Qardaş Türkiyənin hərtərəfli inkişafına nail olan, dünya dövlətləri sırasında ölkəsinin nüfuzunu daha da artıran, sülhün, əmin-amanlığın qorunub saxlanılmasında səy və bacarığını əsirgəməyən, 6 fevral tarixində baş verən zəlzələnin yaralarının sağalması üçün təxirəsalınmaz tədbirlər həyata keçirən, Azərbaycanın ərazi bütövlüyünün bərpası, Qarabağ torpaqlarımızın işğaldan azad edilməsi üçün çox işlər görən, dövrümüzün təkrarsız siyasi xadimi, Türkiyə Respublikasının Prezidenti Rəcəb Tayyib Ərdoğana ithaf olunur.
Nə yaxşı ki bu gün türkün beşiyinin başındasan,
Həm dünənin, həm bu günün, gələcəyin yaşındasan.
Çalxalanan dünyamızdan baş çıxarmaq deyil asan,
Fəqət sənin hünərinlə gəlib türkə təzə bir can.
Anan səni nər doğubdu, ər doğubdu, Ərdoğan!
Hər sözündə qılıncdan da kəsərli bir qətiyyət,
Deyirsən ki, qoy var olsun, qalib gəlsin ədalət.
Qanındadır, canındadır soydan gələn cəsarət.
Görür bunu bütün cahan, bilir bunu dörd bir yan,
Anan səni nər doğubdur, ər doğubdur, Ərdoğan!
Türkün soyu min illərin sınağından keçib gəlib.
Bu yolda gör o, nə qədər cəfalara sinə gərib.
Namərdlərə, nakəslərə heç bir zaman bac verməyib.
Bu gün onun səmasında doğur Günəş, sökülür dan.
Anan səni nər doğubdu, ər doğubdu, Ərdoğan!
Dövlətinin qüdrətini aparırsan irəli,
Gör nə qədər zəfərin var, bunu hər kəs bilməli.
Uğuruna sığal çəkir böyük Yaradan əli.
Çox arzular yetər başa üzümüzə gələn zaman.
Anan səni nər doğubdu, ər doğubdu, Ərdoğan!
İlham sənin, sən İlhamın əziz dostu, qardaşı,
Bir millətin taleyində silahdaşı, sirdaşı.
Tapdalayıb keçirsiniz hər hiyləni, savaşı.
Ayıqsınız, sayıqsınız hər dəqiqə, hər bir an.
Anan səni nər doğubdu, ər doğubdu, Ərdoğan!
Qarabağım azad oldu qardaşlıq köməyinlə.
Namərd düşmən top-tüfəngi geyinsə də əyninə,
Qanmayır ki, qonşuluq nə, insanlıq nə, vicdan nə.
Dayanıbdır başı üstə "dəmir yumruq" hər zaman,
Anan səni nər doğubdu, ər doğubdu, Ərdoğan!
Gör nə qədər bu dünyada zalım var, zülmkar var!
Nalə-fəryad ərşə qalxıb, qulaqlar da olub kar.
Bilinməyir kimdir haqlı, kimdir haqsız, günahkar.
Ürəyinin hökmü ilə deyirsən ki, dur, dayan!
Anan səni nər doğubdu, ər doğubdu, Ərdoğan!
Sən Allahın, təbiətin sınağından keçmisən,
Sevinc görüb, kədərin də acısını içmisən.
El dərdini, ağrısını özününkü bilmisən.
Xalqını da sən özünə uca dağtək arxa san,
Anan səni nər doğubdu, ər doğubdu, Ərdoğan!
Gecə vaxtı yaxaladı deprem yurdun yarısın,
On minlərlə can apardı - kişi, uşaq, qarısın.
Keçmiş olsun, bundan sonra gələn günlər xoş olsun.
Yanındaydı dostlar o gün Batıdan, həm Doğudan,
Anan səni nər doğubdu, ər doğubdu, Ərdoğan!
Türkün himni səslənəndə sevinc doğur gözündə,
Ucalırsan ucalanda bayrağın göy üzündə.
Sağ əlin də sol sinəndə - ürəyinin üstündə.
Vətən, dövlət sənin üçün həm şöhrətdir, həm də şan,
Anan səni nər doğubdu, ər doğubdu, Ərdoğan!
Zaman çarxı min illərdir, dayanmadan fırlanır,
Günəş çıxır, günəş batır, qüdrətindən hey yanır.
Bu get-gəllər dünyasında əməl qalır, ad qalır.
Yüz ildən bir, bəlkə, olar sənin kimi doğulan,
Anan səni nər doğubdu, ər doğubdu, Ərdoğan!
Seyran CAVADOV,
"Azərbaycan"
