Beş il əvvəl 44 günlük Vətən müharibəsində tarixi qələbə qazanan Azərbaycan nəinki müvəqqəti işğal olunmuş ərazilərinin böyük hissəsini geri qaytardı, həm də gələcəyə haqqı olduğunu sübut etdi. Bu tarixi zəfərin ən parlaq nümunələrindən biri də Füzulidir.
Ümumiyyətlə qeyd etmək lazımdır ki, qazanılan qələbə təkcə hərbi deyil, həm də mənəvi zəfər – yeni dövrün simvolu idi. Bu tarixi nailiyyət uzun, düşünülmüş və mərhələli siyasətin nəticəsidir. Prezident İlham Əliyev ordunu gücləndirdi, iqtisadi əsaslar qurdu, diplomatiyanı inkişaf etdirdi, Azərbaycanın öz müqəddəratını müstəqil şəkildə təyin etməyə qadir olan müasir və inamlı dövlət imicini formalaşdırdı. Beləliklə, Azərbaycan Respublikasının Prezidenti, Ali Baş Komandan İlham Əliyev bu şərəfli və məsuliyyətli vəzifəni qətiyyətlə həyata keçirdi. İlham Əliyevin rəhbərliyi ilə ordumuzun göstərdiyi qəhrəmanlıq və xalqımızın birliyi sayəsində 30 ilə yaxın işğal altında olan ərazilər, o cümlədən Füzuli şəhəri düşmən tapdağından azad edildi.
Bu gün, 17 oktyabr, Füzuli şəhərinin işğaldan azad edildiyi gündür. 1993-cü ilin siyasi və hərbi xaosu nəticəsində düşmən tapdağı altına düşən Füzuli rayonu, təkcə füsunkar təbiəti ilə deyil, qədim tariximizin, mədəniyyətimizin izi olan abidələri ilə də məşhur idi. Lakin düşmən bu gözəllikləri də viran qoydu, talan etdi. Amma 30 ilə yaxın davam edən erməni işğalı 44 günlük Vətən müharibəsi ilə sona çatdı. Müzəffər Ali Baş Komandan İlham Əliyevin müdrik rəhbərliyi və Azərbaycan Ordusunun qətiyyətli iradəsi ilə qazanılan bu qələbə, Füzuli kimi strateji əhəmiyyətli torpaqları düşmən tapdağından azad etdi. Hər gününü qələbə ilə tarixə yazan, qəhrəmanlıq dastanı yaradan ordumuz, 2020-ci il oktyabrın 17-də Füzuli rayonunun Qoçəhmədli, Çimən, Cuvarlı, Pirəhmədli, Musabəyli, İşıqlı, Dədəli kəndlərini və nəhayət, Füzuli şəhərini azad etdi. Bu zəfər təkcə Füzulinin deyil, bütöv Azərbaycanın zəfəri oldu. Allah bütün şəhidlərimizə rəhmət eləsin! Qazilərimizə sağlıq versin! Onların qəhrəmanlığı bizim qəlbimizdə əbədi yaşayacaq!
Torpaqlarımızın 20 faizinin 30 ilə yaxın davam edən işğalına, Təhlükəsizlik Şurasının və BMT Baş Assambleyasının 4 qətnaməsinə məhəl qoyulmamasına və digər cinayətlərə görə Ermənistanı heç vaxt qınamayıblar, heç bir sanksiya tətbiq etməyiblər. Hətta Vətən müharibəsi zamanı döyüş əməliyyatlarından xeyli uzaqda yerləşən şəhər və kəndlərimiz raket atəşlərinə tutuldu, dinc insanlar, o cümlədən qadın və uşaqlar həlak oldu, yaralandı. Ancaq yenə də dünya susdu, insan hüquq və azadlıqlarından danışan beynəlxalq təşkilatlar susdular. 17 oktyabr 2020-ci il tarixində Ermənistanın dinc sakinlərə qarşı törətdiyi amansız hücum, insanlıq adına ləkə olan bir hərbi cinayət idi. Bu hücum, Ermənistanın Cenevrə Konvensiyasını və beynəlxalq hüququ açıq şəkildə pozaraq, azərbaycanlıların iradəsini qırmaq cəhdinin sonuncu nümunəsi idi. Lakin düşmənin bu məkrli planı bir daha sübut etdi ki, Ermənistanın cinayətkar rəhbərliyi müharibə meydanında deyil, yalnız günahsız insanların qanını tökməklə gücünü göstərir. Gəncə 4, 5, 8, 11 və 17 oktyabr tarixlərində raket və ağır artilleriya hücumlarına məruz qaldı. Raket zərbələri nəticəsində 26 dinc sakin həlak oldu, 175 nəfər yaralandı, evlər və mülki obyektlər dağıldı. Lakin bu itkilər xalqımızın ruhunu sarsıda bilmədi. Azərbaycan xalqı bu çətin anlarda daha da birləşdi, yüksək