Ağdaş rayonunda istehsal olunan kənd təsərrüfatı məhsullarının hamısı özəl sektorun payına düşür. Əkin-səpin və biçin işlərini lazımi səviyyədə yerinə yetirmək üçün rayonda fermerlərə hər cür şərait yaradılır. Bunun nəticəsidir ki, bu il onlar bir çox uğurlu göstəricilərə nail olublar.
Elə götürək taxılçılığı. 10313 hektar buğda sahəsindən 26.5 min ton məhsul yığılıb, hər hektarın məhsuldarlığı 25,7 sentnerə çatıb. 5296 hektar biçilmiş arpa sahəsindən isə hər hektarın məhsuldarlığı 23.4 sentner olmaqla, 12,5 min ton məhsul istehsal edilib. Ümumiyyətlə, 2010-cu illə müqayisədə bu il Ağdaş taxılçıları 1.8 min ton çox taxıl istehsal ediblər. Biçin zamanı 62 kombayndan kifayət qədər səmərəli istifadə olunduğuna görə heç bir itkiyə yol verilməyib.
Ağdaşda bitkiçilik məhsullarının istehsalına da diqqət artırılır. Rayon ərazisindəki şoranlaşmış torpaqlarda çəltik əkininə xüsusi əhəmiyyət verilir. Mütəxəssislərin bildirdiyinə görə, çəltik əkinindən sonra növbəli əkindən yaxşı nəticələr gözləmək mümkündür. Məhz bu amil nəzərə alınaraq Ağdaşın şoranlaşmış torpaqlarında çəltik əkininə üstünlük verilir və neçə ildir ki, həmin sahələrdən yüksək məhsul götürülür. Çəltikçiliklə məşğul olan fermerlər bildirirlər ki, dənli bitkilərdən tez yetişən çəltik çox məhsuldar bitkidir. Hazırda rayonun çəltik sahələrində aqrotexniki qulluq işləri davam etdirilir, məhsul yetişmək üzrədir.
Ağdaşın iqlim şəraiti tərəvəzçilik, o cümlədən faraş və örtülü tərəvəz məhsulları yetişdirilməsi üçün çox əlverişlidir. Digər bölgələrə nisbətən burada tərəvəz 25-30 gün tez yetişir. Ağdaş RİH başçısının aqrar məsələlər üzrə müavini Fərhad Əliyevin verdiyi məlumata görə, faraş tərəvəzin istehsalının artırılması, istehsal olunan məhsulun ixracının genişləndirilməsi məqsədilə cari ilin məhsulu üçün 422.5 hektar sahədə tərəvəz əkilib. Hazırda məhsul yığımı davam edir və ilin sonuna bol məhsul istehsalı gözlənilir.
Rayonda bostan məhsulları, kartof, meyvə istehsalının artırılmasına xüsusi əhəmiyyət verilir. 1161 hektar kartof, 1302 hektar qarğıdalı, 235 hektar pambıq, 114 hektar lobya, 1470 hektar bostan sahəsinə fermerlər yüksək məhsul götürmək ümidi ilə baxırlar.
Meyvəçiliyə də rayonda yetərincə maraq var. Qarşıya məqsəd qoyulub ki, bu il meyvə bağlarının bərpası, yeni bağların salınması, meyvə ixracının yüksək səviyyədə təşkili işlərinə diqqət daha da artırılsın. Qeyd edək ki, 1394 hektar mövcud meyvə bağlarının 1156 hektarı bar verəndir.
Bundan başqa, maldarçılığın inkişafı üçün möhkəm yem bazası yaradılması məqsədilə 2488 hektar qarğıdalı, 12630 hektar yonca əkilib. Hazırda ərazilərdə qaba yem tədarükü davam edir.
Kənd təsərrüfatı işlərində suvarma məsələsi vacib amildir. Bu işin öhdəsindən gəlmək üçün Ağdaş Suvarma Sistemləri İdarəsi kanallarda lildən təmizləmə tədbirlərini vaxtında başa çatdırır. İdarənin istifadəsində 1538,1 kilometr uzunluğunda suvarma kanalları mövcuddur. Daşqın və selə qarşı da tədbirlər unudulmur, buldozerlər vasitəsilə Türyançay məcrasında müvafiq təmizləmə işləri görülür.
Pirəzə Mexaniki Suvarma İdarəsi Kür və Türyançay çaylarında quraşdırılmış 22 dizel və 13 elektrik nasos stansiyaları vasitəsilə Ağdaş və Yevlax rayonlarının 11 kəndinin 9650 hektar əkin sahələrinin mexaniki üsulla suvarılmasının öhdəsindən bacarıqla gəlir.
Bəli, Ağdaşda kənd təsərrüfatı işlərinin həyata keçirilməsinə kompleks yanaşılır. Yüksək məhsul istehsalı məhz belə tələb edir. Bakıda keçirilən kənd təsərrüfatı yarmarkalarına 90 tondan çox yüksək keyfiyyətli kənd təsərrüfatı məhsullarının göndərilməsi də görülən işlərin üzağardan göstəricisidir.
Telman NƏZƏRLİ,
"Azərbaycan"
