənət Universitetinə qəbul olur. O, peşəkar ali rəssamlıq təhsili
almaqla yanaşı, tanınmış rəssamlardan sənətin sirlərini öyrənir və məşhur rəssamlar
Səttar Bəhlulzadə və Toğrul Nərimanbəyovla şəxsi dostluq və yaradıcılıq əlaqələri
yaratmağa başlayır.
F.İbrahimli üçün təhsil illərində əxz etdiyi sənət vərdişləri nə qədər əhəmiyyətli
olmuşsa, rəssamın sənət dostları ilə yaxın münasibətləri və onlarla birgə etüdə
getdikləri günlər də bir o qədər yaddaqalan və önəmli olub. Xalq rəssamı Toğrul
Nərimanbəyov "Ulduz" jurnalının 1980-ci ilin 10-cu nömrəsində
xeyir-dua mahiyyətli yazısında istedadlı tələbəsi Fikrət İbrahimliyə uğurlu yol
arzulayıb.
Azərbaycan Rəssamlar İttifaqının üzvü F.İbrahimlinin əsərləri dəfələrlə
ölkəmizdə və xaricdə təşkil olunan sərgilərdə nümayiş olunub, diplom və
mükafatlara layiq görülüb. Eyni zamanda əsərləri ölkəmizdə və xaricdə muzey,
qalereya və şəxsi kolleksiyalarda saxlanılır.
F.İbrahimli 70 illik həyatının yarım əsrini bədii yaradıcılıqla məşğul
olub. Rəssamlığı həyatının ayrılmaz bir hissəsi hesab edən sənətkar üçün
dünyaya açılan pəncərə onun emalatxanasından başlayır. O, indiyədək dəzgah rəngkarlığı
sahəsində süjetli tablo, portret, mənzərə və natürmort janrlarında bir-birindən
maraqlı yüzlərlə sənət əsərləri yaradıb. İstedadlı rəssam həm də dəzgah və kitab qrafikası, keramika sahələrində
də maraqlı sənət nümunələri ərsəyə gətirib. Rəssam uğurlu bədii yaradıcılıq fəaliyyəti
sayəsində yaddaqalan, bədii estetik zövq mənbəyi hesab olunan çoxsaylı lirik əsərlər
müəllifi kimi tanınır.
Onun rəngkarlıq sahəsində yaratdığı əsərlərin əsas mövzu dairəsi və qayəsi
Azərbaycan mədəniyyətinin və təbiətinin gözəlliklərini həssas rəssam duyumu və
sənətin güclü bədii ifadə vasitələri ilə kətanda əks etdirməkdir. Sənətkarın
yaradıcılığında Bakı, İçərişəhər, Şuşa, Neftçala mövzusu qırmızı xətt kimi
keçir. Deyir ki, onun qədim mədəniyyətimizə bağlılığı və vurğunluğu İçərişəhərlə
tanışlıqdan başlayır: "Tələbəlik illərində və sonrakı bir neçə ildə mən İçərişəhərdə
yaşamışam. Oradakı memarlıq abidələri, yollar, qala divarları gözlərimdə
canlanan bir nağıldır". Hər bir yaradıcı sənətkar öz xalqının və mədəniyyətinin
ifadəçisidir fikri ilə yanaşmış olsaq, əminliklə deyə bilərik ki, rəssam
F.İbrahimli yaratmış olduğu bədii əsərləri ilə öz ölkəsinin zəngin mədəniyyətini
və təbiətini incə bədii zövqlə, məxsusi rəssam təxəyyülü və inandırıcı rəng
boyaları ilə kətanda əks etdirə bilmişdir.
Rəssamın süjetli tablo və mənzərə əsərlərinə nümunə olaraq "Həyat
naminə", "Muğam", "İçərişəhər", "Neftçala.
Limanda", "Neftçala. Balıq kombinatı", "Nişan. Rəfiqələr",
"Kəndimizin qızları", "Xonça aparırlar", "Gəlin gətirməyə",
"Toy", "Kür qırağında", "Kür çayı", "Fatmayı",
"Bağ evi. Novxanı", "Abşeron motivi", "Abşeron günəbaxanları"
və başqalarını qeyd etmək olar. Adlarından da hiss olunduğu kimi, Fikrət
İbrahimlinin ilham qaynağının məhsulu olan lövhələr heç də asanlıqla kətanda öz
əksini tapmamışdır. Təbii ki, bu cür sənət nümunələrinin yaradılmasının
arxasında onun inamlı yaradıcılıq axtarışları, həssas müşahidələri və peşəkar sənət
ustalığı dayanır.
Rəssam bir sıra portret və natürmort əsərlərinin müəllifi kimi də özünü
təsdiq edən sənətkarlarımızdandır. Məlumdur ki, portret əsərində rəssamdan surətini
yaradacağı şəxsin anatomik bənzəyişini əks etdirməklə yanaşı, qəhrəmanının fərdi
xarakterik xüsusiyyətlərini təsvir etmək də tələb olunur. F.İbrahimlinin
yaratdığı portret əsərlərində bu əsas iki istiqamətin paralel aparıldığı
müşahidə edilir.
2022-ci ildə Muzey Mərkəzində F.İbrahimlinin "Ruhumun təqdimatı"
adlı fərdi sərgisi təşkil olunmuşdu. Sərgidə onun 60-a yaxın əsəri nümayiş
edilirdi. Sərgidən sonra rəssamın
yaradıcılığına, onun əsərlərinə maraq daha da artdı. O, Orta Asiyada - Özbəkistanda
TÜRKSOY-un təşkilatçılığı ilə keçirilən festivala dəvət aldı, ölkəmizi xalq rəssamları
Sakit Məmmədov, Arif Əzizlə birlikdə təmsil etdi, mükafatlarla geri döndü.
2023-cü ildə F.İbrahimlinin həyat və yaradıcılığı haqqında "Ömür səhifələrim"
adlı sanballı kitabın sevincini bölüşmək və bu nəşri sənətsevərlərə təqdim etmək
xoşbəxtliyi nəsib oldu. Fikrimcə, kitabın nəfis şəkildə çapı rəssama ən böyük hədiyyədir.
Üç dildə nəşr edilən kitab nəsillər və əsrlərarası körpüdür.
Əsəd QULİYEV,
Rəssamlar İttifaqının üzvü,
sənətşünas
