ABŞ-də “Gələcəyin Fabriki” (“FoF 1.0”) adlanan dünyanın ən böyük polimer 3D printeri təqdim edilib. Bu nəhəng printerlə cəmi 80 saata kiçik bir ev tikmək mümkündür. “Maine” şirkəti tərəfindən hazırlanmış “FoF 1.0” üçün müxtəlif istifadə sahələri artıq gündəmdədir. Bunlardan birincisi, tikinti sənayesidir.
Məlumatlara görə, Maine şəhərinin 2030-cu ilə qədər 80 min evə ehtiyacı var və bu evlərin əksəriyyəti aztəminatlı ərazilər üçün nəzərdə tutulub. “MaineHousing”in direktoru Mark Uisendencer bildirib ki, onlar bu 3D printerlə xərcləri daha çox azaldacaqlar. Çünki printer, əsasən, təkrar emal edilə bilən materiallardan istifadə edir. “FoF 1.0” ilə birmərtəbəli evi 80 saata çap etmək, daha doğrusu tikmək mümkündür. Məsələn, belə bir evin tikintisi bir neçə ay və ya ən yaxşı halda bir neçə həftə çəkə bilsə də, bu printer layihəni dörd gündən az bir müddətdə tamamlaya bilər.
“FoF 1.0” ilə maraqlananlar arasında ABŞ Müdafiə Nazirliyi və Energetika Nazirliyi var. O, saatda təxminən 225 kq materialdan istifadə etməklə 30 metr uzunluğunda, 9.75 metr enində və 5.5 metr hündürlüyündə obyektləri çap edə bilir.
Printerin tətbiq sahələri tikinti sənayedən müdafiə sənayesinə qədər genişdir. Bunun səbəbi 3D printerin müxtəlif çap üsulları arasında dinamik keçid edə bilməsidir. Bu, onu körpü tikintisindən başlayaraq sualtı gəmilərdə və tikinti sənayesində istifadə etmək üçün faydalı bir cihaz edir.

Ülkər XASPOLADOVA,
“Azərbaycan”