Əbu-Dabidə növbəti üçtərəfli görüş fevralın 4-5-də keçiriləcək
Rusiya-Ukrayna müharibəsinə son qoymaq üçün Kiyev, Moskva və Vaşinqton arasında üçtərəfli görüşlərin növbəti mərhələsi çərşənbə və cümə axşamı keçiriləcək. Prezident Volodimir Zelenski Ukraynanın substantiv müzakirələrə hazır olduğunu bildirib.
Ukrayna Prezidenti açıqlayıb ki, Rusiyanın Ukraynaya qarşı təcavüzünə son qoymaq üçün Ukrayna, Rusiya və ABŞ arasında növbəti danışıqlar fevralın 4-5-də planlaşdırıldığı kimi, Birləşmiş Ərəb Əmirliklərinin paytaxtı Əbu-Dabidə keçiriləcək. Xatırladaq ki, görüşlər fevralın 1-də nəzərdə tutulurdu. Lakin V.Zelenski sosial media platforması "X"-də yazıb: "Növbəti üçtərəfli görüşlərin tarixləri təsdiqlənib: 4 və 5 fevral - Əbu-Dabidə. Ukrayna substantiv müzakirələrə hazırdır". V.Zelenski ümid edir ki, danışıqların nəticəsi "bizi müharibənin real və ləyaqətli sonluğuna yaxınlaşdıracaq".
Rusiyanın TASS Agentliyi xəbər verir ki, danışıqların təxirə salınmasının səbəbi məlum deyil. "The New York Times" qəzeti isə yazır ki, "Ukraynada sülh danışıqları ötən ayın son günündə Mayamidə keçirilmiş Rusiya-Amerika görüşündən sonra təxirə salınıb". Yanvarın 31-də Rusiya Prezidenti Vladimir Putinin xarici ölkələrlə investisiya və iqtisadi əməkdaşlıq üzrə xüsusi nümayəndəsi Kirill Dmitriyev Floridada ABŞ Prezidentinin xüsusi elçisi Stiv Uitkoff, Xəzinədarlıq katibi Skott Bessent, Ağ Evin baş müşaviri Coş Qrünbaum və sahibkar Cared Kuşner ilə danışıqlar aparıb. Amerika nümayəndə heyəti ilə danışıqlardan sonra o bildirib ki, görüş zamanı Rusiya-Ukrayna münaqişəsinin həlli, həm də ABŞ ilə iqtisadi əməkdaşlığı müzakirə ediblər. Kreml rəsmisinin sözlərinə görə, Mayamidə prezidentin xüsusi elçisi Kirill Dmitriyevlə ABŞ rəsmiləri arasında danışıqlar konstruktiv və müsbət keçib. "Heç bir detal olmayacaq. K.Dmitriyev və S.Uitkoff tərəfindən aparılan qiymətləndirmələr, ümumiyyətlə, hər iki tərəf üçün konseptual idi. Ümumilikdə, bunlar olduqca müsbət və konstruktiv söhbətlər idi", - deyə V.Putinin mətbuat katibi Dmitri Peskov danışıqların təfərrüatları və qiymətləndirilməsi ilə bağlı suala cavab olaraq bildirib. Öz növbəsində Stiv Uitkoff "X" sosial media saytında görüşdən ruhlandığını qeyd edərək yazıb ki, "Rusiya Ukraynada sülhün bərqərar olması üçün çalışır".
Xatırladaq ki, ötən həftəsonu - yanvarın 23-24-də Moskva və Kiyev nümayəndələri ABŞ-nin təklif etdiyi kimi, döyüşlərə son qoymaq planı ilə bağlı ilk dəfə Əbu-Dabidə birbaşa danışıqlar aparıblar. Tərəflər bazar günü müzakirələri davam etdirmək barədə razılığa gəlsələr də, sonradan görüşün vaxtı dəyişdirilib.
Danışıq dairələrindəki mənbələrə görə, tərəflər artıq bir neçə məsələdə razılığa gəliblər. Lakin əsas məsələ ilə bağlı hələlik razılıq əldə olunmayıb - Rusiya Ukrayna qoşunlarının Donbasdan çıxarılmasını istəyir, Kiyev isə bu tələbi rədd edir.
Bir neçə gün əvvəl ABŞ Prezidenti Donald Tramp da tərəflərin Ukraynada sülh razılaşmasına mümkün qədər yaxınlaşdığını bildirib. O, qarşıdan gələn danışıqların şanslı olacağına ümid etdiyini açıqlayıb.
Rizvan CƏFƏROV,
"Azərbaycan"
jpg_1770096311.jpg)
