Müasir tədqiqatlar təsdiq edir ki, autizm müəyyən genetik mutasiyalarla izah edilə bilər. Çox ehtimal ki, bu əlamətlər uşağa öz atasından irsən keçir. Bununla bərabər, autizm əlamətləri çox olan insanlar qeyri-standart ideyalar irəli sürməyə qadir olur. Belə insanların təfəkkürü eyni bir məsələnin çoxsaylı həllərini axtarmağa yönəlir.
AZƏRTAC “The Daily Mail” nəşrinə istinadla xəbər verir ki, Şərqi İngiltərə Universitetindən və Şotlandiyanın Stirlinq Universitetindən olan psixoloqlar bu nəticəyə gəliblər.
Tədqiqatda autizmə həsr edilmiş saytların 312 istifadəçisi və onların qohumları iştirak edirdi. Alimlər bu insanların təfəkkürünün divergensiyalı olub-olmadığını yoxlamaq üçün onlara təklif ediblər ki, kərpicdən və dəftərxana sancağından istifadə edilməsinin mümkün üsullarını təsvir etsinlər. Bundan sonra psixoloqlar cavabların sayını hesablayıb onların kreativlik dərəcəsini qiymətləndiriblər.
Eksperimentdə iştirak edənlərin hər biri öz ad-soyadlarını göstərmədən onlarda autizm əlamətləri olmasını təyin edən sual kitabçasını doldurmaqla silsilə yaradıcı testlərdən keçmişlər. Tədqiqatın 75 iştirakçısına “Autist spektrin pozulması” diaqnozu qoyulub, qalan iştirakçılara bu cür diaqnoz qoyulmayıb, lakin sınaqlarda iştirak edənlərin bəzilərində oxşar pozuntu əlamətləri və davranışda oxşarlıq aşkar edilib.
Məlum olub ki, eyni məsələnin dörd və daha artıq qeyri-standart həllini təklif edən şəxslərin autizm əlamətləri yüksək səviyyədədir.
Britaniyalı alimlər vurğulayıblar ki, onlar müvafiq diaqnoz qoyulmuş konkret insanları bilərəkdən müayinə etməyiblər, çünki bu cür diaqnoz qoymaq, hətta autizmin ayrı-ayrı əlamətləri olduğu halda da heç də həmişə mümkün deyil.
