"ABŞ-nin Dövlət katibi Entoni Blinkenin Azərbaycan Prezidenti İlham Əliyevə telefon zəngini ölkələrarası münasibətlərimizi gərginləşdirən qərəzin etirafı kimi başa düşmək olar. Görünür, ABŞ erməni lobbisinin təsiri altında qeyri-obyektiv mövqe nümayiş etdirərək Azərbaycana təzyiq göstərmək istəyinin fiaskoya uğradığını başa düşdü. Müstəqil dövlət olaraq öz siyasətini heç kimin diktəsi ilə müəyyənləşdirmədiyinə görə Azərbaycanın ABŞ-nin həm Konqres, həm də Dövlət Departamenti səviyyəsində sərgilədiyi anti-Azərbaycan mövqeyini adekvat cavablandırması bu ölkəyə dərs oldu. Azərbaycan ABŞ-dən heç bir asılılığı olmadığı üçün haqq sözünü deməkdə və ədalətli mövqeyini açıq şəkildə ifadə etməkdə sərbəstdir".
Bu fikirləri "Azərbaycan" qəzetinə açıqlamasında Milli Məclisin deputatı Azər Badamov deyib. Deputat bildirib ki, Prezident İlham Əliyev telefon danışığı zamanı ABŞ-nin Azərbaycana olan qərəzli münasibətini bir daha diqqətə çatdırdı. Nəticədə yüksəksəviyyəli səfərlərin və təmasların qarşılıqlı şəkildə baş tutacağı ilə bağlı şərtimiz də qəbul edildi.
Azər Badamov hesab edir ki, Entoni Blinkenin telefon zəngi iki əsas məqamla bağlıdır: "Birincisi, ABŞ Azərbaycanla münasibətlərdə özünün yaratdığı gərginliyi azaltmağa çalışır. Çünki Cənubi Qafqazda siyasətini Azərbaycansız heç vaxt davam etdirə bilməyəcəyini yaxşı başa düşür. Nəzərə almaq lazımdır ki, regionun həm siyasi, həm də iqtisadi gündəmini müəyyənləşdirən məhz Azərbaycandır. Belə olan halda, ABŞ Azərbaycanı özündən uzaqlaşdırmaqla Cənubi Qafqaz regionundan da uzaqlaşacağını anlayır. Azərbaycan isə münasibətləri xoş məramla davam etdirmək istəyən bütün ölkələrlə əlaqələrin inkişaf etdirilməsində maraqlıdır. Blinkenin telefon zəngi də onların Azərbaycanla münasibətləri itirmək istəmədiklərini göstərdi. Əgər belədirsə, ABŞ Azərbaycanın müstəqil, ədalətli və beynəlxalq hüquqa söykənmiş siyasəti ilə razılaşmağa məcburdur".
Deputatın fikrincə, Entoni Blinkenin zəng etməkdə ikinci əsas məqsədi isə Azərbaycanla Ermənistan arasında sülh müqaviləsinin imzalanmasında neytral təşəbbüslə çıxış edəcəyini bildirmək idi: "ABŞ artıq başa düşdü ki, Azərbaycana təzyiq göstərməklə Ermənistana üstünlük qazandıra bilməyəcək. Ona görə də münasibətini dəyişməli və sülh müqaviləsinin imzalanmasına töhfə verməklə Ermənistanda möhkəmlənməlidir".
Azər Badamov söyləyib ki, ABŞ rəsmisi telefon danışığı zamanı Ceyms O'Braynın Azərbaycana səfərinə icazə verilməsini cənab İlham Əliyevdən xahiş edib. Deputat hesab edir ki,  Ceyms O'Braynın səfəri çərçivəsində həm ABŞ-Azərbaycan münasibətlərində yaranmış gərginlik aradan qalxar, həm də Azərbaycanla Ermənistan arasında sülh danışıqlarının bərpası üçün tərəflər razılığa gələ bilərlər.  Onsuz da hər kəsə məlumdur ki, Azərbaycan qarşılıqlı hörmət əsasında sülh danışıqları aparmağa hər zaman hazırdır. 

Nəzrin QAFARZADƏ,
"Azərbaycan"