vətənpərvərlik, qətiyyət və mübarizə əzmi nümayiş etdirərək, ordumuza dəstəyini əsirgəmədi. Terror qurbanlarının ruhu həmişə bizim ürəklərimizdə yaşayacaq! Biz heç vaxt düşmənin hərbi cinayətlərinə cavab olaraq eyni yolla getmədik, biz müharibəni ləyaqətlə, döyüş meydanında apardıq və ədalətli qələbəmizi təmin etdik. Gəncəyə atılan hər bir raket Ermənistanın məğlubiyyətini, mənəvi iflasını simvolizə edirdi. Ermənistanın bu vəhşiliklərinə göz yuman beynəlxalq ictimaiyyət bu cinayətlərə görə Ermənistanı məsuliyyətə cəlb etməlidir. Qəddarlıq və zorakılığa səssiz qalmaq ədalətin susdurulması deməkdir. Azərbaycan öz tarixi vəzifəsini yerinə yetirdi. Dünyanın heç bir dövləti hələlik hərbi-siyasi vasitələrlə beynəlxalq hüququn təntənəli qələbəsinə nail olmaq qabiliyyəti ilə öyünə bilməz. Qələbəmizdən cəmi 6 gün sonra - 2020-ci il noyabrın 16-da Prezident İlham Əliyev və birinci xanım Mehriban Əliyeva işğaldan azad edilmiş Füzuli rayonuna səfər ediblər. Həmin gün dövlətimizin başçısı şanlı Azərbaycan bayrağını Füzuli şəhərində dalğalandırdı.
44 günlük Vətən Müharibəsindən sonra Azərbaycan Respublikasının Prezidenti İlham Əliyev regionda davamlı sülhün bərqərar olması naminə Ermənistana sülh təklif etdi. Lakin Ermənistan Azərbaycanın uzadılmış sülh əlini rədd edərək, ərazimizdə təxribat və terror aktları törətməkdə davam etdi. Buna cavab olaraq Azərbaycan lokallaşdırılmış antiterror tədbirləri həyata keçirdi və cəmi 24 saata erməni separatçıları təslim oldular. Bununla da Qarabağda xunta rejimi aradan qaldırıldı, separatçıların liderləri həbs olundu. Azərbaycan bütün ərazisində öz suverenliyini tam bərpa etdi.
Avqust ayında ABŞ-də Ağ evdə ölkəmizin başçısı İlham Əliyev, Ermənistanın baş naziri və Prezident Donald Tramp tərəfindən imzalanan birgə Bəyannamə, sentyabr ayında ATƏT-in Minsk qrupunun ləğv edilməsi ilə bağlı qərarın verilməsi Azərbaycan Prezidentinin siyasi iradəsinin, qətiyyətinin nəticəsidir. Onilliklər ərzində “dondurulmuş” hesab edilən Qarabağ məsələsi qətiyyətlə, strateji, milli iradə və beynəlxalq hüquq ruhunda həll olundu.
Bu gün Füzuli şəhəri günüdür. Bu əlamətdar günün təsis edilməsi Füzuli şəhərinin erməni işğalından azad edilməsinin tarixi ilə bağlıdır. Füzuli, digər işğal altında olan torpaqlarımız kimi, 30 il ərzində dağıdılıb, viran qoyulub. Lakin müharibədən sonra artıq qürurla deyə bilərik ki, Füzuli dirçəlir, həyat qayıdır. Bu gün Füzulidə və işğaldan azad edilən digər torpaqlarımızda geniş miqyaslı infrastruktur layihələri həyata keçirilir. Qısa müddətdə inşa edilən və “Qarabağın hava qapısı” adlandırılan Füzuli Beynəlxalq Hava Limanı Azərbaycanın gücünü, iqtisadi qüdrətini bir daha sübut edir. Bütün bu layihələr, bir məqsədə xidmət edir: torpaqların əzəli sahibləri geri dönür, Qarabağ və Şərqi Zəngəzur əvvəlki əzəmətini yenidən bərpa edir.
Azərbaycan Prezidenti Cənubi Qafqazda dünya dövlətləri tərəfindən qəbul edilən yeni siyasi və iqtisadi vəziyyət yaratdı. Onun “sözümüz imzamız qədər dəyərlidir” postulatı bu gün və gələcək üçün vacib amildir. Bu gün Azərbaycan gələcəyə inamla baxır. Qarabağ yenidən canlanır, ölkəmiz inkişaf edir. Və bu yolun hər bir addımı Azərbaycan Prezidenti İlham Əliyevin siyasi iradəsinin, uzaqgörənliyinin və əzmkarlığının izlərini daşıyır.
Hicran Hüseynova,
Milli Məclisin komitə sədri, professor
jpg_1782925481.jpg)
jpg_1782925425.jpg)
