İqtisadi İslahatların Təhlili və Kommunikasiya Mərkəzinin (İİTKM) operatoru olduğu “Enterprise Azerbaijan” portalı və ABŞ-ın Nevada Universitetinin Özmən Sahibkarlıq Mərkəzinin birgə təşəbbüsü ilə reallaşdırılan “Startup School 3” layihəsi çərçivəsində “Yaşıl və Rəqəmsal İpək Yolu” (Green and Digital Silk Road) beynəlxalq akselerasiya proqramının rəsmi açılış mərasimi keçirilib.
İİTKM-dən AZƏRTAC-a bildirilib ki, tədbirin açılışını Mərkəzin icraçı direktoru professor Vüsal Qasımlı edib. O, çıxışında “Startup School” layihələrinin innovasiya və sahibkarlıq ekosisteminin inkişafındakı rolunu vurğulayıb, proqramın əvvəlki mərhələlərdə region ölkələri arasında innovativ əməkdaşlıq platforması yaratmaq baxımından əhəmiyyətini diqqətə çatdırıb. Vüsal Qasımlı qeyd edib ki, layihə startapların bilik və bacarıqlarının artırılmasına, onların innovasiya ekosisteminə inteqrasiyasına və qlobal bazarlara çıxışına mühüm töhfə verir.
Tədbirdə, həmçinin İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov və Bərpa Olunan Enerji Mənbələri Dövlət Agentliyinin direktoru Cavid Abdullayev çıxış ediblər. Onlar innovasiya sahəsində bu cür beynəlxalq təşəbbüslərin önəmini vurğulayaraq, dövlət qurumları ilə startaplar arasında əməkdaşlığın gücləndirilməsinin vacibliyini qeyd ediblər.
“Enterprise Azerbaijan” portalının rəhbəri İsa Qasımov “Startup School 3” layihəsi ilə bağlı ətraflı təqdimatla çıxış edib. O, bu mərhələdə layihəyə olan beynəlxalq marağın və geniş tərəfdaşlıq imkanlarının Azərbaycanın innovasiya ekosisteminin uğurlu inkişaf göstəricisi olduğunu bildirib.
“Startup School 3” layihəsinin tərəfdaşları “Caucasus Ventures” vençur fondunun rəhbəri Məmməd Kərim və “Baku Holiday Travel” şirkətinin direktoru Ramil Rzayev çıxışlarında layihə çərçivəsində əməkdaşlıq imkanlarından məmnunluq ifadə edərək, bu tip təşəbbüslərin birgə təşkilinin ekosistem üçün daha uğurlu nəticələr gətirəcəyini vurğulayıblar. Onlar bildiriblər ki, akselerasiya proqramı ümumilikdə ekosistemin inkişafına ciddi töhfələr verməklə yanaşı, tərəfdaş təşkilatların da bu sahədə inkişafına, xüsusilə ekosistem oyunçuları arasında əlverişli əməkdaşlıqların formalaşmasına təkan verir.
Qeyd edək ki, “Startup School 3” layihəsi çərçivəsində “Yaşıl və Rəqəmsal İpək Yolu” beynəlxalq akselerasiya proqramına Azərbaycan, Türkiyə, Pakistan, Qırğızıstan, Gürcüstan və Cənubi Koreyadan ümumilikdə 148 müraciət daxil olub. Onlardan 126 layihə ilkin seçim mərhələsini uğurla keçərək akselerasiya proqramının təlim sessiyalarında iştirak hüququ qazanıb.
Təlim və mentorluq xidmətləri avqust, sentyabr və oktyabr aylarında beynəlxalq səviyyəli ekspertlər tərəfindən həyata keçiriləcək. Proqramın yekun mərhələsində – Demoday tədbirində – seçilmiş startaplar beynəlxalq vençur fondlarının nümayəndələrindən ibarət jüri qarşısında təqdimatla çıxış edəcəklər.
“Enterprise Azerbaijan” portalı akselerasiya proqramının icrasında 10 ölkədən 39 təşkilatla – 21 yerli və 18 xarici qurumla əməkdaşlıq edir. Proqrama ABŞ, Türkiyə, Pakistan, Malta və Azərbaycanı təmsil edən 5 vençur fondu da tərəfdaş kimi qoşulub.
“Startup School 3” layihəsi innovativ ideyaların dəstəklənməsi, dayanıqlı və rəqəmsal sahibkarlıq mühitinin təşviqi, eləcə də regional və beynəlxalq şəbəkələrin qurulması baxımından əhəmiyyətli platforma kimi çıxış edir.
