Azərbaycan Respublikası Hökuməti ilə Amerika Birləşmiş Ştatları Hökuməti arasında imzalanmış Strateji Tərəfdaşlıq Xartiyasında süni intellekt, rəqəmsal infrastruktur, kibertəhlükəsizlik və müdafiə əməkdaşlığı prioritet istiqamətlər kimi müəyyənləşdirilib. Sənəddə AI data mərkəzlərinin inkişafı, texnologiyaların mühafizəsi və könüllü ötürülməsi, mühüm infrastrukturun qorunması, eləcə də hökumətlərarası və dövlət-özəl tərəfdaşlıq mexanizmlərinin yaradılması xüsusi vurğulanır. Bu çərçivədə kibertəhlükəsizlik məsələsi həm iqtisadi-rəqəmsal transformasiyanın, həm də milli təhlükəsizliyin əsas komponentlərindən biri kimi ön plana çıxır. Süni intellekt üzrə data mərkəzlərinin yaradılması ölkənin texnoloji inkişafı baxımından strateji əhəmiyyət daşıyır.
Bu fikirləri AZƏRTAC-a açıqlamasında Azərbaycan Kibertəhlükəsizlik Təşkilatları Assosiasiyasının (AKTA) eksperti Rəşad Əliyev bildirib.
Onun sözlərinə görə, elə yüksək texnologiyalı avadanlıqlar var ki, onların satışı və ölkəyə gətirilməsi yalnız dövlət səviyyəsində xüsusi icazələr əsasında mümkündür. “Xüsusi çiplərlə təchiz olunmuş süni intellekt superkompüterləri ölkəyə gətirildiyi təqdirdə, onların əsasında müxtəlif AI modelləri hazırlamaq olar. Bu modellər təkcə mülki sahələrdə deyil, eyni zamanda kibertəhlükəsizlik istiqamətində də tətbiq edilə bilər. Xüsusilə müdafiə, simulyasiya və müxtəlif testlərin aparılması baxımından bu imkanlar olduqca faydalıdır”, – deyə ekspert vurğulayıb.
Ekspert qeyd edib ki, texnologiya sahəsində ABŞ-ın böyük təcrübə və potensiala malik olması bu əməkdaşlığa əlavə dəyər qazandırır. “Fikir və təcrübə mübadiləsi aparılarsa, ölkədə bu sahədə fəaliyyət göstərən kadrların peşəkar inkişafı da sürətlənər. Eyni zamanda, yeni məhsulların və startapların formalaşması üçün real imkanlar yaranar”, – deyə o əlavə edib.
Ekspertin fikrincə, ekosistemin dayanıqlılığının artırılması üçün yeni texnoloji məhsulların və startapların inkişafına sistemli dəstək vacibdir. “Amerika bazarına çıxış imkanları, eləcə də bu sahədə fəaliyyət göstərən startaplar və şirkətlər arasında fikir və məlumat mübadiləsi daha dayanıqlı və rəqabətqabiliyyətli məhsulların ortaya çıxmasına səbəb olacaq. Bu isə gələcəkdə sahə üzrə yaranacaq çağırışlara cavab vermək, tövsiyə və həll mexanizmləri formalaşdırmaq baxımından mühüm üstünlüklər yaradır”, – deyə Rəşad Əliyev bildirib.
