Uşaq bir dünya sevinc, xoşbəxtlik, evlərdə nur, ürəklərdə fərəh deməkdir. Bir ailənin ümidi, bir millətin gələcəyidir... Bu gün Beynəlxalq Uşaq Günüdür. Günəş gözlü körpələrin, saf ürəkli, gül qoxulu mələklərin günüdür.
Dünyanın hər yerində 1 İyun 1950-ci ildən BMT Assambleyasının qəbul etdiyi qərara əsasən, Beynəlxalq Uşaq Günü kimi qeyd edilir. Nə yazıq ki, bir zamanlar dünyaya körpə kimi gəlib, sonradan insanlığa, bəşəriyyətə meydan oxuyan məkrli siyasətçilərin ambisiyaları ucbatından dünyanın hər yerində uşaqlar gülə bilmirlər, qan gölündə boğulurlar. Həm də yalnız üzlərindəki təbəssümü, gözlərindəki sevinci, arzularını yox, sağlamlıqlarını, ümidlərini, ömürlərini itirirlər. Bu gün Suriyada, İraqda, digər münaqişə bölgələrində körpələrin sabahları qaranlığa açılır. Onların sevincləri alınır, həyatları məhv edilir... Hələ anlamadıqları, dərk etmədikləri dünyalarına son qoyulur. Sevgi, sevinc əvəzinə sinələrində dərd böyüdürlər....
Biz bu yolu keçdiyimizə, bu ağrıları həyatımızda yaşadığımıza görə həmin dərdlərə daha çox yanırıq. Bu acını Ermənistandan, dədə-baba yurdlarımızdan didərgin salınanda yaşamışıq... Xocalının qarlı qışında, Şuşadan didərgin salınanda, Kəlbəcərin keçilməz qarlı aşırımlarından keçib gələndə bu faciənin şahidi olmuşuq. Xain qonşularımızın məkrli niyyətlərini ana bətnindəykən hiss edən körpələrimiz başımıza gələn müsibətləri duyub, yumruqları düyünlənmiş formada doğulurdular. Ürəklərində qisas, qəzəb böyüdürdü körpələrimiz. Bu həmin körpə yumruqları idi ki, böyüyüb bir olub, 44 günlük Vətən müharibəsində "Dəmir yumruğ"a çevrilib xalqımıza qələbə qazandırdı. Tanrıya şükürlər olsun ki, indi yurdun başı üzərində sülh göyərçinləri uçur. Şuşada yenidən arzular, ümidlər doğulur. Körpələrəmizin xoşbəxt gələcəyi naminə indi həmin torpaqlarda uşaq bağçaları, məktəblər, ailə, uşaq sağlamlıq mərkəzləri tikilir. İndi dağlarımızda silah səsi yox, musiqi sədası eşidilir.
Nə xoş ki, siyasətimiz sülh, əməlimiz salehdir. Bu, babalardan miras qalıb bizə. Ulu Öndərdən yadigardır bu sevgi bizlərə. Ölkəmizdə dinindən, milliyyətindən asılı olmayaraq heç bir vətəndaşa fərq qoyulmadığı, arzularının həyata keçməsi, fikirlərini sərbəst ifadə edib, müstəqil fəaliyyət göstərmələri üçün hər cür dövlət dəstəyi göstərildiyi kimi, uşaqlara da böyük qayğı göstərilir. Onların azad, problemsiz, xoşbəxt böyümələri üçün hər cür şərait yaradılır və gündən-günə bu diqqət daha da artır. Gələcəyimizin sağlam, təminatlı, qayğısız və əsl vətəndaş kimi böyüməsi üçün yeni əyləncə mərkəzləri, körpələr evləri, uşaq bağçaları, tibb müəssisələri tikilib istifadəyə verilir. Birinci vitse-prezident, Heydər Əliyev Fondunun rəhbəri Mehriban xanım Əlyevanın və fondun vitse-prezidenti Leyla xanım Əliyevanın hər il Beynəlxaq Uşaq Günü valideyn himayəsindən məhrum olmuş, fiziki qüsurlu uşaqlara baş çəkib onları öz hədiyyələri ilə sevindirməsi, qayğıları ilə məsud etmələri ənənə şəklini alıb. Xalqımızın sevimlisi Mehriban xanımın hər bir xəstə, imkansız uşağa fərdi yanaşaraq dövlətin və fondun hesabına onların müalicələrini təşkil edib sağlam həyata qayıtmalarına illərdir ki, şahidlik edirik.
Yürüdülən sülh siyasətinin şəfqətindən yalnız ölkəmizin balaca vətəndaşları deyil, dünya adlı böyük evimizin sakinləri də pay ala bilirlər. Suriyadan, İraqdan, Ukraynadan gətirilmiş, hər iki valideynini itirmiş, qayğıya möhtac olan uşaqlar dövlətin nəzarəti altında reabilitasiya keçərək, sevgi və isti ocaqla təmin edilir, normal yaşamaları üçün lazımi şərait yaradılır.
Uşaqların xoşbəxt, qayğısız yaşadığı dövlət ən qüdrətli dövlətdir. Çalışaq ki, göylərdə ölüm saçan silahlar deyil, sülh göyərçinləri uçsun. Ölüm saçan silahların səsini yox, körpə gülüşünün şaqraq sədası eşidilsin. Təkcə ilin bir günü yox, bütün günlərimizi gələcəyimizə, uşaqlara həsr edək. Dünyamızı qoruyaq, uşaqları sevək.
Elşən QƏNİYEV,
"Azərbaycan"
