Əsas hədəfimiz insan resursları sahəsində əməkdaşlığımızı tamamilə nəticəyönümlü, ölçüləbilən və dayanıqlı sistemə çevirməkdir.
AZƏRTAC-ın bölgə müxbiri xəbər verir ki, bunu Türkiyə Respublikası Prezident Administrasiyasının Kadrlar və Qaydalar üzrə baş direktoru Bilal Şəntürk Xankəndi şəhərində keçirilən Türk Dövlətləri Təşkilatına (TDT) üzv dövlətlərin insan resurslarının inkişafı üzrə səlahiyyətli qurum rəhbərlərinin V Görüşündə deyib.
Bilal Şəntürkün sözlərinə görə, indiyədək keçirilən toplantılar ölkələrin dövlət qulluğu sistemlərini və tətbiq etdiyi yanaşmaları daha yaxından tanımağa imkan verib.
Türkiyə rəsmisi bildirib ki, üzv ölkələrin təcrübələrinin qarşılıqlı şəkildə paylaşılaraq ümumi faydaya çevrilməsi əsas məqsədlərdən biridir. İnkişaf istiqamətlərinin və strateji prioritetlərin eyni vaxtda müəyyənləşdirilməsi əməkdaşlığın əsasını təşkil edir.
O, texnoloji inkişaf fonunda süni intellekt, kibertəhlükəsizlik və texnoloji savadlılıq kimi bacarıqlara ehtiyacın artdığını, yaradıcı düşüncə, çeviklik, liderlik, əməkdaşlıq və daim öyrənmə kimi bacarıqların da əhəmiyyətini qoruduğunu diqqətə çatdırıb.
Bilal Şəntürk qarşıdakı dövrdə birgə təlim proqramlarının təşkili, rəqəmsal öyrənmə platformalarından qarşılıqlı istifadə, liderlik, istedadların idarə olunması, dövlət qulluqçularının davamlı inkişafı, rəqəmsal insan resurslarının idarə edilməsi və gələcəyin bacarıqlarının inkişafı istiqamətlərində əməkdaşlığın genişləndirilməsinin mümkün olduğunu deyib. Həmçinin dövlət qurumları və mütəxəssislər arasında işgüzar səfərlərin və mübadilə proqramlarının təşkilinin əhəmiyyətini vurğulayıb.
jpg_1789729005.jpg)
