Dünyada milyonlarla insan hər gün atdıqları addımların sayını hesablamaq üçün ağıllı saatlar taxır və ya smartfon proqramlarından istifadə edir. Bəs sağlamlığı yaxşılaşdırmaq üçün optimal rəqəm neçədir?

AZƏRTAC xarici KİV-ə istinadla xəbər verir ki, İspaniyanın Qranada Universitetinin alimləri tərəfindən aparılan tədqiqat insanların çoxunun ən böyük fayda əldə etdiyi addımların ən yaxşı sayını ilk dəfə açıqlayıb. Gəzinti sürətinin sağlamlıq üçün əlavə üstünlüklər verdiyi də aşkar edilib.

Gündə 10 min addım atmaq təklifi ilk dəfə Yaponiyada təxminən 60 il əvvəl bəzi insanlar pedometrlərdən istifadə etdikdə ortaya çıxıb, lakin heç kim bunu elmi əsaslarla sübut etməyib. Tədqiqatçılar indi bildiriblər ki, ürək-damar xəstəliklərindən ölüm riskinə diqqət yetirsək, faydaların çoxu təxminən 7000 addımda görülür. Belə ki, insan addımının orta uzunluğunun kişilər üçün 76 santimetr və qadınlar üçün 67 santimetr olduğunu nəzərə alsaq, 7000-8000 addım atmaq gündə təxminən 6,4 kilometr piyada getməyə bərabərdir.

Tədqiqatçılar, həmçinin qeyd ediblər ki, yeridiyimiz tempin əlavə faydaları var və sürətli yerimək daha yaxşıdır. Ürək-damar xəstəliyindən ölüm riskinə gəldikdə, faydaların əksəriyyəti təxminən 7000 addımda görülür.

Tədqiqat bu yaxınlarda kardiologiya sahəsində dünyanın aparıcı “The Journal of the American College of Cardiology” jurnalında dərc edilib. Alimlər Hollandiyanın Radbud Universitetinin Tibb Mərkəzindən, İspaniyanın Qranada və Kastilya-La Mança universitetlərindən və ABŞ-ın Ayova Dövlət Universitetindən olublar. Onlar 2022-ci ilin oktyabr ayına qədər 110 mindən çox insanın iştirak etdiyi sistematik araşdırma, habelə meta-analiz aparıblar. Müəyyən olunub ki, fiziki aktivliyi aşağı olan insanlar üçün hər əlavə 500 addım sağlamlığı yaxşılaşdırır. Təəccüblüdür ki, araşdırma kişilər və qadınlar arasında heç bir fərq olmadığını ortaya qoyub. Eyni zamanda, daha sürətli yerimək də addımların sayından asılı olmayaraq, ürək-damar sistemini möhkəmləndirir.

Alimlər bildiriblər ki, daha çox addımlar heç vaxt zərərli deyil. Gündəlik 16 min addım atmağın belə heç bir zərəri yoxdur. Lakin addım hədəfi də insanın yaşına uyğun olmalıdır, gənclər yaşlı insanlardan daha yüksək hədəf təyin edə bilməlidir. Onu da qeyd etmək lazımdır ki, tədqiqat yalnız addımların sayının bütün səbəblərdən ölüm və ürək-damar xəstəlikləri riskinə təsirini nəzərdən keçirib. Orta və hətta güclü fiziki fəaliyyətin bir çox sağlamlıq faydaları ilə, o cümlədən yuxu keyfiyyətinin və psixi sağlamlığın yaxşılaşdırılması ilə əlaqəli olduğunu göstərən başqa tədqiqatlar və çoxlu elmi sübutlar da var.

Alimlər qeyd ediblər ki, fiziki fəaliyyətlə bağlı tövsiyələr böyüklərə həftədə 150-300 dəqiqə orta intensivlikdə məşq etməyi tövsiyə edir, lakin insanların çoxu hansı məşqlərin orta intensivlik sayıldığını bilmir, bu isə onların bu məşq standartına uyğunluğunu yoxlamağı çətinləşdirir. Addımları saymaq daha sadədir, xüsusən də bu gün insanların çoxunun smartfonu və ya ağıllı saatı var.