Ukraynadakı
"Azərbaycan Ticarət Evi” böyük market şəbəkələrində məhsullarımızın satışa çıxarılmasında
mühüm rol oynayır
Getdikcə dünya
bazarında həm keyfiyyətinə, həm də etibarlılığına görə maraq doğuran Azərbaycan məhsullarının ixrac coğrafiyası böyüyür.
"Made in Azerbaijan” brendi ilə ölkədən ixrac olunan məhsulların çeşidinin və həcminin
hər keçən il artması bunu deməyə əsas verir.
Bu istiqamətdə
atılan addımlardan biri də xaricdə "Azərbaycan Ticarət Evi”nin yaradılmasıdır.
2018-ci ildə 5 xarici ölkədə Azərbaycanın ticarət evi açılıb. Onlardan biri də Ukraynanın paytaxtı Kiyev şəhərində iyunun
22-də açılış mərasimi keçirilən ticarət mərkəzidir.
İqtisadiyyat
Nazirliyi tərəfindən yaradılmış "Azərbaycan Ticarət Evi”nin ümumi sahəsi 300 kvadratmetrə
yaxındır. Ticarət evi "Made in Azerbaijan” brendinin Ukrayna bazarında daha çox
tanıdılması, Azərbaycan məhsullarının ixracının təşviqi və genişləndirilməsi sahəsində
fəaliyyət göstərib, Ukraynada satışı təşkil edir, bu sahədə əlaqələndirməni həyata
keçirir.
Ticarət evinin
daimi fəaliyyət göstərən sərgisində 30-a yaxın Azərbaycan şirkətinin istehsal etdiyi
müxtəlif məhsullar (meyvə şirəsi və kompotlar, mineral sular, zeytun, çay, meyvə
və tərəvəz, qənnadı məmulatları, spirtli içkilər, Naftalan yağı, toxuculuq və kosmetika
məhsulları və s.) nümayiş olunur. Ümumilikdə, "Azərbaycan Ticarət Evi”ndə 85 çeşiddə
şərab, 26 çeşiddə konyak, 37 çeşiddə çay, 30-dan çox çeşiddə meyvə şirəsi və kompotlar,
150 çeşiddən çox digər məhsullar sərgilənir.
Açılış mərasimində
çıxış edən İqtisadiyyat naziri Şahin Mustafayev bildirib ki, iki ölkə arasındakı
siyasi və iqtisadi münasibətlər daim inkişaf etməkdədir. Azərbaycan və Ukraynanın
dövlət başçılarının yüksək siyasi iradəsi nəticəsində bu gün ölkələrimiz arasında
münasibətlər strateji səviyyəyə yüksəlib, müqavilələr bağlanıb, möhkəm müqavilə-hüquqi
baza yaradılıb. Azərbaycanın Ukrayna ilə əlaqələrin genişləndirilməsində maraqlı
olduğunu qeyd edən nazir ticarət evinin iki ölkə arasında iqtisadi-ticarət əlaqələrinin
inkişafı, biznes təşəbbüslərinin stimullaşdırılması və keyfiyyətli Azərbaycan məhsullarının
"Made in Azerbaijan” brendi ilə Ukrayna bazarında təşviqi baxımından əhəmiyyətli
olacağını bildirib.
Qeyd edək
ki, açılışından bir müddət sonra "Azərbaycan Ticarət Evi” ölkəmizdə istehsal olunan
kənd təsərrüfatı, şərab və digər yerli məhsulların satışını təmin etmək üçün Ukraynanın
müvafiq qurumlarından sertifikat və lisenziya da alıb. Artıq Azərbaycan məhsulları
Ukraynanın ən böyük market şəbəkələrində satışa çıxarılıb. Bu da Ukraynada Azərbaycan
məhsullarına marağı daha da artırıb. Ticarət evi ölkəmizdə istehsal olunan məhsulların
ticarət dövriyyəsini artırmaq üçün Ukraynanın böyük vilayət və şəhərlərinin market
şəbəkələri ilə müqavilə imzalayıb.
Ümumiyyətlə,
ticarət evləri "Made in Azerbaijan” brendi ilə məhsullarımızın xaricə çıxışının
asanlaşdırılması və təbliğ olunması, məhsulun heç bir vasitəçi olmadan ixracına
imkan yaradılması prosesində körpü rolunu oynayır. Ticarət mərkəzinin uğurlu fəaliyyəti
xarici iş adamlarını Azərbaycan məhsulları ilə yaxından tanış etməklə, ölkəmizə
investisiyaların cəlb olunmasına şərait yaradır və ölkələr arasında iqtisadi əlaqələrin
daha da genişlənməsinə, əməkdaşlığın yeni istiqamətlərinin müəyyən olunmasına stimul
verir.
R.BAXŞƏLİYEV,
"Azərbaycan”
