Azərbaycanın qərb rayonlarını Naxçıvan Muxtar Respublikası ilə birləşdirəcək dəhliz (Zəngəzur dəhlizi və ya “Beynəlxalq Sülh və Rifah naminə Tramp Marşrutu” – red.) təkcə Cənubi Qafqazda deyil, Mərkəzi Asiya ölkələrində də geoiqtisadi vəziyyəti dəyişdirə bilər.
AZƏRTAC xəbər verir ki, bu barədə Türkiyənin “HaberTürk” xəbər kanalının analitik materialında deyilir.
Reportajda qeyd edilir ki, yeni dəhlizin istifadəyə verilməsi ilə Asiya ilə Avropa arasında yüklərin çatdırılması marşrutlarının prioritetinə yenidən baxılacaq, yük axınlarının ənənəvi istiqamətlərinin əhəmiyyəti azalacaq.
Telekanal Türkiyənin Qars vilayəti ilə Naxçıvanı birləşdirən yeni dəmir yolu layihəsinin icrasına start verildiyini də diqqətə çatdırır. Onun istifadəyə verilməsi təxminən beş il çəkəcək.
Reportajda daha sonra qeyd edilir: “Zəngəzur dəhlizinin işə salınması mövcud Bakı-Tbilisi-Qars dəmir yolu xəttinin əhəmiyyətini azaltmayacaq. Əksinə, Avropa ilə Asiya arasında ticarətin həcmini nəzərə alsaq, iki marşrut bir-birini tamamlayacaq. Bütün bunlar regionun logistika potensialını və tranzit imkanlarını artıracaq”.
Telekanal bildirir ki, Naxçıvandan keçəcək yeni marşrut Türkiyə ilə Azərbaycan arasında əlaqəni 343 kilometr azaldacaq.
“Zəngəzur dəhlizinin tam istifadəyə verilməsi bir neçə il çəkə bilər ki, bu da Avrasiyada malların çatdırılma müddətini və tədarükçülərin xərclərini azaldacaq. Bu dəhliz Avropaya ixrac üçün mühüm arteriya əldə edəcək və son nəticədə regiondakı bütün vəziyyətə təsir edəcək Mərkəzi Asiya ölkələri üçün də yeni imkanlar açacaq”, -deyə reportajda qeyd olunur.
Türkiyə telekanalı vurğulayır ki, Azərbaycan üzərindən strateji dəhliz Mərkəzi Asiyanın beş ölkəsinin geoiqtisadi tələbatlarını tam şəkildə ödəyə biləcək.
