Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

“YARAT”da Bencamin Britten və Sofiya Qubaydulinanın əsərləri səslənib

08 Noyabr 2017
 

“YARAT” Müasir İncəsənət Mərkəzində Bencamin Brittenin “Frenk Bric mövzusunda variasiyalar” və Sofiya Qubaydulinanın “Fachwerk” əsərləri təqdim edilib. Heydər Əliyev Fondunun vitse-prezidenti Leyla Əliyeva konsertdə olub.

“YARAT”dan AZƏRTAC-a bildirilib ki, Bencamin Britten “Frenk Bric mövzusunda variasiyalar” adlı ən məşhur bəstələrindən birini müəllimi, bəstəkar Bricə həsr edib. İlk dəfə 1937-ci ildə Zalsburq festivalında tamaşaçılara təqdim edilən bu əsər sonradan daha geniş coğrafiyada ifa olunmağa başlanılıb. Hələ Kral Musiqi Kollecinin tələbəsi olduğu dövrdə özünü uğur qazanmış bəstəkar kimi tanıtsa da, məhz “Frenk Bric mövzusunda variasiyalar” əsəri Brittenin adına okeanın o tayı daxil, hər yerdə böyük şan-şöhrət gətirib.

“Fachwerk” əsəri barədə Sofiya Qubaydulinanın sözlərini də xatırlamaq yerinə düşər. Bəstəkar deyib: “Bu əsərin adını faxverk (Fachwerk) memarlıq üslubuna olan böyük rəğbətimlə əlaqələndirmək olar. Bu, son dərəcə qeyri-adi, unikal bir üslubdur və burada tikilinin konstruktiv elementləri bina fasadının arxasında “gizlənmir”, əksinə, ön plana çəkilir”. Musiqili gecədə Ukrayna əsilli almaniyalı akkordeon ifaçısı Roman Yusipeyin ifasında təqdim olunan hər iki əsər böyük maraqla qarşılanıb. Konsertdə ifaçını xalq artisti Yalçın Adıgözəlovun bədii rəhbərliyi ilə Q.Qarayev adına Azərbaycan Dövlət Kamera Orkestri müşayiət edib.