Növbəti 3 ildə 100 mindən çox keçmiş məcburi köçkün yurduna qayıdacaq
Milli Ordumuzun rəşadət və şücaəti sayəsində cəmi 44 günlük qısa zaman kəsimində 30 illik Vətən nisgilimizə son qoyuldu. Böyük zəfərdən qısa müddət keçməsinə baxmayaraq, düşmənin viran qoyduğu yurdlarımız sürətlə bərpa olunur, xarabazarlığa çevrilmiş ev-eşiklərimiz yeniləri ilə əvəz edilir.
Prezident İlham Əliyevin birbaşa nəzarəti ilə Qarabağ və Şərqi Zəngəzurda görülən işlərin nəticəsidir ki, Böyük qayıdış proqramı sürətlə icra olunur. İndiyədək ağalılıların, talışlıların, füzulililər və laçınlıların bəzilərinin yurdlarına köçü həyata keçirilib. Növbəti mərhələlərdə digər şəhər və rayonlarımız da əzəli sahiblərinə qovuşacaqlar.
Otuz il ərzində haqları tapdanmış, ermənilər tərəfindən başlarına min bir faciə gətirilmiş, torpaqlarından didərgin salınmış soydaşlarımız Müzəffər Ali Baş Komandanımızın bərpa etdiyi ərazi bütövlüyü sayəsində tədricən öz el-obalarına qayıdırlar.
Bu günədək 2 min 297 keçmiş məcburi köçkünün həsrətinə son qoyulub
Böyük qayıdış hazırda dövlət siyasətimizin əsas prioritetlərindəndir. Qarabağ və Şərqi Zəngəzurda bərpa-quruculuq işləri aparılır, "ağıllı kənd", "ağıllı şəhər" layihələri həyata keçirilir. Yeni avtomobil yolları qurulur, dəmir yolu sistemi yaradılır, hava limanları inşa edilir.
Böyük köçün baş tutduğu ərazilərdə məşğulluq siyasətinə də yüksək dəstək verilir. Ənənəvi məşğuliyyət sahələrinin bərpa edilməsi ilə yanaşı, yeni məşğulluq növlərinin yaradılması da dövlət tərəfindən hazırlanan planın bir hissəsidir. Kənd təsərrüfatı məhsullarının yetişdirilməsi üçün nəzərdə tutulmuş torpaqların reabilitasiyası üzrə tədbirlərə artıq başlanılıb. Artıq 7 min hektar sahədə dənli bitkilərin əkilməsi də həyata keçirilib.
İşğaldan azad edilmiş şəhər və rayonlarda ən böyük problem isə ərazilərin minalanmasıdır. Bu isə böyük səylər tələb edir. Torpaqların böyük bir qisminin minalardan təmizlənməsi isə gələcəkdə yüz min hektarlarla ərazinin əhalinin istifadəsinə verilməsinə şərait yaradacaq.
Məcburi köçkünlərin öz doğma yurdlarına dönüşü üçün Prezident İlham Əliyevin 2022-ci il 16 noyabr tarixli sərəncamı ilə təsdiq edilmiş "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" mərhələ-mərhələ icra olunur.
Proqram çərçivəsində indiyədək 133 ailə (649 nəfərə) Zəngilan rayonunun Ağalı kəndinə, 20 ailə (90 nəfər) Tərtər rayonunun Talış kəndinə, 247 ailə (956 nəfər) Laçın şəhərinə, 144 ailə (514 nəfər) Füzuli şəhərinə, 20 ailə (88 nəfər) Laçın rayonunun Zabux kəndinə köçürülüb. Bu günədək 2 min 297 keçmiş məcburi köçkünün həsrət və nisgilinə son qoyulub. 2026-ci ilədək Qarabağ və Şərqi Zəngəzura 140 min nəfərin məskunlaşması nəzərdə tutulur.
İlin sonunadək doğma yurda qayıdanların sayı 5500-ə çatacaq
Zəngilanda keçirilən 2-ci Milli Şəhərsalma Forumunun açılış mərasimində çıxış edən Prezident İlham Əliyev Böyük qayıdış proqramı və onun icrası çərçivəsində keçmiş məcburi köçkünlər üçün sıfırdan yeni şəhər və kəndlər inşa etməklə, burada müasir texnologiyalar tətbiq etməklə ən yaxşı şərait yaradıldığını bildirib: "Bu gün 8 şəhər və 92 kəndin baş planı artıq təsdiqlənib və 30 kəndin təməli qoyulub. Qarşıdan gələn illərdə çox böyük, irihəcmli yaşayış layihələri həyata keçiriləcək, xüsusən də Şuşa və digər şəhərlərdə. Bu, bizim proqramın tərkib hissəsidir".
Ali Baş Komandan İlham Əliyev bildirib ki, önümüzdəki aylarda bu say daha da artacaq: "Əminəm ki, biz bütün vəzifələrə, hədəflərə nail olacağıq və növbəti üç ildə 100 mindən çox keçmiş məcburi köçkünü evlərinə qaytaracağıq. Yeri gəlmişkən, qeyd edim ki, artıq 2300 məcburi köçkün evlərinə qayıdıb və ilin sonunadək onların sayı 5500-ə çatdırılacaq".
Demək olar ki, işğaldan azad olunmuş ərazilərə qayıdan ailələrin sevinclərini görürük. Keçmiş məcburi köçkünlərin öz torpaqlarına qayıtması ilə bağlı keçirilmiş sorğuya görə, insanların əksəriyyəti dədə-baba yurdlarına geri qayıtmaq arzusundadırlar. Hətta azad olunmuş ərazilərə qayıtmaq istəyən insanlardan ibarət növbə yaranıb. Xalqımızın bu sevincinin, qürurunun və güvəninin səbəbkarı isə Müzəffər Ali Baş Komandanın iradəsi və rəşadətli Azərbaycan Ordusunun şücaətidir.
Ülkər XASPOLADOVA,
"Azərbaycan"
