Elm və Təhsil Nazirliyinin Geologiya və Geofizika İnstitutunun Elmi şurasının növbəti iclası keçirilib.
Tədbiri institutun baş direktoru akademik Akif Əlizadə açaraq gündəlikdə duran məsələlərlə Şura üzlərini tanış edib.
İnstitutdan AZƏRTAC-a bildirilib ki, gündəliyin təsdiqindən sonra “İşğaldan azad edilmiş ərazilərdə radioaktiv sahələrin və radon qazının yayılma aktivliyinin tədqiqi və “qaynar nöqtələrin” geoloji təbiətinin təhlili” elmi işi çərçivəsində aparılan tədqiqatlar təqdim olunub. Bununla bağlı AMEA-nın müxbir üzvü Çingiz Əliyev və Azərbaycan Dövlət Su Ehtiyatları Agentliyinin Monitorinq sektorunun müdiri Yusif Əhədi hesabat formatında məruzə ediblər. Bildirilib ki, işğaldan azad olunmuş Zəngilan rayonunun Ağalı, Tərtər rayonunun Talış və Şuşa şəhərində açıq qaynaqlardan əldə edilmiş peyk görüntüləri əsasında radioaktiv sahələrin və radon qazının yayılma aktivliyinin, eləcə də “qaynar nöqtələrin” geoloji təbiətinin təhlili üçün Landsat 7, 8 və Sentinel-2A, 2B peyklərinin fərqli tarixlərə aid kosmik şəkilləri əldə olunaraq tədqiq edilib. Avropa Kosmik Agentliyinin (ESA) bu peykləri görünən diapazonlarda 10 və 60 metr, yaxın infraqırmızı və qısa dalğalı infraqırmızı diapazonlarda elektro-optik multispektral sensorla təchiz olunub. Bu peyklər vasitəsilə 13 spektral kanal, bitki örtüyünün vəziyyətindəki fərqləri, o cümlədən müvəqqəti dəyişiklikləri tədqiq etmək mümkün olub. Layihədə iki peykin mövcudluğu ekvatorda hər 5 gündə, orta enliklərdə isə 2-3 gündə təkrar tədqiqat aparmağa imkan verir.
Təqdimat zamanı 11 spektral kanala sahib Landsat-8 peykinin imkanları vasitəsilə araşdırmaların nəticələri barədə də məlumat verilib və suallar cavablandırılıb.
İclasda “1971-2020-ci illərdə Azərbaycanın geoloji öyrənilməsi. II hissə (1981-2020)” elmi-tədqiqat işi çərçivəsində yerinə yetirilən işlər, Milli Məlumat Mərkəzində yerinə yetirilən işlərin gedişatı, AMEA magistraturasının təhsil sistemində baş vermiş dəyişikliklər, Ümummilli Lider Heydər Əliyevin 100 illiyinə həsr olunmuş gənc alim və tələbələrin “Geoinformatika, georesurslar, geoekologiya” mövzusunda keçiriləcək IX ənənəvi beynəlxalq elmi konfransına hazırlığın gedişatı haqqında da məlumat verib.
Elmi şuranın iclasında, həmçinin bir sıra elmi-təşkilati məsələlər müzakirə edilib.
