Elm və Təhsil Nazirliyinin İnformasiya Texnologiyaları İnstitutunda distant təhsilin elmi-nəzəri problemləri araşdırılır.
Bu barədə AZƏRTAC-a açıqlamasında institutun şöbə müdiri dosent Firudin Ağayev məlumat verib. Onun sözlərinə görə, distant və ənənəvi tədris modellərinin müqayisəli təhlili göstərir ki, ənənəvi təhsil əsasən müəllim mərkəzli, fiziki və kollektiv təcrübəyə əsaslanır. Süni intellekt əsaslı distant təhsil isə tələbəyönümlü, fərdi və adaptiv xarakter daşıyır.
Müsahibimiz qeyd edib ki, eyni metod və tempin bütün tələbələrə tətbiqi sürətli öyrənənlərin motivasiyasının azalmasına, zəif öyrənənlərin isə geri qalmasına səbəb olur. Bu baxımdan fərdiləşdirilmiş yanaşmalar distant tədrisin əsas üstünlüklərindən biri hesab olunur.
Tədqiqatçının fikrincə, süni intellektin distant tədrisə tətbiqi bir sıra elmi-praktik problemlərlə müşayiət olunur. Bunlara texnologiyaların klassik pedaqoji prinsiplərlə inteqrasiyasının yetərincə əsaslandırılmaması, adaptiv sistemlərin bütün fərdi xüsusiyyətləri tam əhatə edə bilməməsi, eləcə də avtomatlaşdırılmış qiymətləndirmənin obyektivlik və etibarlılıq məsələləri daxildir.
“Bu problemlərin aradan qaldırılması üçün müasir distant təhsildə süni intellekt əsaslı adaptiv öyrənmə sistemləri, fərdi tədris planları, formativ və avtomatlaşdırılmış qiymətləndirmə mexanizmləri, habelə interaktiv tapşırıqlardan geniş istifadə olunur. “Ağıllı” təhsil sistemləri süni intellekt və məlumat analitikası vasitəsilə tədris prosesini planlaşdırır, qiymətləndirməni həyata keçirir və müəllimlərə operativ əks-əlaqə təqdim edir”, - deyə alim bildirib.
Mütəxəssis vurğulayıb ki, bu yanaşma müəllimin rolunun bilik ötürücüsündən daha çox mentor və istiqamətverici funksiyaya transformasiyasını sürətləndirir.
