Minifutbol üzrə milli komandamız Bakıda keçirilən dünya çempionatının qalibi oldu
Möhtəşəm atmosfer, mükəmməl təşkilatçılıq, inanılmaz azarkeş dəstəyi... Bakıda keçirilən minifutbol üzrə dünya çempionatı başa çatıb. Milli Gimnastika Arenasında təşkil olunan final görüşündə Azərbaycan və Macarıstan yığmaları üz-üzə gəlib. Matç komandamızın 4:2 hesablı qələbəsi ilə yekunlaşıb. Milli komandamızın dünya çempionluğu beynəlxalq miqyasda ölkənin imicini qaldırmaqla yanaşı, onun imkanlarını növbəti dəfə nümayiş etdirdi.
Sevindirici haldır ki, Azərbaycanın minifutbolda potensialı ildən-ilə daha da güclənir. Minifutbolçularımızın qazandıqları tarixi zəfər onu göstərir ki, ümumiyyətlə, Azərbaycanda idmanın inkişafı dinamik xarakter daşıyır və idmançılarımız ardıcıl olaraq böyük qələbələr qazanmağa qadirdilər.
Azərbaycan Minifutbol Federasiya (AMF) rəhbərliyi az vaxtda uğura aparan yolun qısa xülasəsini təqdim etdi və bir daha bəlli oldu ki, həqiqətən də istənilən sahədə qısa zamanda uğurun qazanılması mümkündür. Əgər yüksək təşkilatçılıq bacarığı, istedad, peşəkar yanaşma, diqqət və qayğı, ən əsası isə milli ruhun, vətənpərvərliyin ən ali dəyər kimi qəbul edildiyi yerdə zəfər qaçılmazdır. Yalnız azərbaycanlılardan ibarət və milli ruha malik komanda yaradılıb və düzgün idarəetmə sayəsində qısa zamanda yüksək nəticələr əldə edilib.
Dünya çempionatında təşkilatçılıq ən yüksək səviyyədə idi. Göründüyü kimi, qısa müddətdə bu qədər işin görülməsi, həqiqətən, gərgin və fədakar zəhmət tələb edir. Lakin Azərbaycan Minifutbol Federasiyası ən yüksək formada bunun öhdəsindən gəlməyi bacardı. Bakıda mundiala hazırlıq, püşkatma mərasiminin, çempionatın yüksək səviyyədə təşkili üzrə digər işlərin sürətlə həyata keçirilməsi göstərdi ki, AMF rəhbərliyi hazırlıq işlərini göstərilən vaxtda yüksək səviyyədə başa çatdırmaqla misli görünməmiş bir uğura imza atıb.
Azərbaycan Minifutbol Federasiyasının prezidenti Orxan Məmmədov Azərbaycan millisinin Bakıda keçirilən dünya çempionatında qalib olması barədə danışarkən deyib ki, düşüncələrini sözlə ifadə etmək çətindir: "Azarkeşlərimizə və xalqımıza dəstəyə görə təşəkkür edirəm. Yığmamız turnir ərzində demək olar ki, səhvsiz irəlilədi. Macarıstana qarşı final görüşündə də əla mübarizə apardı".
O.Məmmədov ən böyük dəstəyə görə Prezident İlham Əliyevə təşəkkür edib: "Əlbəttə ki, bu tarixi uğur dövlətimizin başçısı İlham Əliyevin xeyir-duası, Azərbaycan Minifutbol Federasiyasına olan dəstəyi sayəsində ərsəyə gəldi. Biz bu işi məhz dövlətin maliyyə və infrastruktur baxımından dəstəyi ilə bacardıq. Prezident İlham Əliyev hər zaman idmana qayğı göstərir. Bundan sonrakı məqsədimiz uşaqları bu idman növünə cəlb etmək və yeni uğurlar qazanmaqdır".
