Əhalinin əksəriyyətini narahat edən bir məsələdən söz açmaq istəyirəm. Bu, elektrik sayğaclarının harada qoyulması ilə bağlıdır. Biz Bərdə rayonunun Alaçadırlı kəndində yaşayırıq. Xeyli əvvəl kənddə köhnə elektrik naqilləri dəyişdirilmiş, yeni sim kabel xətləri çəkilmişdir. Artıq elektrik enerjisinin verilməsindəki fasilələr tamamilə aradan qaldırılmışdır. Kəndimizə gecə-gündüz, fasiləsiz enerji verilir. Bu çox yaxşıdır. Belə rahatlığı bizə bəxş edənlərə minnətdarıq. Amma bir məsələ bizi narahat edir. Elektrik sayğacının çöldə qoyulmasından narazıyıq. Yaşadığımız problem belə deməyə əsas verir. Bu yaxınlarda bir müddət evdə olmadıq. Qayıdıb gələndə dedilər ki, sayğacımızın plombu qırılıb. Buna görə cərimə olunduq. Axı həyətin çölündə olan sayğaca mən necə nəzarət edə bilərəm? Yaxşı olar ki, sayğac həyətin içərisində qoyulsun. Belə olarsa, ona nəzarət etmək mümkündür. Yoxsa həyətin çölündə qoyulan sayğaca yoldan ötən əli dinc durmayanın zərər yetirməsi adi haldır. Hətta belə söz də gəzir ki, plomb qırılması “əməliyyatında” montyorların da barmağı var.
İstəyimiz budur ki, müəyyən edilmiş qaydalara yenidən baxsınlar (əgər elə bir qayda varsa). Kənd yerlərində elektrik sayğaclarının həyətin içəri tərəfində qoyulması daha məqsədəuyğun olar.
Ruslan HÜSEYNOV,
Bərdə rayonu, Alaçadırlı kəndi
Redaksiyadan:
Problemin aktuallığını nəzərə alaraq başlığa çıxarılmış sualla Bakı Hüquq Mərkəzinə müraciət etdik. Məsələyə hüquqi müstəvidə aydınlıq gətirilməsi ilə bağlı xahişimizə mərkəzin hüquq məsləhətçisi Dünyamin NOVRUZOVUN hazırladığı cavabı diqqətinizə çatdırırıq:
Azərbaycan Respublikası Nazirlər Kabinetinin 2 fevral 2005-ci il tarixli 18 nömrəli Qərarı ilə təsdiq edilmiş “Elektrik enerjisindən istifadə Qaydaları”nın 7.11-ci bəndinə görə, yaşayış binalarının girişində, yaxud pilləkən meydançalarında quraşdırılmış mənzillər üzrə hesablaşma elektrik sayğaclarının, o cümlədən üzərindəki plombların qorunmasına və işçi vəziyyətdə saxlanılmasına görə enerji təchizatı müəssisəsi cavabdehlik daşıyır. Mənzildə, yaxud xüsusi yaşayış evində quraşdırılmış hesablaşma elektrik sayğacının, o cümlədən üzərindəki plombların qorunmasına və onun işçi vəziyyətdə saxlanılmasına görə mənzil (xüsusi yaşayış evinin) kirayəçisi və ya mülkiyyətçisi cavabdehlik daşıyır.
Azərbaycan Respublikası Nazirlər Kabinetinin 17 iyul 2014-cü il tarixli 262 nömrəli Qərarı ilə təsdiq edilmiş “Sudan istifadə Qaydaları”nın 6.4-cü bəndinə görə, yaşayış binalarının girişində və pilləkən qəfəslərində quraşdırılmış suölçən cihazların işlək vəziyyətdə saxlanılmasına, o cümlədən üzərindəki plombların toxunulmazlığına su təchizatı və kanalizasiya müəssisəsi, mənzillərdə, fərdi yaşayış evlərində və həyətyanı sahələrdə quraşdırılmış suölçən cihazların işlək vəziyyətdə saxlanılmasına, o cümlədən üzərindəki plombların toxunulmazlığına isə istehlakçı cavabdehlik daşıyır.
Göründüyü kimi, çoxmənzilli binalarda elektrik və su sayğacı yaşayış binasının girişində, yaxud pilləkən meydançasında quraşdırılmışsa, onda həmin sayğacların, o cümlədən üzərindəki plombların qorunmasına və işçi vəziyyətdə saxlanılmasına görə müvafiq təchizat müəssisəsi cavabdehlik daşıyır. Eyni qayda, fərdi yaşayış evlərindən kənarda (məsələn, küçədə, evin küçə divarında) quraşdırılmış sayğaclara münasibətdə də tətbiq edilir. Əgər elektrik və su sayğacı mənzildə, fərdi yaşayış evində və həyətyanı sahədə quraşdırılmışsa, onda həmin sayğacın işlək vəziyyətdə saxlanılmasına, o cümlədən üzərindəki plombların toxunulmazlığına görə istehlakçı cavabdehlik daşıyır.
Azərbaycan Respublikası Nazirlər Kabineti qaz sayğacına münasibətdə bir qədər fərqli qayda müəyyənləşdirmişdir. Belə ki, qaz sayğaclarının üzərində olan plomblar kənar müdaxilələrdən qorunmaq üçün müvafiq örtüklə örtülməli (fiziki şəxs olan istehlakçıların sayğacları qaz paylayıcısı tərəfindən) və sayğac göstəricisinə sərbəst şəkildə baxılmasına imkan olmalıdır. Fiziki şəxs olan istehlakçıların qaz sayğaclarının işlək vəziyyətdə saxlanılmasına görə cavabdehliyi qaz paylayıcısı, hüquqi şəxslərin qaz sayğaclarının işlək vəziyyətdə saxlanılmasına görə cavabdehliyi isə özləri daşıyırlar (Azərbaycan Respublikası Nazirlər Kabinetinin 12 may 2011-ci il tarixli 80 nömrəli Qərarı ilə təsdiq edilmiş “Qazdan istifadə Qaydaları”nın 4.7 və 4.8-ci bəndləri).
