Mayın 13-də İtaliyanın paytaxtı Romada Bakı Təşəbbüs Qrupunun (BTQ) və Korsikanın müstəqilliyi uğrunda mübarizə aparan "Nazione" Hərəkatının birgə təşkilatçılığı ilə "Milli kimlik, müqavimət və suverenlik: Korsika üçün perspektivlər" adlı tematik konfrans keçirilib. Konfransda "Nazione" Hərəkatının üzvləri Fransa müstəmləkə siyasətindən əziyyət çəkən Korsika xalqının qarşılaşdığı çətinliklər, Korsika milli kimliyinin və dilinin Fransa hökuməti tərəfindən məqsədli şəkildə assimilyasiya edilməsi siyasəti kəskin şəkildə pislənib.
Bu barədə "Azərbaycan" qəzetinə danışan Milli Məclisin deputatı Pərvanə Vəliyeva bildirib ki, Korsika xalqının öz ana dilində danışmaq istəyinin kolonial Fransa tərəfindən qarşısının alınmasına beynəlxalq ictimaiyyət səssiz qalır. Fransa özünü uzun illərdir insan hüquqları və azadlıqlarının beşiyi kimi təqdim etsə də, Korsika məsələsində tətbiq etdiyi siyasət tamamilə ziddiyyətlidir. Siyasi fəalların həbs olunması, milli kimliyin zorla assimilyasiya olunması və dil hüquqlarının sistemli şəkildə məhdudlaşdırılması beynəlxalq hüquq normalarının, demokratik dəyərlərin və insan haqlarının kobud şəkildə pozulmasıdır. Fransanın bu addımları təkcə Korsika xalqına qarşı deyil, həm də beynəlxalq ictimaiyyətin qəbul etdiyi hüquqi və etik normalara qarşı hörmətsizlikdir. Bu kontekstdə beynəlxalq təşkilatlar, insan hüquqları institutları və Qlobal Cənub dövlətləri məsələyə daha ciddi diqqət yetirməli, Fransa hökumətinə qarşı siyasi və hüquqi təzyiqlər göstərməlidirlər.
"Ötən il yanvarın 28-də Korsikada 700-ə yaxın insan müstəqillik uğrunda mübarizə aparan strukturları və fəalları birləşdirən, Fransa müstəmləkə hökmranlığına qarşı mübarizəyə sadiqliyini təsdiqləyən "Nazione" hərəkatı təsis edilmişdi. Lakin yarandıqdan 2 gün sonra "Nazione"nin iki fəalı Fransa Milli Terrorla Mübarizə Prokurorluğunun göstərişi ilə həbs edilərək əvvəlcə Borgu hərbi düşərgəsinə, oradan isə terrorçu kimi Parisə aparılmışdı. Həbs edilənlərin ailə üzvləri, eləcə də digər bir fəal dindirilmək üçün polisə gətirilmişdi", - deyə o əlavə edib.
Deputat qeyd edib ki, bu hadisə Korsikada insanların azad şəkildə fikirlərini ifadə etmək hüququna hörmət edilmədiyinin açıq sübutu idi. Özünü insan hüquqlarının vətəni kimi təqdim edən bir ölkədə bu cür zorakılıqlar Fransanın hələ də müstəmləkəçi təfəkküründən xilas olmadığını, hazırkı kaloniyalarında insanların təməl hüquqlarına hörmət etmədiyini bir daha təsdiqləyir. Bu gün də Fransa polisinin qanunsuz təqibləri davam edir və Korsika xalqını qorxutmaq, müstəqillik tərəfdarlarını susdurmaq məqsədi daşıyır. 150 mindən artıq insanın danışdığı Korsika dilini məhv etmək siyasəti yürütməklə Korsika xalqının milli kimliyini unutdurmağa çalışan Fransa yerli parlamentdə müzakirələr, parlament üzvlərinin debatları zamanı Korsika dilindən istifadəni qadağan edib.
P.Vəliyeva vurğulayıb ki, bu siyasət universal insan haqları və milli azlıqların hüquqları ilə bağlı Fransanın beynəlxalq öhdəliklərini açıq-aşkar və güc tətbiqi ilə pozması deməkdir: "Fransa ərazisində yaşayan xalqların milli kimliyini inkar edir, yalnız "fransız" anlayışını qəbul edir ki, bu özü şovinizmdir. Fransa Korsikada yerli dildən istifadə hüququnu ləğv etməklə özünün də qoşulduğu beynəlxalq sənədlərin tələblərini, götürdüyü öhdəlikləri pozub. Sənədlər içərisində 1789-cu il Fransa inqilabının fərdi insan hüquqlarını təyin edən ən vacib sənədi olan "İnsan və vətəndaş hüquqları bəyannaməsi" də var. Həmçinin "Mülki və siyasi hüquqlar haqqında Beynəlxalq Pakt", "Uşaq hüquqları Konvensiyası", "İnsan hüquqları və əsas azadlıqlarının müdafiəsi haqqında Avropa Konvensiyası", "Əsas hüquqlar üzrə Avropa Xartiyası", "Dilçilik Hüquqlarının Ümumdünya Bəyannaməsi", UNESCO-nun mədəni müxtəlifliyə dair universal Bəyannaməsi, UNESCO-nun Mədəni İfadə Müxtəlifliyinin Qorunması və Təşviqi üzrə Konvensiyası, "Regional və ya Azlıqların Dilləri üçün Avropa Xartiyası" və sairə bura daxildir. Korsika xalqının mübarizəsi yalnız bir adanın azadlıq arzusu deyil, bu, milli kimlik, dil, mədəni irs və insan ləyaqəti uğrunda mübarizənin simvoludur. Azərbaycanın bu məsələdə nümayiş etdirdiyi prinsipial mövqe isə beynəlxalq ədalətin bərpası yolunda nümunəvi addımdır".
Siyasətçi sonda ötən il Milli Məclisdə Korsika Xalqına Dəstək Qrupunun yaradıldığını da xatırladıb.
Əsmər QARDAŞXANOVA,
"Azərbaycan"