Gənclər və idman naziri Fərid Qayıbov isə deyib ki, dünya çempionatı kimi böyük turnirin Azərbaycanda keçirilməsi gözəl addımdır: "Minifutbol millimiz bunadək Avropa çempionu olub, dünya çempionatında dördüncü yeri tutmuşdu. Bu idman növü ölkəmizdə yüksək səviyyədə inkişaf edir. Burada dövlətin dəstəyi mühüm yer tutur. Bildiyiniz kimi, idman ölkəmizdə dövlət siyasəti kimi müəyyənləşdirilib. Bunun nəticəsində Azərbaycanda irimiqyaslı yarışlar keçirilir, yeni qələbələr olur və idmanımız inkişaf edir".
Dünya Minifutbol Federasiyasının vitse-prezidenti Peter Kralik isə qeyd edib ki, Bakıda minifutbol üzrə dünya çempionatı möhtəşəm təşkil olundu. O, mundialın yerli azarkeşlər tərəfindən böyük izdihamla qarşılandığını bildirib: "Dünya çempionatı üçün böyük dəstək göstərildi. Azərbaycanın minifutbol üzrə çox gözəl komandası var. Onlara öz təbrikimi çatdırıram. Milli komandanız turnir ərzində əla oyun nümayiş etdirdi və qələbəni haqq etdi. Bu yarış minifutbol tarixində ən mötəbər turnir oldu".
Qurum rəsmisi keçirildiyi Milli Gimnastika Arenasında olan təşkilatçılığı bəyəndiyini vurğulayıb: "Bu cür tədbirləri təşkil etməyin necə çətin olduğunu bilirəm. Lakin Azərbaycan bunun öhdəsindən əla şəkildə gəldi".
Minifutbol üzrə Azərbaycan millisinin baş məşqçisi Elşad Quliyev isə bildirib ki, tarixi qələbə oldu: "Bu yolda əməyi olan hər kəsə təşəkkür edirəm. Möhtəşəm qələbə idi. Sadəcə olaraq bu hissləri yaşamaq lazımdır. Çempion olmaq qismətimizdə var imiş. Demək olar ki, bu oyunda vurduğumuz zərbələrin hamısı qolla nəticələndi. Azərbaycan xalqını təbrik edirəm".
Minifutbol üzrə Azərbaycan millisinin üzvü Xətai Bağırov Bakıda keçirilən dünya çempionatının qalibi olmaları barədə danışarkən deyib ki, hissləri sözlə ifadə etmək çox çətindir: "Final matçına yüksək səviyyədə hazırlaşmışdıq. Bu oyuna qədər bir çox qol epizodlarından istifadə edə bilmirdik. Lakin bu gün ilk dəqiqələrdən qollar vurmağa başladıq. Bizə dəstək olan hər kəsə təşəkkür edirəm".
Göründüyü kimi, bu gün Azərbaycanın beynəlxalq aləmdə idman ölkəsi kimi tanınmasını və mötəbər arenalarda bayrağımızın dalğalanmasını hamılıqla şərəf və qürur hissi ilə seyr ediriksə, bütün bu nailiyyətlərin təməlində məhz dövlətin uğurlu idman siyasəti dayanır.
Gənclik və idman bir-birini tamamlayan məfhumlardır. Müasir gənclərin hərtərəfli formalaşması, rəqabətədavamlı yetişdirilməsi məhz dövlətin uğurlu gənclər siyasətinin davamıdır. Gənclərimiz tək idmanda deyil, bütün sferalarda aktiv rolu ilə seçilir, ictimai-siyasi, sosial-iqtisadi sahələrdə də mühüm rol oynayırlar. Bütün bunlar Prezident İlham Əliyevin və Birinci vitse-prezident Mehriban xanım Əliyevanın gənclərin fəaliyyəti üçün yaratdığı geniş imkanların, yüksək diqqət və qayğının nəticəsidir.
Elçin CƏFƏROV,
"Azərbaycan"
