İqtisadiyyat Nazirliyində "Belleqprom" Belarus Dövlət Konserninin sədri Tatyana Luqinanın rəhbərlik etdiyi nümayəndə heyəti ilə keçirilmiş görüşdə yüngül sənaye sahəsində əməkdaşlıq və qarşılıqlı investisiya imkanları müzakirə edilib.
Nazirlikdən AZƏRTAC-a bildirilib ki, nazir müavini Sahib Ələkbərov Azərbaycanda yüngül sənaye mallarının istehsalı və satışı sahəsində mövcud olan imkanlar barədə qonaqlara məlumat verərək, ölkələrimiz arasında ticarət, sənaye və investisiya əməkdaşlığının genişləndirilməsi üçün böyük potensialın olduğunu bildirib.
Ölkəmizin əlverişli biznes mühiti, sənaye zonaları, tranzit və nəqliyyat-logistika imkanları, işğaldan azad edilmiş ərazilərdə investorlara tətbiq edilən güzəştlər, sahibkarlığın inkişafına göstərilən dəstək mexanizmləri qonaqların diqqətinə çatdırılıb.
“Belleqprom” Belarus Dövlət Konserninin sədri Tatyana Luqina birgə istehsal sahələrinin yaradılması, texnoloji həllərin inteqrasiyası üzrə tərəfdaşlıqda maraqlı olduqlarını vurğulayıb. Belarusun yüngül sənaye sektoru, konsernin istehsal və ixrac potensialı barədə məlumat verilib. Yüngül sənaye sahəsinin daxili bazarın təminatı, məşğulluq və regional inkişaf baxımından əhəmiyyəti, təkrar emal texnologiyalarının tətbiqi və innovativ məhsul istehsalı sahəsində təşəbbüslər qeyd edilib.
Görüşdə iştirak edən müəssisə rəhbərləri yüngül sənaye, xüsusilə tekstil sahəsində əməkdaşlığın genişləndirilməsi, qarşılıqlı investisiya qoyuluşu, sənaye parklarında işbirliyi, təcrübə mübadiləsi, kadr hazırlığı sahələrində əməkdaşlığın perspektivlərini müzakirə edib, təkliflərini səsləndiriblər.
Azərbaycan və Belarus şirkətləri arasında əlaqələrin inkişafı ilə bağlı ətraflı fikir mübadiləsi aparılıb.
jpg_1766066117.jpg)
