Fransa hökuməti tətilçiləri hədələyir

Qısa fasilədən sonra Fransanı yenidən tətillər bürüyüb. "Total" və "Exxon" şirkətlərinin neft emalı zavodlarının işçilərinin artıq üçünçü həftədir ki, davam edən tətili nəticəsində ölkənin regionlarında yanacaq qıtlığı yaranıb. Həmkarlar ittifaqları təşkilatları işçilərin əməkhaqlarının 10 faiz artırılmasını tələb edir və tətili dayandırmaq niyyətində olmadıqlarını bildirirlər.
Fransanın baş naziri Elizabet Bornun neft anbarlarının hərbçilərin iştirakı ilə rekvizisiya olunacağı barədə hədəsinə baxmayaraq, Normandiyanın Port Jerom şəhərindəki neft emalı zavodunda keçirilən tətil yenidən bərpa olunub.  Frans Press agentliyi xəbər verir ki, Fransa hökumətinin formal olaraq başlatdığı prosedura əsasən, yəni məhkəmə təqibi təhlükəsi altında "Esso" şirkətinin Notr-Dam-de - Qravenşon şəhərindəki neft bazasının əməkdaşları işə getməyə məcbur edilə bilər. Lakin bu halda neftçilər də məhkəməyə müraciət etməklə hədələyirlər.
"Exxon Mobil" şirkətinin həmkarlar ittifaqlarının əlaqələndiricisi Kristof Ober neftçilərin tətil hüququnun pozulmasından  şikayətlənir: "Bilməlisiniz ki, biz mübarizə aparacağıq, bu qərar tətil hüququmuza açıq-aşkar meydan oxuyur! Təəssüflər olsun ki, artıq qanuna əməl olunmur, azadlıqlarımız pozulur. Bizim tətil hüququmuz birbaşa hücuma məruz qalır, buna imkan verməyəcəyik".
Çərşənbə günü Fransadakı yeddi neft emalı zavodundan altısını, o cümlədən "Exxon Mobil" şirkətinin iki zavodunu yenidən tətil dalğası bürüyüb.  
Fransa Prezidenti Emmanuel Makron həmkarlar ittifaqlarını tətilləri dayandırmağa çağırıb və eyni zamanda bildirib ki, enerji şirkətlərinin rəhbərləri işçilərin qanuni əməkhaqqı tələblərinə əməl etməlidirlər.
Hazırda ölkədəki yanacaqdoldurma məntəqələrinin təxminən 30 faizi bağlanıb və ya bütün yanacaq növlərini təklif edə bilmir. Paris bölgəsində və Yuxarı Fransada xüsusilə ağır vəziyyət yaranıb. Bəzi departamentlər məhdudiyyətlər tətbiq ediblər və bir avtomobil üçün 30 litrdən çox yanacaq verilmir.
Tətillər Fransada çox fərqli reaksiyalara səbəb olub, bəzi vətəndaşlar yanacaq çatışmazlığından narazılıqlarını ifadə edir və onlara işləmək üçün avtomobillərə ehtiyac olduğunu xatırladırlar. 
Ancaq tətilçilərə rəğbət bəsləyənlər də az deyil. Xüsusən də yaşayış dəyərinin yüksəlməsi və  enerji şirkətlərinin gəlirlərinin sürətlə artması fonunda əhali tətilçiləri müdafiə edir. 
Ümumilikdə son vaxtlar Fransada tətillər ənənəvi hal alıb. Məsələn, bu il iyunun 2-də energetika və qaz işçilərinin ümummilli tətili səbəbindən ölkənin 200 min sakini işıqsız qalıb, onlar da maaşların artırılmasını tələb ediblər. Həmin gün ölkə diplomatları da tətilə başlayıblar. Onlar Xarici İşlər Nazirliyində aparılan islahatlara etiraz ediblər. İslahatlar nəticəsində Fransada XİN işçilərinin sayı iki dəfə azaldılmalıdır.
Bu ilin əvvəlində həmçinin Parisdə nəqliyyat işçiləri maaşların artırılması tələbi ilə tətil keçiriblər. Nəticədə fevralın 18-də Paris metrosu işləməyib. 
Bu siyahıda "sarı jiletlilər"in mütəmadi tətilləri və qalmaqallı etiraz aksiyaları da xüsusi  yer tutur.

Rizvan CƏFƏROV,
"Azərbaycan"