Növbədənkənar parlament seçkiləri kampaniyası özünün ən mühüm fazasına qədəm qoydu. Bu gün Azərbaycanın bütün bölgələrini əhatə edən 125 seçki dairəsində parlament seçkiləri ilə əlaqədar səsvermə keçirilir. Seçkinin yekunlarına əsasən Azərbaycan Respublikasının yeddinci çağırış Milli Məclisi formalaşacaq.
Əsas hərəkət və tədbirlər vaxtında icra olunub
Xatırladaq ki, Prezident İlham Əliyevin iyunun 28-də imzaladığı sərəncamla altıncı çağırış Azərbaycan Respublikası Milli Məclisi buraxılıb və sentyabrın 1-nə parlamentə növbədənkənar seçkilər təyin edilib. Ötən dövrdə Mərkəzi Seçki Komissiyasının təsdiq etdiyi təqvim planı üzrə Milli Məclisə növbədənkənar seçkilərin hazırlanıb keçirilməsi üzrə əsas hərəkət və tədbirlər vaxtında icra olunub. Həm namizədlərin qeydə alınması, həm də təşviqat dövründə hər hansı problem meydana çıxmayıb.
Bu gün seçki marafonunda 990 namizəd mübarizə aparır. Bu parlamentdə bir yer üçün təxminən 7 nəfərdən çox namizədin mübarizə aparması deməkdir. Namizədlərdən 676-sının siyasi mənsubiyyəti var.
Namizədlərin avqustun 9-dan başlayan seçkiqabağı təşviqatı avqustun 31-i səhər saat 8:00-da başa çatıb. Bu dövr ərzində namizədlər onlar üçün müəyyən edilmiş açıq və qapalı yerlərdə seçicilərlə görüşlər keçirərək təşviqatla məşğul olublar. Qeyd edək ki, növbədənkənar seçkilərdə təşviqat üçün 3469 açıq və 2037 qapalı yer müəyyən edilmişdi.
Xarici müşahidəçilər 51 beynəlxalq qurumu və 69 ölkəni təmsil edirlər
Seçici siyahılarının dəqiqləşdirilməsi başa çatdırılıb və respublikamızda 6 milyon 421 min 960 nəfər seçici qeydə alınıb. Ən yaşlı qadın seçicinin 134, ən yaşlı kişi seçicinin isə 109 yaşı var. Seçkilərdə ilk dəfə iştirak edən seçicilərin sayı isə 51 min 141 nəfərdir.
Onu da qeyd edək ki, seçicilər 125 seçki dairəsi üzrə 6478 seçki məntəqəsində səslərini verəcəklər. Hələ səsvermə günündən xeyli əvvəl bütün səsvermə məntəqələri lazımi avadanlıqlarla təchiz olunaraq tam hazır vəziyyətə gətirilib. Seçki məntəqələrindən 6343-ü daimi, 135-i isə müvəqqətidir.
Seçkiləri siyasi partiyaları, qeyri-hökumət təşkilatlarını, vətəndaş cəmiyyəti institutlarını və qeydə alınmış namizədləri təmsil edən müşahidəçilər izləyəcəklər. Müşahidəçi qismində seçkilərdə iştirak etmək üçün akkreditasiyadan keçən yerli müşahidəçilərin sayı 112 min 749 nəfərdir. Onlardan 65 minə yaxını 24 siyasi partiyanın müşahidəçiləridir.
Bundan başqa, Milli Məclisə seçkiləri müşahidə etmək üçün 51 beynəlxalq qurumdan və 69 ölkədən 598 nəfər akkreditə olunub. Üç təşkilat isə "exit poll" üçün Mərkəzi Seçki Komissiyasında qeydiyyatdan keçib. Onlar təxminən 2500-dən artıq seçki məntəqəsində öz fəaliyyətlərini həyata keçirəcəklər.
Milli Məclisə seçkilərin gedişatını internetdən birbaşa izləmək mümkündür. Belə ki, ölkə üzrə 1000 seçki məntəqəsində veb-kameralar quraşdırılıb. İnternet istifadəçiləri istər ölkə daxilindən, istərsə də ölkə xaricindən MSK-nın internet səhifəsinə daxil olaraq heç bir qeydiyyat tələb olunmadan səsvermə prosesini müşahidə edə bilərlər.
Səsvermə 19:00-da başa çatacaq. Səsvermənin gedişi, seçicilərin səsvermədə iştirakı barədə gün ərzində 5 dəfə ilkin məlumatlar veriləcək.
Rəşad CƏFƏRLİ,
"Azərbaycan"
