Azərbaycanın ərazi bütövlüyünü qəbul etməsi beynəlxalq ictimaiyyət tərəfindən qəbul edilir. Amma qələbəmizi həzm edə bilməyənlər də var. Ermənistandakı revanşistlərin, Fransa başda olmaqla dünya erməniliyinin, onların maraqlarına xidmət edən Avropa Parlamenti kimi təşkilatların fəaliyyətləri bunu təsdiq edir. Əlbəttə, onların nə demələrinin, nə qərarlar qəbul etməsinin heç bir əhəmiyyəti yoxdur və olmayacaq da.
Riyakar fəaliyyətin bir mərkəzdən koordinasiya olunduğu şübhə doğurmur
Məsələ həm də ondadır ki, Azərbaycanın qələbəsi, torpaqlarını işğaldan azad etməsi, habelə uğurları ilə barışa bilməyənlər ölkəmizə qarşı qarayaxma kampaniyalarını hibrid formada həyata keçirməyə başlayıblar. Azərbaycana qarşı xüsusən sosial şəbəkələrin imkanlarından istifadə edərək informasiya müharibəsi aparır, dövlətimizə və uğurlarımıza qara yaxmağa cəhd göstərirlər.
Sözügedən kəsim həm də müxtəlif hadisələrə fürsət kimi baxaraq ölkəmizlə bağlı saxta, həqiqətə uyğun olmayan məlumatlar yayırlar. Son günlərdə İran-İsrail qarşıdurması fonunda bu özünü büruzə verməkdədir. Artıq günlərdir ki, sosial şəbəkələrin erməni seqmentində, xüsusən teleqram kanallarında kütləvi şəkildə İsrailin İrana qarşı hərbi əməliyyatlarda guya Azərbaycan ərazilərindən istifadə etməsi barədə dezinformasiyalar tirajlanır. Bu böhtan kampaniyasının respublikamıza qarşı aparılan hibrid müharibənin tərkib hissəsi kimi bir mərkəzdən koordinasiya olunduğu şübhə doğurmur. Lakin bu cür xəbərlərin heç biri rəsmi mənbələr tərəfindən təsdiqini tapmır və tapa da bilməz. Çünki olmayan hadisənin təsdiqlənməsi mümkün deyil.
Erməni yalanları ayaq tutub yeriyə bilməz
Son günlər ölkəmizi ləkələyən saxta xəbərlərlə bağlı Milli Məclisin Xarici müdaxilələrə və hibrid təhdidlərə qarşı müvəqqəti komissiyası da açıqlama verib. Açıqlamada bildirilir ki, regionda baş verən son hadisələr fonunda Azərbaycan Respublikası hibrid təhdidlərin geniş yayılmış növlərindən olan dezinformasiya kampaniyasının yeni dalğası ilə qarşılaşıb: "Aparılan monitorinqlərin təhlili nəticəsində müəyyən edilib ki, qonşu dövlətlərin ərazisində fəaliyyət göstərən, müxtəlif dairələrə və maraqlara xidmət edən qruplar tərəfindən sosial media platformaları vasitəsilə dövlətimizə qarşı informasiya kampaniyaları təşkil edilir.
Cərəyan edən proseslərlə bağlı Azərbaycan Respublikasının rəsmi mövqeyinin Xarici İşlər Nazirliyi və dövlət rəsmiləri tərəfindən səsləndirilməsinə baxmayaraq, "Teleqram", "Feysbuk", "X", "TikTok" və "Yutub" kimi platformalar üzərindən aparılan fəaliyyətlərdə təhrif olunmuş, saxta məlumatlar yayılır. Münaqişə tərəflərini, eləcə də beynəlxalq ictimaiyyəti çaşdırmağa yönəlmiş bu hərəkətlərin məqsədi ölkəmizin artan nüfuzuna xələl gətirmək, dost və qardaş ölkələrlə münasibətlərini pozmaqdır.
Xatırladaq ki, Azərbaycan Xarici İşlər Nazirliyinin iyunun 13-də yaydığı bəyanatda İsrail və İran arasındakı hərbi qarşıdurmadan narahatlıq ifadə olunub. Azərbaycan XİN vəziyyətin gərginləşdirilməsini qəti şəkildə pisləyərək, tərəfləri mövcud fikir ayrılıqlarını yalnız beynəlxalq hüququn norma və prinsiplərinə uyğun olaraq, dialoq və diplomatik yollarla həll etməyə çağırıb. İyunun 14-də isə Azərbaycanın xarici işlər naziri Ceyhun Bayramovla İranın xarici işlər naziri Seyid Abbas Ərağçi arasında telefon danışığı baş tutub. Telefon danışığında respublikamızın ərazisinin hər hansı bir ölkə tərəfindən üçüncü ölkəyə, o cümlədən qonşu İrana qarşı istifadə edilməsinin mümkün olmadığı da vurğulanıb.
İran-İsrail qarşıdurması ilə bağlı Azərbaycanın mövqeyi aydındır. İranın rəsmi dairələri bunu bilirlər. Ona görə sosial şəbəkələrin erməni seqmentinin yaydığı yalanlar ayaq tutub yeriyə bilməz və bütövlükdə ölkəmizə qarşı aparılan böhtan kampaniyası iflasa məhkumdur.
Rəşad CƏFƏRLİ,
"Azərbaycan"
