Yayın qızmar günlərində bu yerlərin əvəzi yoxdur
Yayın qızmar günləri bir az səngisə də, paytaxt sakinlərinin çoxu istilərdən yayınmaq üçün xüsusən də şənbə və bazar günləri park və istirahət güşələrinə, Bakıətrafı kənd və qəsəbələrdəki bağ evlərinə üz tuturlar.
Qeyd edək ki, yay mövsümündə istər bölgələrdən, istərsə də xarici ölkələrdən Bakıya gələnlərin də sayı çox olur. Çünki Bakı və onun ətraf qəsəbələri gündən-günə gözəlləşir, abadlaşır, insanların sosial tələblərinin hərtərəfli təmini və istirahətlərinin səmərəli keçməsi üçün lazımi infrastruktur yaradılır.
Desək də, deməsək də, Bakının gəzməli, istirahət etməli yerlərindən söhbət düşəndə ilk növbədə Xəzərin mirvari boyunbağısı adlandırılan Sahil bağı - Bakı bulvarı yada düşür. 108 ilə yaxın yaşı olan 3,5 hektarlıq bu bağ ölkə başçısının şəxsi təşəbbüsü və sərəncamına əsasən, genişləndirilərək 16 hektara çatdırılıb. Görülən iş, yaradılan şərait göz oxşayır. Gəzintidə olanların əksəriyyəti sahil bağının gecə füsunkarlığından, gəzməli və görməli yerlərindən, Vətən müharibəsinin qələbəsindən, rəşadətindən söhbət açan Hərbi Qənimətlər Parkını və Zəfər muzeyini ziyarət etməkdən zövq alırlar. Dünyada turizm brendinə çevrilən bu ünvan istirahət edənlərə iftixar və qürur duyğuları yaşadır.
Gəzintidə olanlardan biri - Bakı şəhər sakini Əməl Kərimova, qızı Firuzə, oğlu Hüseyn və ali məktəbdə təhsil alan nəvələri ilə görüşdük. Əməl xanım bildirdi ki, qızı Firuzə Almaniyada yaşayır, təzə gəlib, hər il yay aylarını mütləq Bakıda keçirir. Firuzə xanım Bakının bugünkü gözəlliyindən, füsunkarlığından ağızdolusu danışdı. "Bakı fontanlar və yaşıllıqlar şəhəridir, çox gözəldir. Sahil bağı Bayraq meydanından Ağ şəhərdən cənnətməkan bir ərazidir". Bulvardan, eləcə də şəhərin görməli yerlərindən mobil telefonlarıma çəkdiyim şəkilləri Almaniyada dostlarıma da göstərəcəyəm", - dedi.
Bakını gözəlləşdirən, onu belə ürəyəyatımlı edən şəhərdə aparılan möhtəşəm quruculuq işləri, ətraf qəsəbələrdə yaradılmış 53-dən çox yeni, 91-dən çox əsaslı təmir olunmuş mədəniyyət və istirahət parklarıdır. Bu parklar, bağlar Bakı sakinlərinin və qonaqların əsl istirahət məkanına çevrilib. Belə ünvanlardan biri də Bakı Konqres Mərkəzinin qarşısında salınmış istirahət parkıdır. Ümumi sahəsi 7 hektardan çox olan parka gəlib-gedənlərin sayı günbəgün artır. Ərazisində 300-dən çox müxtəlif növ ağac, 50 mindən artıq dekorativ gül və kol bitkiləri əkilib. Burada çinar, tut, dəmirağacı, söyüd və palıd ağaclarının bir neçə növləri var. İtaliyadan gətirilmiş bitki və ağaclar üstünlük təşkil edir.
İstirahət parkında olarkən paytaxt sakini Ruslan Bədəlovla həmsöhbət olduq. O dedi:
- Mən istirahətimi, demək olar ki, bu parkda keçirirəm. Bura nəinki mənim, ümumiyyətlə, minlərlə vətəndaşımızın istirahət yeridir. Ərazidə 4 müxtəlif istirahət zonası var. İdman zonasında müxtəlif trenajorlar və qurğular qoyulub. Uşaqlar üçün xüsusi zonalar yaradılıb. Ərazidə fəvvarə və 3 göl var. Burada ilin bütün fəsillərində fəaliyyət göstərən buz meydançası da salınıb. Bu istirahət mərkəzi nəinki biz gənclərin, yaşlı insanların, yeniyetmə oğlan və qızların da gəzməli, dincəlməli və istirahət etməli məkanıdır.
Belə istirahət parklarından biri də yenidənqurmadan sonra təzə görkəmdə sakinlərin, xüsusən də azyaşlıların xidmətində olan Nərimanov parkıdır. Ərazisi 4,1 hektar olan bu park gəzinti və əyləncə baxımından şəhər sakinləri üçün sevimli məkandır. Xatırladaq ki, park nadir dizaynda yenidən qurulduqdan sonra buraya gələnlərin sayı bitib-tükənmir, xüsusən də səhər və axşam saatlarında. Parkda olarkən Zeynal Arzumanovla həmsöhbət olduq.
- Uzun illərdir parkın yaxınlığında yaşayıram. Açığı deyim ki, əvvəllər bura qanunsuz küçə ticarəti ilə məşğul olanların yığnağı idi, necə deyərlər, park dükan-bazarı xatırladırdı. Amma indi mənzərə tamam dəyişib. Parkın ümumi görkəminə xələl gətirən tikili və qurğular ərazidən götürülüb, yerində salınan yaşıllıq sahələri, dekorativ kollar göz oxşayır. Mövcud ictimai-iaşə obyektlərinin fasadları müasir üslubda təmir edilib, yeni işıqlandırma sistemləri, idman qurğuları, uşaq-əyləncə meydançası yaradılıb, habelə yağış sularının axıdılması üçün xətlər çəkilib. Bir sözlə, parka əylənməyə gələnlərə, xüsusən də ailəli gəzintiləri üçün hər cür şərait yaradılıb.
Ötən şənbə günündən paytaxt sakinlərinin asudə vaxtının daha səmərəli təşkili məqsədilə yeni bir ənənənin əsası qoyulub. Bakı Şəhər İcra Hakimiyyəti və rayon icra hakimiyyətlərinin birgə təşkilatçılığı ilə açıq havada konsertlərə start verilib.
Rəhman SALMANLI,
İlham BABAYEV (foto),
"Azərbaycan"
