ABŞ Prezidenti Donald Tramp cümə axşamı günü Kanadaya tarif hücumunu gücləndirib. O, Birləşmiş Ştatların gələn ay idxala 35 faizlik tarif tətbiq edəcəyini və əksər digər ticarət tərəfdaşlarına 15 və ya 20 faizlik geniş əsaslı tariflər tətbiq etməyi planlaşdırdığını bildirib.
AZƏRTAC xəbər verir ki, Tramp özünün sosial media platformasında yazdığı məktubda Kanadanın Baş naziri Mark Karniyə yeni tarifin avqustun 1-dən qüvvəyə minəcəyini və qonşu ölkənin cavab tədbirləri görəcəyi təqdirdə bu rəqəmin artırılacağını qeyd edib.
“Reuters” xəbər verir ki, Mark Karni cümə axşamı “X” sosial platformasında paylaşımında bildirib ki, onun hökuməti son tarix yaxınlaşdıqca ABŞ ilə danışıqlarda kanadalı işçilərin və müəssisələrin mənafelərini qorumağa davam edəcək.
Bildirilir ki, 35 faizlik rüsum Trampın Kanadaya tətbiq etdiyi indiki 25%-lik tarifdən artıqdır və Vaşinqtonla ticarət sazişi bağlamağa çalışan Karniyə vurulan zərbədir.
ABŞ-Meksika-Kanada Müqaviləsinin (USMCA) əhatə etdiyi mallar üçün istisnanın qüvvədə qalacağı, enerji və gübrələrə tətbiq edilən 10 faizlik tariflərin də davam edəcəyi gözlənilir, baxmayaraq ki, Tramp bu məsələlərlə bağlı hələ yekun qərar verməyib. Bu barədə ABŞ administrasiyasının rəsmisi bildirib.
Trampın məktubunda Kanadadan gələn fentanil axını və Amerika südçülərinə zərər verən tarif və qeyri-tarif ticarət maneələrindən narazılıq ifadə edilib. O, ticarət kəsirinin ABŞ iqtisadiyyatı və milli təhlükəsizliyi üçün təhdid olduğunu bildirib.
Donald Tramp yazıb: “Əgər Kanada fentanil axınının qarşısını almaq üçün mənimlə əməkdaşlıq edərsə, biz bu məktubu dəyişdirmək barədə düşünə bilərik”.
Kanada rəsmiləri deyirlər ki, ABŞ-a az miqdarda fentanil Kanadadan gəlir, lakin onlar sərhədi qorumaq üçün müvafiq addımlar atıblar.
Donald Tramp son günlər ticarət müharibəsini genişləndirib, müttəfiqləri Yaponiya və Cənubi Koreya da daxil olmaqla bir sıra ölkələrə yeni tariflər, həmçinin misə 50 faizlik rüsum tətbiq edib. Onun son çıxışı investorları bir daha çaşdırıb. Asiya bazarlarında ABŞ və Avropa fond fyuçersləri cümə günü aşağı həddə düşüb, çünki bazarlar ABŞ Prezidentinin cümə günündən sonra Avropa İttifaqına hansı tarifləri tətbiq edəcəyi barədə məlumatı əsəbi şəkildə gözləyir.
jpg_1765706081.jpg)
