Bu gün Azərbaycanın bütün regionları, o cümlədən işğaldan azad edilmiş ərazilər sürətli inkişaf və yenidənqurma mərhələsini yaşayır. Xüsusilə qeyd edilməlidir ki, Azərbaycanın müharibədən dərhal sonra genişmiqyaslı bərpa və quruculuq işlərinə başlaması beynəlxalq miqyasda yüksək qiymətləndirilir və bu addım dünya hərb tarixində analoqu olmayan nümunə kimi dəyərləndirilir.
Milli Məclisin deputatı Kamran Bayramov qəzetimizə açıqlamasında bildirib ki, hazırda azad edilmiş ərazilərdə icra edilən infrastruktur layihələri, sosial obyektlərin tikintisi, yaşayış məntəqələrinin bərpası və iqtisadi fəaliyyətin canlandırılması ölkəmizin iqtisadi gücünün, siyasi iradəsinin və strateji hədəflərinə sadiqliyinin bariz göstəricisidir: "Prezident İlham Əliyevin Sabirabad, İmişli, Cəbrayıl və Zəngilan rayonlarına səfəri bir daha göstərdi ki, dövlət başçısının diqqət və qayğısı təkcə işğaldan azad edilmiş ərazilərlə məhdudlaşmır, ölkənin bütün regionlarının hərtərəfli inkişafını əhatə edir. Bu səfərlər həm bölgələrdə icra olunan sosial-iqtisadi layihələrin gedişatı ilə yerində tanışlıq məqsədi daşıyır, həm də yeni infrastruktur obyektlərinin açılışı, istehsal müəssisələrinin fəaliyyətə başlaması və vətəndaşların rifahının yüksəldilməsi istiqamətində mühüm qərarların qəbuluna şərait yaradır. Prezidentin regionlara mütəmadi səfərləri dövlət siyasətinin mərkəzində insan amilinin, bərabər regional inkişafın və dayanıqlı sosial rifahın dayandığını bir daha təsdiqləyir".
Deputat qeyd edib ki, Böyük qayıdış proqramının icrası planlı və mərhələli şəkildə uğurla davam edir. Proqramın birinci mərhələsinin yekununda, yəni 2026-cı ilin sonunadək Qarabağ və Şərqi Zəngəzurda 140 mindən artıq insanın daimi məskunlaşması nəzərdə tutulur. Bu, Azərbaycanın tarixində bərpa və yenidənqurma sahəsində ən genişmiqyaslı layihələrdən biridir. Hazırda bütün Qarabağ və Şərqi Zəngəzur əraziləri böyük tikinti və dirçəliş meydanına çevrilib. Yeni yaşayış məntəqələri salınır, müasir yollar, elektrik və qaz xətləri, su təchizatı sistemləri, məktəblər, xəstəxanalar və sosial obyektlər inşa olunur. Artıq 50 mindən çox insan bu torpaqlarda yaşayır, çalışır və təhsil alır. Onlardan təxminən 20 mini öz doğma yurdlarına qayıdan keçmiş məcburi köçkünlərdir. Bu proses təkcə ərazilərin bərpasını deyil, həm də ədalətin, mənəvi və tarixi qayıdışın təcəssümünü ifadə edir.
K.Bayramov vurğulayıb ki, səfər çərçivəsində görülən işlərə diqqət yetirdikdə Azərbaycanın iqtisadi və maliyyə gücünün, dövlət idarəçiliyinin səmərəliliyinin və inkişaf strategiyasının aydın mənzərəsi formalaşır: "Bu reallıq ölkəmizin son illərdə həyata keçirdiyi düşünülmüş, mərhələli və gələcəyə hesablanmış siyasətin, həmçinin sosial-iqtisadi sahədə aparılan təkmil islahatların məntiqi nəticəsidir. Prezident İlham Əliyevin rəhbərliyi ilə Azərbaycan heç vaxt əldə olunanlarla kifayətlənmir, əksinə, yeni hədəflərə doğru inamla irəliləyir. Əsas məqsəd azad edilmiş ərazilərin tam bərpası, dayanıqlı məskunlaşmanın təmin edilməsi və soydaşlarımızın doğma yurdlarına qürurla, təhlükəsiz şəkildə qayıdışıdır. Müzəffər Ali Baş Komandan İlham Əliyevin vurğuladığı kimi, bu gün biz Azərbaycan xalqının əyilməz iradəsini və milli birliyini Qarabağa və Şərqi Zəngəzura dönən insanların timsalında görürük. Onlar illərlə doğma yurd həsrəti ilə yaşasalar da, indi o torpaqlarına sahib çıxaraq həyatlarını yenidən qururlar. Heç vaxt o torpaqlarda yaşamamış gənc nəsil belə, bu gün ata-baba yurduna qayıtmaq sevincini yaşayır".
Deputat bildirib ki, bu reallıqlar Azərbaycanın bərpa prosesinə necə sistemli və uzaqgörən yanaşdığını bir daha göstərir. Qarabağ və Şərqi Zəngəzurda həyata keçirilən layihələr, salınan hər bir yeni məskən xalqımızın həmrəyliyinin və sarsılmaz inamının ifadəsidir. Məhz bu baxımdan dövlət başçısının azad edilmiş ərazilərə hər səfəri, sakinlərlə görüşləri həm mənəvi, həm də siyasi baxımdan xüsusi önəm daşıyır. Prezident İlham Əliyevin oktyabrın 28-də Zəngilan rayonunun Məmmədbəyli və Ağalı kəndlərinin sakinləri ilə görüşdə söylədiyi fikirlər bu mənzərənin mahiyyətini dolğun ifadə edir: "Ermənilər viran qoyub bizim dədə-baba torpaqlarımızı, biz isə qurub-yaradan xalqıq. Biz düşməni torpaqlarımızdan qovmuşuq. İndi də doğma torpağımızda qurub-yaradırıq, şərait yaradırıq, binalar, məscidlər tikirik, tarixi abidələri bərpa edirik. Yəni biz - bu torpaqların sahibləri qayıtmışıq və burada əbədi yaşayacağıq. Mən sizə də xoşbəxt həyat arzulayıram. Bir daha sizi təbrik edirəm".
Əsmər QARDAŞXANOVA,
"Azərbaycan"
