Son bir ildə baş verən proseslər Azərbaycan Prezidenti İlham Əliyev və Ermənistanın Baş naziri Nikol Paşinyanın Vaşinqton görüşünün Cənubi Qafqazda uzunmüddətli sülh və sabitliyin təmin olunmasına verdiyi töhfənin taleyüklü əhəmiyyətini nümayiş etdirib. 2025-ci il avqustun 8-də ABŞ Prezidenti Donald Trampın iştirakı ilə keçirilmiş danışıqların nəticələri Azərbaycan liderinin sülh diplomatiyasının növbəti uğuru kimi qiymətləndirilə bilər.
Bu fikirləri Türkiyənin Qars şəhərində yerləşən Qafqaz Universitetinin dosenti, beynəlxalq münasibətlər üzrə ekspert Halit Hamzaoğlu AZƏRTAC-a müsahibəsində söyləyib.
Ekspert son bir ildə Azərbaycan ilə Ermənistan arasında münasibətlərin normallaşdırılması istiqamətində əldə olunan irəliləyişə diqqət çəkib. “ATƏT-in Minsk qrupu formatının ləğvi tərəflərin ziddiyyətlərin aradan qaldırılmasına iradəsini nümayiş etdirdi, iqtisadi-ticari əlaqələrin inkişafı isə onların regionda əməkdaşlığa hazır olduğunu göstərir. TRIPP marşrutunun reallaşdırılması bu prosesə yeni təkan verəcək”, - deyə H.Hamzaoğlu qeyd edib.
Türkiyə universitetinin dosenti Azərbaycanı Cənubi Qafqazda tarixi təşəbbüslərlə çıxış edən qalib və aparıcı dövlət adlandırıb. Onun sözlərinə görə, danışıqlar prosesinin və regionda münasibətlərin hərtərəfli normallaşdırılmasının məntiqi yekunu sülh sazişinin imzalanması olmalıdır. Bunun üçün isə Ermənistan Konstitusiyasının preambulasına dəyişiklik edilməlidir.
Türkiyə universitetinin müəllimi rəsmi Bakının Ermənistanın qonşu ölkələrə qarşı ərazi iddialarından imtina etməsi ilə bağlı tələbinin məntiqli və əsaslı olduğunu vurğulayıb. “Azərbaycan və Türkiyə ilə mehriban qonşuluğa aparan yol İrəvanın atacağı konkret addımlardan, Ermənistanda radikalizm və revanşizmin genişlənməsinə yol verilməməsindən keçir. Rəsmi Bakının uzatdığı sülh əli bütün regionun maraqlarına cavab verir”, - deyə o qeyd edib.
Bununla yanaşı, Türkiyə universitetinin dosenti Vaşinqton görüşünün Azərbaycan ilə ABŞ arasındakı münasibətlərdə yeni mərhələnin başlanğıcını qoyduğunu vurğulayıb.
“Azərbaycan qlobal təhlükəsizliyə və sabitliyə öz töhfəsini verməkdə davam edir və bu, bütün dünyada, o cümlədən Ağ Evdə də etiraf olunur”, - deyə H.Hamzaoğlu bildirib.
