Fransada son illər islamofobiya və irqçiliyin miqyası artmaqdadır. Bu ölkə Avropada bir növ islamofobiya "flaqman"ına çevrilib. Müstəqil tədqiqatçı və publisist Roland Ejen Laffitt bildirir ki, Fransada islamın siyasi bir anlayış olduğunu aşılamağa çalışırlar.
"Bu gün Fransada islamofobiya dövlət siyasətinə çevrilib. Əgər Fransada bir şəxs polis tərəfindən saxlanılıbsa və o, ərəbəsillidirsə, bu şəxs böyük çətinliklərlə üzləşir. Əgər işə müraciət edərkən, işəgötürən sizin ərəb soyadınızın olduğunu görsə, şansınız digər müraciət edənlərdən 7 dəfə azdır", - deyə tədqiqatçı vurğulayıb.
Qərbi Azərbaycan İcmasının (DAK) Fransa və Qərbi Avropa üzrə nümayəndəsi, Fransada Qərbi Azərbaycanlıların İrsini Qoruma İctimai Birliyinin sədri Zaur Sadıqbəyli Fransada azərbaycanlılara qarşı qərəzli münasibətin olduğunu deyir: "Fransada son vaxtlar bir çox müsəlman məktəbləri bağlanıb, imamlar işdən qovulub, kitabxanalardan islam dini ilə bağlı kitablar müsadirə olunub. Biz azərbaycanlılar da Ermənistan tərəfindən oxşar irqçi davranışa məruz qalmışıq. Ermənistanda Azərbaycan dilli məktəblər bağlanıb, oradan qovulanlar isə Azərbaycanda təhsil almağa məcbur edilib".
Fransanın Rona departamentinin Məscidlər Şurası xəbər verir ki, iyunun 3-də Lion yaxınlığındakı Villeurbanne şəhərindəki məsciddən Quran nüsxəsi oğurlanaraq yandırılıb. Məscidə gələn şəxs üzünü gizlədərək namaz zalına daxil olub və orada müsəlmanların müqəddəs kitabı olan Quranın nüsxələrindən birini götürüb. Daha sonra o, kitabı yandırıb və girişdə qoyaraq gözdən itib. Qeyd edək ki, Lionda və şəhərin ətrafında 100 min erməni yaşayır.
Şura hadisəni müsəlmanlara nifrət aktı adlandırıb. Açıqlamada bunun tək bir hadisə olmadığı, Fransada müsəlmanlara qarşı silsilə hücumların tərkib hissəsi olduğu vurğulanıb. Müsəlman icmasının nümayəndələri islamofobiyanın güclənməsindən rahatsız olduqlarını bildiriblər.
Polis faktla bağlı araşdırmalara başlayıb. Son məlumata görə, Fransada Quranı yandırmaqda şübhəli bilinən şəxs həbs olunub. Prokurorluq şübhəlinin "əqli cəhətdən qeyri-sabit" olduğunu qeyd edib. Lakin "ruhi xəstə"nin hücum obyekti kimi niyə kilsəni, Tövrat və İncili deyil, məhz məscidi və Quranı hədəf alması izah olunmur.
Bu hadisədən cəmi bir neçə gün əvvəl Fransada baş vermiş digər bir qanlı olay - tunislinin öldürülməsi qəzəb dalğasına səbəb olmuşdur. Fransızəsilli şübhəlinin tunisli qonşusunu güllələdiyi, digər türkəsilli qonşusunu isə yaraladığı və nifrətlə dolu irqçi videolar yaydığı iddia edilir. Kot d'Azur bölgəsinin daxili hissəsində törədilən bu cinayətdən iki gün sonra Fransanın terrorizm işləri üzrə prokurorluğu işə qarışıb.
Prokurorluq irqi nifrət zəminində törədilən qətldə şübhəli bilinən şəxslə bağlı istintaqa başlayıb. Daxili işlər naziri Brüno Retayyo "X" sosial şəbəkəsində "İrqçilik ciddi şəkildə cəzalandırılmalıdır" deyə yazıb. Onun sözlərinə görə, şübhəlinin videoları irqçilik motivinin olmasını tam təsdiqləyir.
Xatırladaq ki, aprelin sonunda Fransada daha bir səs-küylü qətl hadisəsi baş vermişdi. Malidən olan bir kişi Fransanın cənubundakı məsciddə bıçaqlı hücum nəticəsində həlak olmuşdu. Cinayətkar ona 50-dən çox bıçaq zərbəsi vurmuş, törətdiyi cinayəti mobil telefonu ilə çəkmiş və islamofobik ifadələr işlətmişdir.
Rizvan CƏFƏROV,
"Azərbaycan"
jpeg_1766065291.jpeg)
jpeg_1766054270.jpeg)
