Yeni tarif siyasəti, kəskin azalan qanunsuz miqrasiya, tarixin ən böyük iqtisadiyyatını yaratmaq vədi
ABŞ Prezidenti Donald Tramp ikinci səlahiyyət müddətinin ilk 100 günündə sərhəd təhlükəsizliyi və iqtisadi artımla bağlı əhəmiyyətli irəliləyişlər olduğunu bildirib. Bu barədə Ağ Ev rəhbəri Miçiqan ştatında öz işinin ilkin nəticələrinə yekun vuran çıxışı zamanı məlumat verib.
Amerika liderinin sözlərinə görə, 100 gün ərzində Vaşinqtonda, demək olar ki, bir əsrin ən radikal islahatları aparılıb. Tramp açıqlamasında sərhəd təhlükəsizliyi tədbirləri və iqtisadi təşəbbüslərə diqqət çəkib, üç ay ərzində həm daxili, həm də xarici siyasətdə mühüm nəticələrin əldə olunduğunu vurğulayıb. O həmçinin bildirib ki, Demokratlar Partiyası etimadı itirib, respublikaçılar isə xeyli güclənib.
Qanunsuz miqrasiya kəskin azalıb
Tramp qeyd edib ki, onun əsas kampaniya vədlərindən biri də sərhəddən qanunsuz miqrasiyanın dayandırılması idi: "Biz qanunsuz sərhəd keçidlərinin ən aşağı sayına görə rekord vurmuşuq. Bizim administrasiyamız dövründə bu hallar 99,99 faiz azalıb. Bu, rekord göstəricidir".
Ağ Ev rəhbəri sələfi Co Baydeni sərhəd təhlükəsizliyinə etinasızlıqda ittiham edərək demokratların hakimiyyəti dövründə cinayətkarların ölkəyə maneəsiz daxil olduğunu qeyd edib: "Biz əvvəllər başqa ölkələr üçün mübarizə aparırdıq, amma özümüz üçün yox. İndi sizin ölkəmizi və sərhədlərimizi qoruyan bir prezidentiniz var". O, həmçinin Latın Amerikası quldur dəstələrinin bəzi üzvlərinin xarici terror təşkilatları kimi tanındığını və Salvadora deportasiya edildiyini bildirib. Prezidentin çıxışı zamanı bu cür saxlanmaların nümunələrinin əks olunduğu videoçəkiliş nümayiş etdirilib.
"Amerika Çindən daha vacibdir"
Tramp vurğulayıb ki, onun administrasiyası tarif siyasəti vasitəsilə Çinlə ticarət kəsirini azaltmağa çalışır. O, Baydenin dövründə Çinə bir çox iş yerlərinin verildiyini, indi isə onların ABŞ-yə qaytarılacağını bildirərək deyib:"Mən Çini deyil, Miçiqan və Amerikanı birinci yerə qoyuram. Çinə tətbiq edilən tariflər sayəsində biz tarixdəki ən böyük iş oğurluğuna son qoyduq. Artıq heç bir ölkə ticarət tarifləri vasitəsilə Amerikanı istismar edə bilməyəcək".
"Tarixin ən böyük iqtisadiyyatını yaradacağıq"
İqtisadiyyatdan danışan Trump, "çox səriştəli olmayan FES işçisinə" baxmayaraq, inflyasiyanın azalmasına işarə edib.
Bununla belə, ABŞ Prezidenti Federal Ehtiyat Sisteminə hörmətlə yanaşmaq istədiyini vurğulayaraq onu tənqid edib: "Onları tənqid etməyin mənası yoxdur, onlara öz işləri ilə məşğul olmaq icazəsi verilməlidir. Amma mən faiz dərəcələri haqqında onlardan daha çox məlumatlıyam".
Bundan əlavə, Tramp qeyd edib ki, Vaşinqton Pekinlə münasibətləri kəsmir: "Hazırkı rüsum dərəcəsi 145 faiz təşkil edir, bu, sıfırdan çox uzaqdır, lakin mən əminəm ki, biz həll yolu tapacağıq. Çin saziş istəyir və biz bunu edəcəyik. Amma ədalətli olacaq".
Çıxışı zamanı Tramp inflyasiyaya qalib gəlməyə, maaşları artırmağa və "bəşər tarixində ən böyük iqtisadiyyatı" yaratmağa söz verib.
Rizvan CƏFƏROV,
"Azərbaycan"
